صار لي موقف شخصي فيدوني فيه

السلام عليكم ورحمة الله وبركاته
بنات انا اشتغل في مكان حكومي مختلط وعندنا كل الجهات الحكومية مختلطة عادي يعني يسودها الاحترام.انا عمري 31 سنة
المهم في يوم كلمني موظف بالعمل وهو عنده رقمي لانه هو تبع شؤون الموظفين قالي انا اريد اخطبك لولد اخوي فبصراحة انا اتفاجات وماعرفت ارد عليك فقلت له برد عليك وقت اخر فلقيته رسل لي صور ابن اخوه وبصراحة قلبي ارتاح له وخليت امي تشوف الصورة وكلمتها قالت لي لايق عليك فلما سالتها ايش ارد عليه قالت قوليله اعطيني اسمه بالكامل اخواني يسألو عنه واذا تريدي تشوفيه بعدها شوفيه قلت لامي طيب وفعلا رديت عليه بهالرد وقالي بس احنا بعصر مختلف ويمكن مايعجبك او انت ماتعجبيه يعني يقصد اشوفه بمكان عام ونتكلم خمس دقائق او كذا..
بصراحة حسيت جملته انت ماتعجبيه كجرح فقلت له كيف تكلمني عنه قبل لاتقوله هو عني لانه بالعادة الرجل هو اللي يخطب والبنت اللي ترفض او تقبل..
وانا لاشعوريا كتبت له الله يوفقه ويوفقك في البحث له بس انا ما انفع له لانه قلقلت عن يكون ولد اخوه اصلا يكون ماشافني واتعرض للاحراج فهو كتب لي شكرا جزيلا وانتهى الموضوع فهل انا غلطانة ؟
ما اكذب عليكم يابنات صعبت علي نفسي ماعرف ليش مالي حظ بموضوع الزواج تمنيت حد يتمسك بي ويقول اريدك انت لانه الحمدالله ماناقصني شئ والعمر بيمضي..