أنا قصتي طويييله ...

قبل ما أعرس كنت وايد مبذره !
لكن عقب العرس .. ماشتغلت .. لكن معاش ريلي يكفينا ويزيد ..
صارت ظروف وقل معاش ريلي للنص ..

وصرنا لازم نوفر ...
الأن: ريلي ينزلي معاش 1000 درهم على حسابي الخاص، وأنا أحاول أدبر
أموري كلها في حدود المبلغ ..
طبعا ما أقدر أمسك عمري .. وكلها تروح قبل نص الشهر ..
لكن هالحركه خلتني أستحي أرد اطلب منه ..
واتعلم الحين شوي شوي .. اني أمسك عمري عن الصرف ..

اللي راح أسوي:

دفتر ميزانية العائله :
نكتب فيه
الميزانية كامله ....... ********$ وهذا الراتب كامل وكل اللي يدخل لكم شهريا
ديون طويلة الأجل ......... *****$ مثل قرض سياره، ولا بيت اللي تسدد خلال أكثر عن سنه
ديون مستحقة الدفع ...... *****$ مثل كانت عليكم الشهر اللي طاف ولازم تدفعونا هالشهر أو هالسنه ..

توفير .......... ****** $
مستلزمات البيت .......****** $
مستلزمات العائله ....*****$ وهو معاش الأم والأبناء .. وأي مبلغ يقتطع لشخص آخر ، مثلا يتيم..

واذا عنكم أي التزامات ثانية ممكن تضيفونها،
خلو هالشي بملف كأنكم في شركه، وخلوها بالمكتبة أو بالكمبيوتر، وشهريا سجلوا كل صغيره وكبيره، حتى لو حلاوه سجلوها ... بتعرفون البيزات وين تروح ...

وشي ثاني ...
يبي دفتر .. وكل فاتوره شراء لصقيها فالدفتر ..
عقب فتره يوم ترجعين للفواتير بتحسين ان وايد اشيا ما كان لها لزمه وبتتركينها مع الوقت...


وبالنسبه للاستثمار ...
أنا مثل اللي يقولون عنه ..
سبع صنايع والبخت ضايع ..
أمشي وملف السعد فيدي من كثر المشاريع .. (اللي شاف درب الزلق بيعرف شو هو ملف السعد) ههههه ..

بدايتي فالتجاره والاستثمار كانت بالغرافيكس .. والتصميم ... تعاقدت مع الشاعره (هتان)
اني أسويلها بطاقات لموقعها .... لكني ماخذت منها شي لانها كانت أول من طلب مني ..
وعرضت عليها أسويلها الشي بلاش

عقب وحده ثانية طلبت مني أسويلها ... واستلمت أجر البطاقات اللي سويتها .. وكانت بدايه حلوه ..

هذا الكلام كان قبل ما اخلص الجامعه .. بعد ما خلصت ... بسنه ..
بديت أشتغل عالجلابيات .. وبعت دفعه .. وكانت تقريبا ناجحه لانها انباعت من أول شهر ..
وكان طلب كبير على التصاميم ...

عقب تعبت من الجلابيات ... لاني كنت أخيطهم بروحي .. فكنت أتعب وأنا أحسب القياسات ..
قمت أسوي شيل ... والحمدلله نجحت وانباعت كلها ...

لكني تركت هالشغله ... والحين أشتغل بتصميم المواقع ... والصور والبطاقات ..
وفضلت اني استمر في هالمجال لاني دارستنه وكانت موهبتي من زمان وكان عندي ابداع فيه .. واقول اني أريد افتحلي مكتب .. لكن كثير يقولون اشتغلي من البيت أحسن ...

ولين الحين مش عارفه ...
المشاريع اللي عندي وايد وايد لدرجه اني أريد أسويهن كلهن ..
وكل مشروع غير عن الثاني ..

وهذي قصتي .. مع التوفير والاستثمار ..



لكن ... فالنهايه الرزق على رب العالمين ..
والدنيا مثل الظل .. تمشين .. تمشي وراج ... تمشين وراها تركض عنج ...


تحياتي
02-03-1427 هـ, 07:28 مساءً
 
ماشا الله عليك ام احمداني تجربه رائعه ....
02-03-1427 هـ, 08:14 مساءً
 
مشكوره يالغاليه

نصايحك مررره مهمه ومررررره حلووه
02-03-1427 هـ, 08:45 مساءً
 
معقول مافي بنات حواااااء تاجره ؟؟؟؟؟؟؟؟


مدري وين يروحون البناااااات ؟؟؟
02-03-1427 هـ, 08:46 مساءً
 
السلام عليكم
بخبركم بتجربتي
تزوجت وقبل الزواج قدمت استقالتي من العمل "اصلا ماكان راتبه يستاهل 1400 ريال"
لقيت زوجي مديون ولا رصيد ولا شي

بفضل الله لقيت عمل براتب ممتاز تقريبا بدئت ب 6500 ريال ووصل الى 7700
وزوجي راتبه بعد كويس بحدود 8000عند زواجنا
المهم من البدايه شديت الأحزمه استأجرت بيت بسعر معقول
ودخلت براتبي وراتبه جمعيه اكيد تعرفون شلون يعني جمعيه وكنا ترك فقط المصاريف بأضيق الحدود
الحقيقه حرمت نفسي من اشياء كثيره لدرجة اني كنت اداوم فترتين وحامل ولا جبت شغاله
واطبخ واغسل ولا اجيب شي من بره لين صرت بالشهر السابع علما بأن حملي تأخر سنه
وكانت الظروف افضل فجبت شغاله
المهم ظلينا نعمل جمعيات وندخل فلوسنا استثمار بلأسهم
والحمدلله اليوم وبعد مرور 10 سنوات على زواجنا
عندنا بيت جمييل جدا وسيارتين وشغاله وسواق ورصيد لكل واحدمننا
وتركت العمل وجلست بالبيت لأني تعبت
ولكن بارجع اشتغل لأن جاني عرض ممتاز
وهذا العرض جاني بناء على النجاح الي حققته بعملي السابق والحمدلله رب العالمين

نصيحه يابنات .......................الصبر ثم الصبروصدقوني مرت ايام كنت اوفر فيها الريال والخمسه وحرمت نفسي من اشياء كثيره وكان كثيرات ينتقدوني يقولون ياختي راتبك كم ماشاء الله ارحمي نفسك غيري جوالك ..........خذي بيت اكشخ
بس الحين الحمدلله عايشه بالطول والعرض والي كانو ينتقدوني مازالو باجار والديون لراسهم

ولكل مجتهد نصيب
02-03-1427 هـ, 08:52 مساءً
 


الساعة الآن 06:49 .