Analysis Services
بسم الله الرحمن الرحيم نبدا
ايطاليا
اول شي التخطيط للرحلة كان قبل بكم شهر كانت النية اطلع فيزه لسويسرا لكن كان عندهم زحمة قالوا لنا الفيزة تطلع بعد اربعين يوم ...وش الفايدة لاقضت الاجازه..غيرنا طلعناها من ايطاليا ..عشر ايام وطلعت حجزنا طيران على الخطوط السعودية لانها الوحيدة الدايركت من الرياض المطار ميلان الفيزة مطلوب صور وبطاقة العائلة واقرار من جهة العمل للراعي الرسمي للرحلة وكشف حساب بال٦ شهور الاخيره استعنا بمكتب يستخرجها لنا جنب المركز الموحد للفيز اخذ علينا شخصين ٩٥٠ تقريبا ...بس الله يهدية يوم جاء موعدنا اثاري الاوراق ناقصة ..قلنا للموظفة نكملها ونجي بكرا رفضت قالت لا موعدكم اليوم كملوها واحجزوا رقم من جديد تخيلوا من ١٠ الصباح رحنا ماطلعنا الا الساعه ٥ تقريبا بصمنا وكملنا اوراقنا ولله الحمد قالت ١٠ ايام عمل ان شاء الله وتطلع رحنا حجزنا طيران مهب غالي الشخص تقريبا ٢٨٠٠ ذهاب وعوده على المانيا ميونخ ...مرافقي بالرحله الله يصلحة يافية برود عجيب ..خططنا اننا بعد مانطلع من ايطاليا نريح يوم بزيلامسي ومن بكرا نروح لميونخ الطريق ساعتين بالقطار نحجز سياره ونكمل الرحلة ...الرخصة الاخ العزيز ماطلعها الا نفس يوم السفره المغرب راح المحل يطلعها له ...قال ياقلبي عمرك اقل من ٢٥ ماياجرونك سيارة والا تدفع غرامه يومية...خلاص طبعا استخرنا الله عن السياره قلنا نقضيها قطارات وتكاسي ..المشكله انا مكثرة المدن حجزت ب ٥ فنادق يعني ٥ مدن لو دارين ان مامعنا سيارة كان كنسلنا سويسرا واقتصرنا على زيلامسي وماحولها وميونخ..المهم اكمل معكم الرحلة ...بما ان الفيزه على ايطاليا جلسنا نبحث عن المناطق الجميلة بايطاليا انا من زمان نفسي في البندقية وميلان قررت اروح البحيرة كومو في ميلان قريبة من المطار ٤٠ دقيقة اقرب من ساحة الدومو فضلتها على الدومو صورها باليوتيوب خرافة ومسوي واحد لها دعاية ححزت فيها فندق يومين على اساس لاصبحنا ناخذ عربية الرحلات ونجلس عند البحيره ونتمشى بالاسواق والاماكن القريبة بس ليس كل مايريد المرء يدركة...هذاك المثل تعرفونه المهم نزلنا مطار ميلان الصباح اخذنا شناطنا ويالله على بحيرة كومو...يالله يااناقة الناس عند البحيرة تجي باصات كثيرة وقطارات ينزلون بنات وشيبان وعجز عليهم انا قة عجيبة شناطهم احذيتهم وانتم بكرامه فساتينهم جاكياتهم انااااقة وفخامة عجيبة ماشاء الله.صدق لاقالوا ميلان منطلق الاناقة...المهم ونسال عن فندقنا قالوا وين مهب هنا بقرية بعيدد عن هنا اقل شي يودونكم ب ٣٠٠ ريال😲 يالطيف وش ..لييييش...حسبي الله عليك يالبوكنق ...اثاري كومو عندهم عدة مناطق يمكن عشر كوموات.. منطثتنا بعيدة عن البحيرررره تقريبا ساعه ...المهم تغدينا واخذنا باص ورى باص ومنطقة ورى منطقة وبالاخير تكسي ودانا الشقتنا....يمة المنطقة هادية مرررره كنها ديرتنا بالقصيم تكرم ديرتنا عنها...وهاالاجراس حقت الكنايس اخوت روسنا.. وصلنا شقتنا بيت قديم فيه حوش كبير ودرجة نطلع منها الغرفتنا انا خفت راعي التكسي خانقنا قال ذس نوت اوتيل ذس هاوووس ...ياهاوس البلا وش اللي جابنا الذا الهاوس ..المهم قلت له تكفى يالنشمي حول معنا ..ياانا قامطة ام العافية ...ماقصر الاجودي نزل وناظر لنا الطريق واخذ قريشاته وودعنا ...المهم ويطلع لنا ولد يمكن ابو ١٦ ابيض احمر كبر محمد علي كلاي اربع مرات..قعد يرطن مع اخوي ..انا معي لغة ولله الحمد بس لاحكوا بسرعة ماافهم لهم .قلت وش يقول لك قال يقول.. امي مهب فيه بس كان تبون وسكي لاتشترون من البقالة امي تعطيكم ..ياقلبي...لالا،. انا بغى يغمى علي..وتجيني ام الركب....يازينك ياديرتي هونت ابي ارجع ماابي اسافر...قلت لاخوي يمة يخوفون احس انخنقت وخايفة ماابي اجلس هنا ..خل نطلع نتمشى ..احس بالامان اكثر هدووووء مخيف بالمكان 😭
14-01-1439 هـ, 07:32 صباحاً
 

