السلام عليكم ورحمة الله وبركاتة
اخباركم بنات
انا بنت كبيرة بالسن عمري38 وماباقي الا كم شهر وادخل 39 ماتزوجت متاخرة ممكن مافيه نصيب لان مافيه احد يتقدم ولااحد يبيني
طبعا ابوي متوفى الله يرحمه وماعندي وظيفة ولا احد يصرف علي.
انا سمينة يعني ومو جميلة اذا رحت اي مكان اشوف من يطقطق علي بالاعراس والجمعات يقولون مو حلوه من يبيها واللي تقول عجوز ذي واللي تقول خايسه واللي تقول لعيالها باقي فلانه وفلانه وفلان بس وحاذفتك من ضمن اللي مااعرسوا ولا اللي بيعرسون!
واللي تجيب لك واحد كبر جدك تقول كفوها من يبيها
واذا رحت اي مكان وشافوا معي بزر على طول يقولون ولدك ذا
واذا رحت مستوصف يتوقعوني عندي اعيال ويسموني خالة!
بالله يابنات مايضيق صدرك وانتي تشوفين كذا يصير لك وناس تستغل فيك وتكرهك بدون سبب
طيب كبيرة شسوي حتى ارضيكم اتزين واتعدل واكون مرتبة بس مايعجبهم شكلي ويضلون يتكلمون
وترا مو انا خالقه نفسي افهموا! ولا انا اللي احدد نصيبي بعد!
انا اذا رحت زواجات مااحد يطالع بي اصلا يتوقعوني متزوجة وعندي اعيال!
حتى يومني كنت نحيفة نفس الكلام ونفس الطقطقه!
بنات العايلة ماشاء الله خلصوا اللي مااعرسوا باقي اقل من القليل واللي انخطبوا هالفترة!
بنات صرت منبوذه ليش لاني مااعرست مااحد يبي يصادقني!
اللي متزوجة تبي متزوجات
والبنات يبون بااعمارهم
وانا جالسة لحالي مااحد يبيني ولااقدر اشارك بمواضيع الزواج ولا الرجال الخ لاني مو مرغوب فيني غير متزوجة
ماعندي صديقات واغلب امور حياتي معطلة ولله الحمد
من فترة اجلست جنبي وحده تسولف وكذا يوم درت اني ماتزوجت اسحبت نفسها وراحت جهة ثانية
الاطفال لاإله الا الله وماشآء الله اللي اخبرهم صغار وبيني وبينهم عشرين سنة اعرسوا وجابوا اطفال الله يهنيهم وانا بكل مكان غمزه ولمزة صرت اكره اكون باي اجتماع
ياكثرهم مايحبوني ولايبوني بمكان معهم!
صرت حتى بالاعراس اجلس مكاني مااتحرك لان اسمع ناس اعرفهم يقولون على ايش تتزين وتسوي تسريحة وكذا من بيطالع بوجهها ولامن يبي هالعجوز!
حتى لو مضطرة اروح الحمام مااروح ماابي اسمع كلام يغثني!
اخوي قال عني كبيره وماااعرست ومو موظفه يعني من يبيها الله يهديه وزوجته ماتطيقني!
صرت اشوف نفسي بالمراية واقول صح كلامهم مو حلوه ولا عندي شيء وكبيرة الصدق مااحد يبيني
حتى الكبار اذا قالوا لهم مواصفاتي قالوا لا ماتصلح لنا!
احس اني ولاشيء الكبار اللي نفسي بيحسون بمعاناتي!
عندنا زواج ومحتارة اروح ولا لا ووش البس ووش اسوي
مدري استغفر الله كل امور الحياة متعسرة!
لاوظيفة لافلوس لازواج لابيت الخ
ماعندي شيء ابدا
ويجيك ناس تقول لي انتي حظك احسن مني وهم متزوجين وعندهم اعيال وفلوس الخ
الله يعين انا مقهوره وافضفض لكم سامحوني
26-04-1439 هـ, 03:01 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
ياقلبي ربي يرزقك باللي يسعدك و يهنيك بعدين اسمحي لي كيف تقولين عن روحك كذا ، ياكثرهم متزوجات و مو موظفات ولا جميلات الشغلة نصيب و اللي ربي كاتبه بيصير مو شرط اللي مو متزوجة لانها مو حلوه ، و بعدين ترى اذا بتراعين المرايه و تقولين كذا اكيد بتصغرين بعيونك ، وبعدين شعرفك يقولون عنك كذا ، انتي مو واثقه بنفسك ولا من يسلم من كلام الناس و لايهمك احد سواء يحبونك ولا لا ، المتينه سبوها و النحيفه ماعجبتهم القصيره ذموها و الطويله طقطقوا عليها، يعني اذا حبيتي شكلك محد بيقدر يتكلم عنك و اذا تكلموا بتكونين معطيتهم طناش لانك واثقه . و ياكثرهم والله حلوات اشوفهم للحين ما تزوجوا ، انتي حاولي تهتمين بشكلك و شوفي اللي يناسبك يعني مو ع الموضة او لا تلبسين لبس صغار بالعمر البسي و اكشي ع عمرك بتطلعين احلى ( و اكشخي لنفسك ) مو عشان انخطب و مدري شلون و اطلبي ربي بالوتر يرزقك ابن الحلال اللي يملي دنيتك و يرزقك الذرية و يمكن تاخير زواجك فيه خيره لك ( رٌّب خيراً لم تنلهٌ كان شراً لو أتاك )
26-04-1439 هـ, 03:14 صباحاً
 
