صدق العيال ما يعذرون!!!

سبب هالموضوع بكتبه في الأخير عشان تفهمون القصة











كنت بنت وصرت أم وفهمت كثييير من تصرفات أمي وأبوي

فهمت ليش يمنعنا من هالشي فهت ليه أمي تعصب علينا إذا ما طعناها في حاجة وإن هالحاجة ميب مصلحتنا بس ما تفصل لنا عشان ما نقلق عرفت ليه تقسو علي عشان أذاكار

فهمت ليه الأسرة الفلانية يمنعونا نزورهم




فهمت أشياء كثييير واكتشفت ان العيال ما يعذرن تدرون أيش يدور في ذهن بعض الأبناء يقولون في قلوبهم وإن ما صرحوا به




أحيانًا يكون كل حيل الأم وطاقتها انتهت مع هذا الزوج فتطلب الطلاق يكبرون يقولون ضيعتنا

لو صبرت وتحملت وكبروا قالوا ما أحد قالك تصبرين

إذا ترملت وتبي تتزوج قالوا ما كأنك أم ما ترحمين

إذا تعبت منهم ومن مراعاتهم ومجاملتهم وقست عليهم باللسان أو اليد قالوا ما كأنها أم يا حظ فلانة بأمها

إذا تمشكلت مع خوات زوجها قالوا تكره عمانا تبي تفرق أبوي عن أهله

وكذلك الأب إن طلق الزوجة وخلا عيالها معاها قالوا ضيعنا وإذا أخذهم قالوا حرم أمنا منا

وإذا قتر عليهم في الكصاريف عشان يأمن مستقبلهم قالوا أبوي بخيل يا حظ فلان بأبوه

إذا رد عنها خاطب قالت يأخر زواجي وإذا عجل لها قالت باعني ما احتاط لي يبي يفتك

قليل من الأبناء يصدق إن أبوك ضحي بكثير من أجلك وإن أمك باعت حياتها وطوحاتها من أجلك حتى لو كانت انسانة ناجحة دراسيا أو وظيفيًا توقع أنها كنت تريد أكثر لكن تركت الكثر من أجلك


تصدقون إن ولدي مع أن صغير يحب يروح لواحد من عيال جماعتنا ويحب يلعب معهم وأنا أخاف عليه منهم بيتهم ما يريح وهو يبكي ويسبني أفكر إذا كبر ما راح يصدق إني كنت أبي مصلحته







اكتشفت إن كل يوم خاصمتني أمي فيه لما تركت الوظيفه كان منطقي عكس ما فكرت وإني كنت مخطأة فعلا ولكن لأني بنت وانظر بهذي المرآه إن الأم كل شيء في الحياة ولازم ترحمني وتداري وتراعي ولو قست فهي تكرهي ما كنت أصدقها




كل اللي قلته لكم يدورفي نفوس العيال وإن ما صرحوا فإذا جاتك بنت تشكي من أمها أبوها لا تزيدين عليها وتخلينها تسيء الظن بهم ما تدرين عن نيتهم الطيبة اللي يضمروننها لهذي البنت




كل ما زعلت من شيء وجيت بهاوش ولدي تذكرت أمي في مثل هالموقف كانت أرحم

اكتشفت أن أبوي كان رحيم وأمي تفيض حنان وإن اللي سووه لي من الخير هو كل سعتهم وطاقتهم وإني كنت عائق له







سبب المضوع من زمان أفكر فيه هالشي حتى شفت امرأة اطلقت وعندها بنتين مراهقات كل ماجاها خاطب صارت مناحة يرفضون وهي تقول بتزوج أجيب لكم أخوان وخوات و....

ومجرد ما انخطبوا تزوجوا وهي بقت مع أخوها وقليل يزورونها لسان حالهم ما أحد قالك ترحمينا !!!!!