3.80

عدد التقييمات: 5
5
40%
4
40%
3
2
1
20%
ايش لبستي نقاب وعباية او شوستايلك
14-01-1439 هـ, 07:48 صباحاً
 
ايه انا منقبه بس مالبست اسود لبست العباية البالطو بيج وحجاب ملون ونقاب
14-01-1439 هـ, 08:00 صباحاً
 
طلعنا نتمشى ... هدوء مافية احد يمشي ابد يازينك يابحيرة كومو كانت زحمة وازعاج . المهم سالنا واحد يمشي نبي مطعم فطسنا جوع من الخوف قال هناك مطعم اسالوه ..وصلنا المطعم دخلنا فيه قلنا حلال قال لا مافيه هنا حلال ..هو ايطالي بس يتكلم انجليزي...اناظر طاولاته كلها جرات اللي مانيب قايله على الطاولات كل وحدتن اكبر من الثانية انا قامطة ..ام الخوف بس ماابي اللي معي يحس ..المهم نمشي حصلنا بقالة مافيها شي يسوى شرينا شوكولاطات واشياء مهمه يوم جت الساعه ٥ خلاص هدوء عجيب مافيه الا انا واخوي رجعنا الشقتنا اطل مع الشباك على الحوش ...دلقس ..ظلماء ماتشوفين شي واهل البيت مالهم حس واللي معي نام الشقة دورين درجة بالزاوية صغيره تطلعين معها مكان صغير يالله يكفي السرير وتحت سرير كبير ..اللي معي طب بالسرير الي فوق ..وهات لك احلا نومه عقب ارهاق السفر والمطار ..وانا ماغير اناظر بهالغرفة يمين ويسار تلفزيونهم ووع قنوات ماتناسبنا ..ياربية وش ذا قوارير اللي انتم خابرين مكتوب عليهن مادري كم يورو..وتجيني ام الركب مرة ثانية..ماامداها راحت الا ورجعت ..واقوم اخوي قلت وش هذي ..قال وسكي شراب وشي يعني ...اشربي منه اغديك تدوخين وتنامين.. طااااخ ويرجع ينام ....يممممه وش ذا الوسكي بكل مكان ..الله يستر وتجيك الهواجيس..وان دخلوا الحين علينا سكارى والله لو اصارخ الى الصبح ماحولي احد ..بهالبيت ..قلت قم ابسالك ماتتوقع ولدهم الهايمة الايمة الكبريش يشرب ..ماتخاف يطق علينا..قال لا ولدهم صغير مايسمحون له يشرب اهله لاصار عمره ١٨ يصير حر يسوي اللي يبي..قلت طيب وين ابوهم ..قال شكل المرة مطلقة وهي اللي تكد على البيت.. ياقلبي اشوا انها مطلقة والا كان علومي علوم ....اشوا بديت اهدا...وكمل نومته اخينا بالله ..بس هالمره ماخفت حسيت انه عادي ماعلي الا العافيه قلت يالله بقرا قران اغدين اهدا وانام ..وهذي اول ليلة لنا بايطاليا💕
14-01-1439 هـ, 08:01 صباحاً
 
ليله لاتنسى

نتمنى المزيد من تقرير السفره مع الصور
14-01-1439 هـ, 08:26 صباحاً
 


الساعة الآن 11:16 .

تنبيه: كل ما يطرح من مشاركات في موقع عالم حواء يمثل رأي كاتبه فقط ولا يمثل رأي إدارة الموقع.
© 1998-2017 Hawaa Forum, Co.‏