اسأل الله ان يفرج همك ويرزقك من حيث لا تحتسبين
وبالنسبة للزواج برااحتك ان كنتي متحمسه تجهزي بطريقتك المعتاده وروحي واجلسي ولا تقربين من اللي يغثونك ولا عاد تجتمعين بهم اساسا
ومن ناحية الفلوس توظفي بأي وظيفه واذا ماكملتي دراستك كملي بمدرسة الكبيرات او منازل
وسجلي في حافز والظمان كمان يشملك وحساب المواطن ولااا تقبلين ان احد ياخذ صرافتك واذا حصل روحي البنك والغيها وطلعي بطاقه جديده وهكذا الحياة مو واقفه على شي معين
وانصحك بقووه تسجلين بتحفيظ القرآن والله يسهل أمرك
وعلى فكره مو لازم اي وحده تتعرفين عليها تقولي لها انك مو متزوجه لأ أجلي هالمعلومه لحد ماتقوى علاقتك فيها او بلاش تعرف بالمره
وآسفه كثرت حكي والله يفرج لك
26-04-1439 هـ, 03:27 صباحاً
 
الزواج قسمة ونصيب وكل شي بأمر الله سبحانة
لكن تحبسين نفسك عشان الناس وكلامهم طز فيهم وبكلامهم مايرضيهم شي ابدا ولا يملى عينهم شي استانسي وانبسطي واطعلي وروحي للزواج وغيري جو ولاعليك من كلام الناس ولايهمك لان مايرضيهم شي وقوي شخصيتك شوي وخليك واثقة من نفسك والجمال مو أساس الزواج ياما قبيحات ودبب وتزوجوا من احسن الرجال خليك واثقة من نفسك ولاعليك من احد اهم ماعليك نفسك و وناستك
26-04-1439 هـ, 03:28 صباحاً
 
يقولون هالكلام بوجهك وش الناس البجيحه
انتي عندك نعم كثيره اولها نعمة الاسلام و نعمه الصحه والعافيه نعمة الامان و الحريه
سيري على المستشفيات وشوفي وعلى الي بالمصحه النفسيه و الي داخل السجون بتلقيهن بعمرك واصغر
احمدي ربك و حاولي تغيرين بحياتك دوري شغل لو بالخاص كلمي خطابات والاهم لاتيأسي
الله يسعدك سعاده ابديه ويغير حالك للافضل ويرزقك بكل امنياتك
26-04-1439 هـ, 03:31 صباحاً
 


الساعة الآن 07:21 .