محتاره اعمل ايه

السلام عليكم
ازيكم عاملين ايه انا لسه مشتركه جديده
حبه اخد رايكم فى مشكلتى معلش هطول عليكم شويه
فى بدايه الامر انا سنى 28 سنه انسه اتخطبت ثلاث مرات ومحصلش نصيب اول خطبه كانت عن حب وهو قرر يفك الخطبه قبل الزواج ب 19 يوم فقط ده طبعا عشان اعتراضى على تدخل اهله فى كل التفاصيل المهم اتخطبت تانى عن طريق ناس معرفه واخلصت جدا للشخص ده لانى حبيته مع الوقت وكان بيحصل بنا خلافات طبيعيه زى اى اتنين مخطوبين وجيت فى الفترا الاخيره كل ما اتصل بأهل خطيبى محدش منهم بيبقى عاوز يرد نهائى قولت خلاص انا مش هتصل كتير وهو بيكلمنى بس كلامه قل شويه روحت قررت فى مره على الالحاح ف الاتصال اخته ردت عليا وقالتلى هو قال لينا ان الموضوع انتهى مع العلم انى كنتةخرجه قبلها بيوم واحد معاه اتصدمت اووووى وبعد وقت كلم اختى وقالها انه بيحبنى وعاوز نقعد نتكلم مع بعض طبعا اخدت وقت لحد ما وفقت اتكلم معاه طبعا انتو عارفين احنا فى مجتمع البنت لازم تتجوز عشان الناس وبنات العيله كلهم اتجوزوا المهم رجعنا لبعض تانى بس اهله مكنوش فى الصوره وفهمنى انهم هما اللى رافضين الموضوع وكل ماسئل الدنياةمعاهم ايه يقولى اصبرى طبعا سبته تانى عشان مكنش ينفع من غير اهله
اتخطبت لواحد غيره بس المره دى بهدف انتى حسيت انى فعلا كبرت واحساس انى نفسى ابقى ام وعندى بيت مستقل غير ان امى هى كل حياتى وامى بقت تتعب كتير خايفه اكون وحيده وهى عوزة تفرح بيا
الشخص ده اصغر منى بسنتين معايا ف الشغل بس عمرى ماحسيت ان ف مشاعر من ناحيته لان سنه اصغر وشكله اصغر منى فى البدايه كنت رافضه الناس اللى معايا ف الشغل اعدوا يشجعونى عليه اتخطبت ليه بس اطباعه غيرى بتعامل معاه على اساس عريس وخلاص برغم انه عاوز يرضينى باى شكل بس جيت فى الاخر مبقتش قدره اتكلم معاه نهائى وبتهرب منه وسبته ورجعت اكلم خطيبى المزبزب تانى وخطيبى اللى مش بحبه ده عاوز يعمل اى حاجه عشان ارجعله تانى
ولما قولت للمزبزب قالى اوعى توفقى انا هتكلم عندك ف البيت قولتله الاول اهلك قالى اوك ومن ساعتها كل يوم يقولى هيتكلموا بكره بكره زهقت وكرهت فكره الجواز بس ف نفس اللحظه خايفه اكون لوحدى ....
ارجع للشخص اللى مش بحبه ولا اخلينى مع الشخص اللى مش حسه بثقه كافيه ناحيته ولا اعد كدا ... ملحوظه انا اتخطبت ثلاث مرات وخايفه جدا من كلام الناس لو عرفوا ان سبت خطيبى الاخير
اسفه للاطاله .. ياريت حلول مش انتقادات