في حق الكوش محل اسمه بوكيه>>بالصالحية
شغله روووووووعه

السلام عليكم ورحمة الله وبركاته اختي انا بس سويت حفلة للملجة بس ماسويت عرس بس الحفلة كانت كأنها عرس مصغر يعني الصالون اللي سويت عنده كان أكثر من رائع اسمه جلامور اللي في مجمع الشعل يورك واللي سويتلي الميك اب كانت عبير الياسين واللي سوت التسريحة اسمها فاتن وبصراحة طلع شكلي ا كثر من روعة مع ان كان هذا اول تعامل لي معاهم يعني ناس غيرهم كان يمكن سوولي شغل عادي اي كلام لأني ماني زبونة عندهم بس والله بيضوا ويهي الله يبيض وييهم :) وطبعا لا اروح لهم بيوم رحت لصالون ثاني سويت عنده الشغلات العادية شيرة وبيديكير ومنيكيروحمام مغربي اسمه صالون البيادر وسويت الحف والشمع لوجهي عند صالون جنبهم اسمه وردة والأثنين هذول موجودين بالجابرية وفيه بعد صالون ثاني أسوي فيه بديكير ومنيكير روعة وحف وشمع حلو للوجه اسمه صالون يورز مقابل حديقة الشعب . بالنسبة للورد وستايل تقديم الشبكة سويته عند ورود النوير في حولي وعندك بعد زهور الجرة وقالب الكيك كان روعة من خباز اما التصوير فكنت حاطة ايدي على قلبي لآني اتصلت بكذا واحد معروف بس مارضوا لأن كان قبل الحفلة بكم يوم بس والمفروض اخذ موعد قبله بمدة المهم فتحت الوسيط وقلت على الله واخترت مصور بيت العروس واتفقت معاهم على التصوير العادي والفيديو مع عمل انيميشن وحركات للفيديو وحركات للتصوير العادي وسوولي بعد سي دي للقطات معينة اخرتها من ضمن الصور وبعد يابولي قبعات وريش وحركات عشان التصوير بس انا ما حبيت احط القبعات والسوالف اللي يابوها عشان ما اخرب التسريحة بس بعدين تحسفت خصوصا ان الصور طلعت تحفة وايد حلوة ماتوقعت جذيه وكان عندهم استعداد ان المصورة تجيلي للكوافير بس انا ما رضيت لآني حسيت اني تأخرت وطبعا توترت أعصابي وقلت للمصورة خلاص روحي للبيت علطول وبعد ما صورنا في البيت رحنا وصورنا في الفندق بي بصراحة شريط الفيديو اللي سووا فيه الأنيميشن والحركات ما طلع ذاك الزود وهمن الكوشة صج شكلها العام كان مقبول بس الفينيشنج مالها ماكان ذاك الزود بعد لكن السي دي والصور العادية طلعوا تحفة وروعة.