Analysis Services
السلام عليكم

تكفون يا عضاء المنتدى .. والله احس اني في عالم ثاااني . ما ني مع الناس

الكل يتكلم بالاسهم ويشتغل بالاسهم والمجالس ما لهم سيرة غير

الاسهم .. وانا والله ما افهم فيها أي شيء احس اني " دلخة " بوسط هالعالم

ياليت تسااعدوني و تفهموني - سالفة الاسهم من طقطق لسلام عليكم - .

تكفون يابنات الليّ تساعدني وتعطينيى معلومات واضحة و كافية والله أدعي لها

من كل قلبي و بصلاتي اخر اللليل ..


والله انا ودي اعرف الاسهم بس كذا مجرد المعرفة والا أنا وحدة عاااطلة ما عندي

شغل والا و ظيفة بس كذ لمجرد المعرفة - اشوف العالم الكل شاااغلته الاسهم

فاودي اعرف وش طريقتها

ملاحظة : ترااني ما اعرف شيء في الاسهم ... فاليّ تبي تسااعدني تشرح لي

من صغيرة لكبيرة ... من التافه للصعب

وشكراً

01-02-1427 هـ, 11:49 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
من عيوني يا قليبي انتي ولا يهمك
انا افهمك
اول شي الاسهم ابسط شي انك تشترين سهم مثلا ب 200
وتنتظرين لين يرتفع سعره لين يوصل مثلا 210 وتبيعينها
وطبعا انتي وكمية الفلوس ( يسمونها السيولة ) الي معك
اذا فلوسك كثير مررة مررة تشترين مثلا 2000 الفين سهم والواحد قيمته
200... اجل تدفعين 200× 2000= 400000 اربعمية اللف
وبعدين لا بعتيها الواحد ب 210 يصير ربحك 10× 2000= 20000
كسبتي عشرين الف على الاربعمية الي شريتي بها
هنا اانتي يسمونك هاموورة لانك عندك سيولة كبيرة
واشتريتي عدد كبير من الاسهم
واضح ؟

ثاني شي في شي اسمه تحليل اساسي
وشي اسمه تحليل فني
هذا يا طويلة العمر ينفعك بانك لا جيتي تبين تشرين سهم معين
تعرفين اذا كان بعدين بيرتفع ولا لا
التحليل الاساسي معناه انك تدرسين راس مال الشركة وعدد اسهمها المصدرة
وارباحها الي توزعها وهل بتزيد راس مالها او لا .. وغيره
مممم انا ما افهم بالتحليل الاساسي كثير لكن بس قاعدة اوضح لك وشو هو
التحليل الفني هو انك تستعملين برامج ... ( تكرشارت وامي بروكر وغيرهم )
فيها مؤشرات مجموعة مؤشرات تطبقينها على سهم الشركة الي تبين
ويكون لها قواعد تعلمك متى تشرين ومتي تبيعين
فهمتي ؟

طيب الحين بعلمك عن نسبة التذبذب
اكيد قريتي او سمعتي عنها
هذي يا طويلة العمر شرحها ان هيئة المال ( الي مسيطرة على سوق التداول )
تسمح لسعر السهم انه يرتفع او ينخفض الى 10 بالمية كحد اقصى
يعني اعطيك مثال افرضي سعر سهم هالشركة مثلا 250 طيب ؟
كم القيمة الي تمثل 10% من السهم ؟ لو حسبتيها تلقينها 25 ريال
يعني السهم ممكن يرتفع يصير 256 او 260 ..... الى 275 كحد اقصى
وممكن ينزل ويصير 249 او 230 .... الى 225 كحد ادني
فهمتي ؟
هذي الي يسمونها نسبة التذبذب
بس للاسف هيئة السوق الله يهديهم قررو انهم يخفضونها لين 5 بالمية
وعلى هالاساس السوق هالايام نااااااااازل نازل
لاحظي السهم الي قيمته 250 يرتفع الى 262 بس كحد اقصى
شفتي كيف ؟

طيب نجي الحين لسؤال اكيد كل شخص اذا هو مررة فريش زيك يسال نفسه
كيف يرتفع السهم وكيف ينزل ؟
يا طويلة العمر تخيلي في جوال نسائي لا صار ولا استوى الكل منهبل عليه سعره 1200 .... لما تكون كل المحلات توفر هالجوال ( كمية العرض تسمى ) وكثير ناس قاعدين يطلبونه ..( تسمى كمية الطلب ) راح يرتفع سعره يوصل 1300 او 1350
بينما لو كانو بس قليل الي يطلبونه يبقى على ما هو 1200 وممكن بعد ينزل ويصير بالف بس !!
الاسهم نفس الشي السهم لا صار فيه ناس كثيييييييييييير تشتريه ( كمية طلب كبيرة ) يرتفع سعره الى اعلا نسبة مسموح بها وهي 5% ( بعد ما كانت 10 بالمية ) ولا صارو الناس ما يشترونه ( كمية طلب قليلة ) ينزل الى نسبة 5 بالمية

كمية الاسهم المعروضة للبيع = تسمى العرض
عدد الناس الي تبغى تشتري السهم = تسمى الطلب

واضح عيوني ؟
الحين تقولين لي طيب وش يخلي الناس مثلا تهجم على سهم معين وتشتريه اكثر من غيره وتترك سهم ثاني ولا تشتريه ؟
اقول لك يحددها عدة عوامل .. سمعة السهم او الاشاعات بالصح اذا كانو الناس سامعين انه بيترفع يقومون يهجمون عليه ويشترون ( كمية طلب كبيرة ) وايضا التحليل الاساسي والفني اذا الناس قامت تستخدم البرامج وطبقت المؤشرات الي فيها ومشت على قواعد البيع والشراء ولقت ان هالسهم بيترفع تقوم تشتريه عشان لا ارتفع تبيعه

وايضا في ناس تعتمد على شي اسمه توصيات .. تلقين هالناس ما يعرفون للتحليل او احيانا ما يبون يتعبون حالهم فيعتمدون على التوصيات يعني شخص خبير يجي يقول لهم اشترو السهم الفلاني او بيعو السهم الفلاني يقومون يسون الي يقول عليه لانهم يثقون بكلامه وانا بسراحة مو ماشيةعلى هالمبدا احب اتكل على نفسي

اذا ارتفع السهم ولقيتي ناس كثير قاعدة تبيع اسهمها هذا يسمى = جني ارباح

حبوبتي كثرت عليك الكلام بس ان شاء الله اذا تذكرت شي اضيفه
يا رب يكون واضح الشرح واتقبل اي سؤال
بالتوفيق
01-02-1427 هـ, 07:37 مساءً
 
نبض الوفا ياليتك يااختي تعلميني بعد فلوسي قليل 2000 ريال

وش اشتري اسهم ؟؟؟
01-02-1427 هـ, 11:05 مساءً
 
عيوني والله ما اقدر اعطيك توصيات توي مبتدئة
عموما السوق كله نازل فرصتك اشتري الاسهم الي سعرها بسيط من 200- 400
وشوي شوي تتضاعف
ودمتي بود
01-02-1427 هـ, 11:54 مساءً
 
واناااااااااااا بعد ابي افهم شغله الاسهم خاطري اصير خبيرة بالاسهم لاني ماعندي ماعند جدتي في سالفة الاسهم
بليززززز ساعدوني والله اني محتاجه والله اعلم بالحال والي بتساعدني بدعيلها بصلاتي وهذي امانه برقبتي ليوم الدين...

محبتكم سعادقلبي يابعدقلبي
02-02-1427 هـ, 01:16 صباحاً
 


الساعة الآن 01:58 .