زعلت مع زوجي .. وانا الحين في بيت اهلي

بنات والله ضايق صدري تخيلوا اليوم من فجر الله صاحيه مع زوجي ومصلحه له الفطور ومودعته للدوام بنفس رضيه وابتسامه .. وقبل لا يرجع الظهر تفاجأت بإتصاله انه جاي وجايب معه 2 من اخوياه ، لازم القهوه تكون جاهزه .. واقوم واطيح ركككض اغسل الحمام الله يكرمكم وامسح السيراميك وابخر واسوي القهوه والشاي واشغل المكيفات واجهز كللل شيء .. طبعاً غداي جاهز ومطفيه عنه ، لما جاء وخلصوا من القهوه قال حطي الغداء انا مسويه نص دجاجه والرز يادوب بيالتين ماتكككككفي !!! قال طيب بسرعه اطلبي من المطعم واطلب لهم وامي الله يخليها لي هي اللي دفعت عنه لأنه طفرااان مامعه ريال .. الزبده بعد مامشوا الرجال كلمته بهدوء قلت له ابي اطلع مع صديقاتي للمنتزه واني من زمان ماشفتهم وكذا مررره رفض وقال اعذريني صديقاتك لا .. وين تبين انا اوديك بس صديقات اسمحي لي ! المهم بعد الحاح مني قال ( خلاص روحي ) قلت طيب وصلني قال ماني موصلك انا مشغول مع ابوي ومدري وش قلت بتصل على ابوك استأذنه نص ساعه توصلني .. كان متكي قام وعدل جلسته وتربع وطيّر عيونه فيني قال لا ترفعين ضغطي المهم آمنت بالله ورحت لبيت اهلي "اهلي في نفس الحاره اللي انا فيها" رحت هناك وتعرفون جمعة البنات لازم تطلع وحده وتأجل لك الطلعه كلها عشان سبب تافه ! وحده من البنات كاتبه ما اقدر اطلع معكم لأن خالتي جتني ومدري ايش خلوها وقت ثاني وتكنسلت الطلعه ولما انا قلت لهم ان زوجي رافض اطلع معكم كانوا يقولون تحايليه وجيبيه بالكلام الزين تكفييين حاولي تقنعينه وووالخ! .. الزبده طلعت مع امي وخواتي لمنتزه قريب وجوالي كان صامت "زوجي يحسب اني مع البنات ومطنشته" اول مابسطنا الفرشه وجلسنا طلعت جوالي من الشنطه الا هو يتصل رديت عليه .. قلت نعم ؟ قال لعنه .. وسكر بوجهي ! امي كانت جالسه وشايفه اللي صار انا من الصدمه جلست ابكي زي البزر وامي وخواتي يسكتوني .. دقت امي عليه وقالت له وش هالاسلوب ؟ هي ماسوت شيء غلط .. قال انا ما احب دلع الحريم واذا هي زعلانه تضرب راسها بالجدار !!!
ويقول لأخوي الكبير اني طالعه بدون استأذان حسبي الله ونعم الوكيل عليه وغير كذا قذف صديقاتي يقول طالعه مع قحـ...!!! وهو مايعرفهن ولا يدري من بناته

انا حالياً في بيت اهلي ، وامي تقول بتصل على ابوه يجي بكره للقهوه ونعلمه بسوالف ولده "للعلم ابوه يصير خآل امي"
وانا ماودي انها تعلمه صراحه
انتم وش رايكم ؟
شوروا علي وش اسوي مع هالآدمي الكذاب الشكاك
لاحول ولا قوة الا بالله
حسبي الله ، وكفى بالله حسيبا