الزواج من متزوج على مضض

السلام عليكم


خواتي بنات حواء عندي موضوع وابي اشوف الآراء فيه يمكن اقدر من خلالها احسم امري


انا مطلقه بدون أطفال من سبع سنوات عمري 33 سنه غير موظفه


خلال هذي الفتره ما تقدم لي إلا ثنين وماكانوا مناسبين ابد


انا اعاني من اكتئاب وقلق وصار لي ثلاث طعش سنه اعالج وسبحان الله ما استفدت كثير مع اني غيرت العلاج اكثر


اكثر من مره نفسيتي متعبتني شوي والعلاج مخليني مستقره نوعا ما يجيني أوقات يزيد القلق عندي وضيقة الصدر


انا عايشه مع امي في بيت لوحدنا الله يخليها لي خواني كلهم متزوجين وخواتي بعد




تقدم لي هالفترة متزوج وعمره مناسب وحالته الماديه كويسه وسألوا عنه والكل اثنى عليه ومدحه


كان ودي ارتبط برجل ما عنده غيري لكن ما الله كتب وغير كذا مع مرضي ممكن يكون زواجي من متزوج اريح لي


لأنه بيخف ضغط المسؤليه علي ا، لعلاج اللي اخذه ملخبط هرموناتي كثير يعني ممكن احتاج فتره عشان اتعالج


واحمل و هو عنده عيال يعني ما راح يكون متشفق على العيال كثير




وغير كذا امي ما راح تدوم لي العمر والله أحيانا اصحى بالليل اشوف هي تتنفس ولا لا مرعوبه افقدها و لو صار لها


شي بضطر اسكن عند خواني


وتعرفون مهما كانت زوجة الأخو كويسه لازم يكون فيه حزازيات وبكون كني ضيفه عندهم


اعرف ان الزواج من معدد له سلبياته ولو وافقت بوافق على مضض ما في وحده ترضى بهالشي الا منحده


بالاخير ابي بيت وعيال ينفعوني بكبرتي وهم هدفي الأول من الزواج



والله العظيم متضايقه من هالموضوع جالسه أحاول احكم عقلي وارضى بالنصيب المجتمع اللي انا فيه كله ما فيه احد


معدد ولا وحده مرتبطه بمعدد يعني مش منتشر عندنا ابد يمكن هالشي هو اللي مخليني محتاره اكثر


ابي كل وحده فيكم تحط نفسها مكاني وتعطيني رايها


وخواتي الثانيات يا ليت تطرحون تجاربكم




جزاكم الله خير