السلام عليكم بنوتات حواء اول شي مالي ب المقدمات الطويلة بنوتات انا كنت ساكنه عند اهلي 4سنوات بحكم الدراسه اهلي بمنطقه غير منطقة زوجي ف ولا رمضان أفطر فيها زوجي عندي كان يجي عند اهلي يعني خواتي وامي هم اللي يظبطون الفطور السنه هذه انا سكنت ب منطقة زوجي ساكنه فوق اهل زوجي رمضان هذه راح تكون طريقة الفطور انا عندي زوجة اخو زوجي يعني طريقتنا راح تكون خالتي اللي هي ام زوجي الفطور بيكون عندها طول الشهر رمضان لاكن احنا ي حريم عيالها راح نسوي فوق كم طبق وننزله ع الفطور ف الله يسعدكم ويجزاكم خير الجزاء الله يحقق امنيات اللي تفديني ويرزقها من حيث لاتحتسب وربي إنّو م راح أنساها من دعواتي ابي طرق حلى مع الطريقه والمقادير م أبيكم تقولون ادخلي ع القسم مليان من الاطباق انا فيني طبيعه م احفظ وأتقن الطبق الا بعد م تقوله لي وحده اعرفها يعني لان بعض اللي ينزلو الاطباق شرحهم مطول وإلا تفهمين منه وثانيا شي انا المعجنات خير شر م اعرف اسويهم والقيمات كمان م اعرف😢😥😥وإلا السمبوسه أشك أني ولد😥😢😭 تكفون بنات لاتبخلو علي اكتبو كل طبق مع طريقته ومقاديره والله ك أنساكم من دعواتي اللي ترد علي انا بروح الأسبوع الجاي أمكن وربي اللي بتفيدني ل ادعي لها بظهر الغيب واهم شي انا عندي فوبيا من الفرن اللي تحت اختلاف حييييل منه وإلا مره شغلته ف هل يمكنني استغني عنه ب المكرويف مثلا اذا جئت بصح حلا او معجنات اقدر استغني عن الفرن اللي تحت ب المكرويف وإلا لا وابي اسماء الاَلات لسمبوسه والقيمات الله يسعدكم قسم ب الله مابي اتفشل عند ام زوجي وسلفتي خصوصا ام زوجي مشاءللله عليها طباخه درجه اولا هي وسلفتي يبدعون ب الأكلات تكفون أنقذوني مابي أكون أرداهم قولو لي أصناف تصلح ع السحور ولا الفطور الله يجزاكم الجنه ادري طولت عليكم وكلامي متناقض لاكن اللي فهمت علي وساعدتني يارب يكربم تشرح صدرها وتفرج همها وتزيل غمه ي قادر ي كريم

الكيبورد يكتب اسيا كنها طلاسم م انتبه لها الا بعد م انزل الموضوع انا كاتبه أني بروح لمكه الأسبوع الجاي وكاتبه اخاف من الفرن التحتي هذه الكلمات اللي معكوسين
شوفي بكتب لك طرق حلويات اللي في بالي و اي مساعده او شيء مافهمتيه تعالي خاص لأني مارجع للمواضيع
حلا السنكرس (ممكن بداله مارس او جلكسي او اي شوكلاته تحبينها )
الطبقه الاولى كيك ساريتا قطعيه ورصيه بالصينيه
الطبقه الثانيه حطي بالخلاط ( علبة قشطه و ظرفين دريم ويب و 6 حبات كيري و نص علبة حليب نستله ) اخلطيها و حطيها على الكيك و بالثلاجة لين تجمد
الطبقه الثالثه حطي بقدر الشوكلاته حسب حجم الصينيه حقتك مثلا للصغيره حطي 4 و خليها لحد تذوب بس انتبهي لها زين خليك عندها ثم اخلطي معها عبة قشطه و حطيها فوق الطبقه الثانيه و برديها و بالعافيه ( سويه الليل افضل عشان يجمد كويس )


الحلى الثاني
خذي بف باستري و قصصيه الى قطعتين سواء مثلثات او مستطيلات ثم احشيها جبن كيري او لو تحبين قطعة شوكلاته او حبيبات هرشي ثم قفليها اطبقي الجهه الاولى ع الثانيه و سكريها زين عشان ماتنتفتح و ادهنيه ببيض و حطيه بالفرن و تكونين مشغلته من قبل لحد تتحمر من تحت ثم حمريها من فوق و بس سقيها شيره ( اذا حشيتيها شوكلاته لاتحطين شيره )


