الا كل ام صفر بالتربيه

السلام عليكم ورحمة الله وبركاته
كلامي لبعض الامهات اللي مربيه عيالها على الفتنه ونقل الكلام
الفتنه اشد من القتل وراح تنعكس عليك وعلى عيالك وش ذنب الاطفال بخباثة عقلك


والله ربي راح يحاسبك على تربيتك السوداء وراح تشوفي شر اعمالك بالدنيا قبل الاخره وتشوفيها بابتعاد الناس عن اطفالك وسيرتهم بكل لسان
اكثر المشاكل اللي تصير بالقيل والقال ونقل الكلام وتشتت الاسر 90٪‏ من هالافعال السوداء اللي تطلع من ناقصات التربيه


زوجة اخوي الله يصلحها لها بنت الناس تتجنبها مو شقاوه ولعب اطفال ابد بسم الله عليها عقلها اكبر من عمرها ماشاءالله وتموت بشي اسمه نقل هرج وفتنه صحيح امها عودتها شيء وندمت عليه بس الحين تسوي المستحيل عشان تشيل الصفه السيئه اللي اكتسبتها منها
لاتقلون لاتظلمين زوجة اخوك في اطفال طبعهم كذا لا مافي شي ينتج من العدم الاطفال مولودين بصفحه بيضاء نظيفه
البنت تنزلها عندنا او ترسلها لشقة اخوي الثاني واذا رجعت تسألها والبنت تجاوب الحين البنت ماتخلي ولاكلمه امها قلتها عن اي احد سوا من الاقارب او الناس الا تروح البنت لشخص وتقوله وش قالت امها والمشكله ان الكلام اللي تنقله البنت يكون سر بين امها وحرمه وكلام كبير وفيه خراب بيوت
حنا عماتها حاولنا المستحيل ندقمها ونكسحها ونعاقبها مانعطيها تعزيز اذا نقلت وش قالت امها
لانها بسم الله عليها تنزل وتقول امي قالت عنكم
المهم عندنا صارت ماتنقل
بس صارت بزوجات اخواني وخوالها وخوال امها يتفرقون تجلس بين الحريم ولا تسجل ماشاءالله الا كلام امها
واذا نزلت عندنا ماتلعب بس تراقب ياقلبي عليها حتى اللعب وشقاوة الطفوله ماتعرفها وراسها يلف مع الشخص اللي يتكلم والمشكله ان امها اذا سألتها وجاوبت البنت تدق علينا وتقول وراه قلتوا كذا وسويتوا كذا
وسويت المستحيل اعدل سلوكها هذي بنت اخوي ولا ارضى احد يتكلم عنها ويكرها كل مارحت العزيم يتكلمون عنها والله اموووووت قهر ولا ارضى تكبر وتصير نسخه من امها الله يهديها الحين مالها احد تزوره خوالها قاطعوها ورجعت بس يتعاملون معها بحذر اقاربي من حوالي واعمامي قاطعوها زوجات اخواني قاطعوها صديقاتها صاروا ينفرون منها
صحيح هي بنت الناس بس يهمنا سمعتها يكفي مرت اخونا وام عيال اخونا وتهمنا اكثر من غيرها
ولا بقا لها الا حنا ياحمولتها قالت امي ان شاءالله درس لها وراح تتعدل وسبحان الله صارت تفرق بيننا يالاخوات وكبرت السالفه والحين منحجره بيتها ماتطلع ولا تدخل وقلت لها اول كنا خوات بس الحين انتي مرت اخو فقط لنا حنا يالبنات بس امي مازلتي انتي بنتها وحاولي تكسبيها وتكسبين علاقتك مع كل احد ابعد عنك وتحافظين على السمعه الزينه وتنسحين السمعه القديمه وانبسطت انها تفهمت وبت تزين على قتها مع الخلق وانبسطنا ونسينا افعالها واستقبلناها وسبحان الله يافرحه ماتمت رجعت اخس من قبل وانا انحبطت
بس الحين بنتها تدرس قبل مانخليها تتكلم تنقل كلام الحين البنت صارت تنقل كلام بحيل ذكيه ياتلعب وتتكلم مع نفسها او تقوله لبزران ينقلونه لنا
ابوها مانقول له شيء بس وحده من الاقارب دقت واشتكت له وارسلت لها محادثات مصوره
على طول دخل علينا وزعلان ويتشره على امي وعلينا يقول ليش ماتقلون لي افعالها ليش ادري من الناس وهذي مو اول مره قلنا له مانبي مشاكل وزعل عليها وهلها تعتذر لكل من اخطت عليه


الحين انعكست الايه على امها وذاقت ردا تربيتها
مراح نقول ماتهمنا لا تهمنا بنت اخونا


العبره لكم يالامهات يالي تعودون بناتكم نقل الكلام
اقول لك الضحيه بناتكم مو حرام الكل يتجنبهن وينفرون منهن مو حرام يتعودون صفه في القراءن مذمومه وصفها عز وجل بايات كثيره ولها حرمتها
خافوا الله في البذور اللي تنتجونها والله حرام ومسؤلين عنها يوم القيامه وراح تحاسبين عليها ومن غير عذاب الدنيا ونفور الناس
لاطفال لادخلونهم في مشاكلكم وتفهاتكم خلوهم بعيدين عنكم كونوا لهم بيئه نظيفه واخلاق حسنه
والله حرااااااااااام مالهم اي ذنب قهرررررررر شيء يغث


واللي عندها حل او طريقه جديده ننصح زوجة اخوي ونحافظ على سمعتها بين الناس لاتقصرون معي الله يجزاكم خير ولكم الاجر ودعوه بطهر غيب
يهمنا امرها ومهما كان هذي اخت لنا صحيح قلت لها انتي بنت الناس قلت لها من حرتي على وضعهاواللي تدعي لها ربي يهديها الله يجزها خير