Analysis Services
  • «
  • 1
  • 2
  • 3
  • >
  • »
بما ان بكرة اخر يوم تداول وبعدها اجازة ابي اقولكم هذي القصة في عالم الاسهم وهي قصة حقيقية :
لي حوالي سنتين اشتغل في الاسهم وكسبت حوالي 25% الحمد لله يعني تقدر تقول عليمي في الاسهم لانه خسائري بالهبل في هذا السوق
وفي يوم شافتني ام العيال احوالي متغيره ماهي زي قبل دائم التفكير والمطامر في المنتديات وبرامج وكتب عن الاسهم واشتراك في توصيات الجوال مسوي 00 هامور00 وانا من جنبها
قالت لي : ابو هاجوس تراك هالايام مانت عاجبني علامك متبدل ومانت بالعادة فيه شيء مقلقك
قلت - اقول وش عرفك وخري عني الله يرحم والديك
قالت - علمني يارجال يمكن اقدر اساعدك
قلت - فكينا واللي يعافيك هذي اسهم وتجارة وفلوس خلك بس في شغل البيت وكثر الله خيرك
قالت - اسهم وفلوس وعساك ان شاء رابح
عاد هذيك الايام وانا في حالة يعلم بها الله صيفية العام الله لايعيدها
قالت - طيب الحريم مسموح لهم يبيعون ويشترون والا مثل سواقة السيارة
قلت - لاحول ولاقوة الا بالله هاللحين انت وخشتك هذي تبين تدخل بالاسهم وبعدين من فين لك دراهم هاه
قالت - ابيع ذهبي
قلت - اقول تراك مخبولة
قالت - الذهب يابو هاجوس هاللحين غالي وذهبي واجد وخلني ابيعه احسن من تركه بلافائدة
قلت - ياولد فكرة زينة وبالمرة اكوش على هالمبلغ السنع هذا الكلام طبعا كله قبل رمضان المهم بعنا الذهب جاب 50000 الف ريال
يوم رجعنا البيت قلت - ام هاجوس هات الفلوس وخلينا اراويك الشغل السنع وان شاء الله في ظرف سنة وفي يدك اقل شيء 10000 الاف مكسب 00 هامور00
قالت - شنو شنوشنو فلوسي وبشغلها بكيفي
افا من اولها بدينا يا ام هاجوس
قالت - اسمع انت لك مدة وانت مطامر من سهم للثاني وبصراحة الظاهر ان ما عندك سالفة
قلت - هالحين ماعندي سالفة شوفي - تعرفين ايش يعني الماكد ؟
قالت - وش ذا اكله
قلت - شفتي ابوهاجوس خبير اسهم طيب علميني - تعرفين البولنقر ؟ والظاهر اني ذيك اليوم ما نطقتها صح
قالت - اقول وخر عني هذي الخرابيط اللي ابيه تحط فلوسي في بنك البلاد
قلت - الله الله عشنا وشفنا من وين تعرفين بنك البلاد
قالت - قالت اقول حط فلوسي كلها في بنك البلاد اليوم شفته في التلفزيون ب 727
قلت - يام هاجوس هذا البنك بعد ما اشتغل وترينه عله وغثيث وله فترة راكد
قالت - اقول اركد انت واشتره بكره
المهم شرينا بالفلوس كلها بنك البلاد وشوي يفز سعر البلاد وجيت بسرعة وانا مبسوط ابي ابشرها ان السهم طلع عشرين ريال وهنا كانت المفاجاة
قالت - اقول اركد ابي اقل شيء يوصل السهم 900
بصراحة زعلت وقلت في نفسي هذي والله المخبلولة راح عليها مكسب حلو وشوي يومين واللا السهم واصل 910
قالت - هالحين بيع المهم كسبت ما شاء الله في ايام حوالي 25% وانا سنتين يادوب الحمد لله
بعدها قلت هيا هذي فلوسك صارت فوق 60000 الف هيا خليني اتصرف واحطها في سهم الاتصالات
قالت - شنو شنو شنو لا ياعيوني هذا سهم سعره عالي وما يحقق طموحي
افا وش طموحك يا لبنى العليان ؟
قالت - ابي ادبل راس مالي ومافيه غير التعمير
قلت - شوفو الخبلة التعمير نزل اعلان يقول عندنا استثمارات ونبي نطور والسهم من عقبها نزل ولا ارتفع
قالت -اقول اشتر التعمير وبالفعل شريتا ب 238 تقريبا وقالت لي - لو مهما صار ماتبيع فهمتني زين ؟ بصراحة تغيرت علي ام هاجوس ماهي مثل قبل
قلت - ابشري بسعدك وشوي والا السهم واصل 290 قلت - بسرعة بيعي
قالت - اركد تراها زينة والتسرع جهالة 00
المهم شوي واللا ادارة التعمير الدايخة مطلعة اعلان نفي خبر زيادة رأس المال
جيتك عاد مسوي ابو العريف واقول لام هاجوس بيعي بسرعة اوقفي خسارتك
قالت - شنو شنو شنو اوقف خسارتي 00 ولك ماحزرت 00 باللهجة السورية
قلت - تكفين بيعي احسن ترين فلوسك بتروح وطي
المهم رفضت البيع وتمسكت بالسهم وشوي واللا ذا الاعلان من التعمير عن زيادة راس المال والا والنسب كل يوم واللا والسهم ما شاء الله مطامر
قالت - شوف يابو هاجوس اذا وصل السهم 450 بيع وفعلا بعت ودبلت راس مالها
وبعدها - قالت ادخل بسرعة في القصيم الزراعية بحوالي 350 وتقريبا هي كسبانة الى الان 30 ريال وتقول البيع على 450
بصراحة اكتشفت ان ام عيالي هامورة بصحيح وانا ياغافل لك الله دخلت التصنيع وتوطاني المضارب ب 960 والى الان خسران برغم وجود عقلية اقتصادية معي في البيت وبصراحة صرت اخذ منها توصيات واقول للربع وكلها ناجحة اخرها الشرقية الزراعية وانا الى الان ما طاوعتني نفسي اخذ بكلامها

ابو هاجوس


"" تراني ناقلتها "
08-12-1426 هـ, 01:55 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
هذي مشكلة بعض الرجال يحسون انهم هم بس الفاهمين بكل شي و الحريم خرطي
بالنسبة لي اكثر التوصيات اللي اخذتها من حريم هي اللي ربحتني
08-12-1426 هـ, 05:32 صباحاً
 
وراء كل رجل عظيم امراءه عظيمه
08-12-1426 هـ, 05:40 صباحاً
 
وحليييييييلها والله وطلعت هاموره
08-12-1426 هـ, 07:01 صباحاً
 
مو كل مره تسلم الجره يا ام هاجوس
08-12-1426 هـ, 01:07 مساءً
 


الساعة الآن 06:27 .

تنبيه: كل ما يطرح من مشاركات في موقع عالم حواء يمثل رأي كاتبه فقط ولا يمثل رأي إدارة الموقع.
© 1998-2017 Hawaa Forum, Co.‏