الحلى الثالث
اطحني بسكوت شاي طحن ناعم و حطي معه ملعقه سكر مطحون و شوي قشطه و اعجنيه و رصيه بطاوة
بعدين خذي كوب سكر و خليه ع النار لحد مايذوب تماما و يصير لونه بني فاتح ثم حطي علبة قشطه و حركي بسرررررعه لحد يصير عندك توفي حطيه ع البسكوت و رشي فستق مطحون و بالعافيه ( برديه زين )


الحلى الرابع
اطحني بسكوت شاي و اعجنيه بملعقه زبده فول سوداني و شوي قشطه و رصيه بطاوة
اخلطي بالخلاط ( قشطه و دريم ويب و كيري و نستله ) و حطيها فوقه و برديه زين ( زينيه بشوكلاته هرشي السائله او مكسرات )


الحلى الخامس
ذوبي جالكسي ساده و حطيه بقوالب السيلكون او اكواب بلاستيك صغيره ( البنيه حقت القهوه ) حطي شوي مو كثير طبعا و لو خليتيه يعطي الاطراف افضل
احمسي شعيريه باكستانيه مكسره ناعم لحد تتحمر شوي ( مع شوووي زيت ) و اعجنيها بحليب نستله و حطيها فوق الجلكسي رصيها بيدك زين
اخر شيء جيبي اوريو و حطيه في قدر ع النار و عليه حليب سايل و حركيه لين يصير عجينه و حطيه فوق الشعيريه و برديها في الثلاجه و بعدين كسري الاكواب و طلعي الحلى و حطيها بالورق حق الحلى


الموالح
كيكة الخضار
بالخلاط حطي ( 3 بيض + نص كوب زيت + علبة زبادي + ملعقة بكنج باودر + 10 ملاعق دقيق + ملح) اخلطيها كويس و بعدين تكونين مقطعه (فلفل زيتون جزر مبشور كوسه مبشوره ) و حطي الخليط عليها و حطيها بطاوة مدهونه و قطعي فوقها جبن كيري او جبن مالح و حطيها بالفرن و تكونين محميته من اول لحد تنجح ( اذا دختي سكين بالكيكة و طلعت ناشفه مافيها عجين معناته نجحت ) و حمريها من فوق و بالعافيه
العجينه
سهله مره 10 دقايق و تجهز
بالخلاط ( كوب مويه دافيه و موب دقيق و 3 ملاعق حليب و شوي سكر و شوي ملح و ملعقة خميره فوريه و ملعقة بكنج باودر و فنجال شاي زيت ) اخلطيها 7 دقايق بالضبط
ثم حطيها على كوبين دقيق و اعجنيها زين و خليها ترتاح 10 دقايق و ابدي سويها
العجينه تنفع للخليه او الفطاير او الكوروسان او فطاير الشوايه
الخليه قطعي قطع صغار من العجينه احشيها جبن كيري و رصيها بطاوة لحد ماتتعبى و ادهنيها ببيض و حمريها من تحت و فوق و اسقيها شيره
الفطاير عاد صعب اقول كيف تسوينها لأن حسب الشمل اللي تحبينه ممكن بالالات الجاهزه ( الحشوات ممكن جبنة قليله الملح و نعناع او جبن و زعتر او دجاج و خضار )
الكوروسان افردي قطعه كبيره من العجينه و حطي عليها غطا قدر مثلا و قصيها تصير دائره ثم قطعيها 8 قطع ( تصير مثلثات ) و حطي بالطرف جبن كيري او اي شي ودك فيه و لفيها زي الرول و ادهنيها ببيض و ع الفرن
فطائر الشوايه سهله مررره
شفتي حماصة التوست او الشوايه نسويها فيها
سخنيها زين و ادهنيها بشري زيت
قطعي العجينه كور متساويه حجمها وسط و حطيها ع الشوايه بس خلي مسافات بينها عشان ماتلزق ببعض
و قفلي الشوايه عليه تتحمر من فوق و تحت ماتطول و طلعيها
اذا بردت افتحيها من الجنب و احشيها


هذا اللي قدرت عليه
اقتباس مشاركة
يعمري انتي م قصرتي ميموشا الله يجزاك خير الجزاء الله يحقق لك كل م تتمنين جعل يدك م تمسه النار يعمري كفيتي وفيتي كريمته ي بنت الكرم اللله يوفقك وماراح إنساك من دعواتي باْذن الله باْذن الله اطبق كل هذولا انا مشاركتي اقل من50ف ما اقدر أرسل خاص
عندي حلا من راسي طبقه بسكويت شاهي مشرب بحليب وطبقه ثانيه بخلاط كاس دريم ويب وكرامل كراميل و حليبنستله وقشطه وطبقه ثالته ترشين عليهاسميد محموس
اذا ذكرت شيء رجعت لك


الساعة الآن 03:35 .