كل عام وانتوا بخير
عش البلبل اكله اشتهرت بيها مدينة حماه السورية وهي من الاكلات التراثيه وبتختلف عن الصفيحه لإن عش البلبل اصغر في الحجم وعجينته مورقه فانا عملته بعجينة الشعيبيات
مكونات العجينه:
كيلو دقيق
3 كوب زبده طرية
ماء للعجن
مكونات الحشو:
نصف كيلو لحمه مفرومه
بصله متوسطه مفرومه ناعم
2 ملعقة كبيره صلصة طماطم
2 ملعقة صغيره دبس رمان
ملعقة صغيره بابريكيا
ملعقة صغيره ملح
ربع ملعقه صغيره فلفل اسود
ربع ملعقه صغيره شطه
ملعقه صغيره بهارات لحمه
ملعقة صغيره كسبره ناشفه
الطريقة:
اول حاجة هنجهز العجينه
في اناء هنحط الدقيق وعليه كوباية زبده من الكميه اللي عندنا
ونقلبهم كويس لغاية مايمتزجوا
ونضيفلهم مية العجن بالتدريج
ونبدأ نعجن لغاية مايبقى عندنا عجينة طرية وناعمة
ونقسم العجينة لتلات قطع متساوية
وكل قطعة من التلاته دول هنقسمهم قطع متوسطة فى الحجم ومتساوية
وهناخد القطع دى نقلبها فى سمنة سايحة او زبدة
ونرصهم جنب بعض ونسيب العجينة ترتاح لمدة نص ساعة عشان فردها يبقى سهل
وبعد ماترتاح العجينة نفرد كل قطعة وندهنها كمية كافية من كوبايتين الزبدة اللى فضلوا من التلاته اللى مكتوبين فى المكونات
ونطبقها
ونعمل كده مع بقية القطع ونرصهم فوق بعض
ونحطهم فى التلاجة لمدة متقلش عن نص ساعة ولما نطلعهم ناخد كل قطعة نطبقها
تااااااااااااااااااابعوني
هكمل المشاركه الجايه
ونبرمها
ونعمل كده مع بقية قطع العجينة ونحطهم جنب بعض فى صينية ودى اخر مرحلة
وهنحطهم فى التلاجة لمدة متقلش عن ساعة بس انا حطتهم ساعتين عشان الجو عندى حار شوية وقبل مانطلعهم من التلاجة هنجهز حشوة اللحمه هنحط كل المكونات مع بعض
ونقلبهم مع بعض كويس
والمفروض ان اللحمه بتتحط نيه على العجينه بس انا شوحتها على النار حاجة بسيطه
ونسيبها تبرد وناخد كل قطعه من العجينه اللي برمناها
ونضغط عليها بإيدينا هتبقى على شكل دايره
ونضغط اكتر على الجزء اللي في النص
ونحط فيها الحشو
ونعمل كده مع بقية العجينه ونرصهم في الصينية
وندخله فرن متوسط الحراره ومسخنينه قبلها بربع ساعه ونطلعه لما يستوي ولونه يحمر وبيتاكل معاه سلطة زبادي بالخيار
وده شكله النهائي
وبالهنا والشفا