اقتباس مشاركة  (زينه نجد)
السلام عليكم

خواتي لو سمحتو حابه أسألكم عن الأستثمار في صندوق الرائد في البنك الأمريكي

أنا أستثمرت مبلغ 10000ريال ومب عارفه كيف طريقتهم وصاروا كل سبت يرسلون رساله ع الجوال وأنا مب فاهمه ياليت اللي عندها خبره لاتبخل علي

والله يحقق لكم كل ماتتمنون


السلام عليكم ورحمة الله وبركاته...
هذي اول مشاركه لي بهالمنتدى الاكثر من رائع واتمنى افيد واستفيد وتقبلوني اخت بينكم...
اختي زينة نجــد...الموضوع بسيط...وراح اختصرها لتس على شكل نقاط على ضوء خبرتي المتواضعه جدا علما باني مشتركه بصندوق الرائد صارلي 8 شهور تقريبا:
1) صندوق الرائد اسلامي موافق للشريعه حسب مايدعي البنك (سامبا) حيث يتداول الاسهم المحليه باستثناء الشركات الربويه وخاصة البنوك...
2) الهدف من صندوق الرائد (حاله حال جميع الصناديق الاستثماريه) هو الاستثمار على المدى الطويل...يعني مع نهاية السنه تشوفين كم زاد راس مالتس...وطبعا الصناديق مفيده للي ماعنده خبره في الاسهم والمضاربات والتداول ووجع الراس...او مايكون عنده وقت لمتابعة الاسهم يوميا...فعطي الخبز خبازه حتى لو اكل نصه...
3) الحد الادنى للاشتراك في الصندوق 7500 ريال (مدري يمكن غيروه) ...ويستطيع ان يضيف المشترك على راس ماله بحد ادنى 2000 ريال (على ما اذكر)...يعني مهب تجين بـ 500 ريال ولا 1500 وتقولين ابي ازود على راس المال...لا مايصير ..
4) صندوق الرائد يتكون من عدة محافظ لعدة مستثمرين...ولانتس اشتركتي بصندوق الرائد فانتي الحين مستثمره ولتس محفظه استثماريه بهالصندوق الاستثماري باسمتس انتي..."زينة نجد ...
5) على قدر راس المال اللي اشتركتي فيه راح يشترون لتس اسهم على شكل وحدات...وتوضع في محفظتتس الاستثماريه عدد من الوحدات...اوضح اكثر: نقول انتس اشتركتي اليوم بصندوق الرائد...والبنك اعلن ان سعر وحدة صندوق الرائد هو 71.106 ريال...وانتي اشتركتي بــ 10000 ريال ...يعني لوقسمنا 10000 ريال على 71.106 راح يكون عندتس 140.635 وحده...
6) الوحدات هذي يتم تقييمها بالنسبه لاداء صندوق الرائد بشكل اسبوعي كل يوم خميس مع نهاية التداول ويعلن عنها يوم السبت...بحيث يتم تقييم اداء صندوق الرائد بكل المحافظ اللي فيه ومن ثم يتم تسعير وحدة صندوق الرائد...فمثلا واكرر مثلا لو اعلن البنك ان اداء صندوق الرائد + 7% من بداية السنه الميلاديه... معنى ذلك ان راس مالتس زاد بمقدار +7% اذا كنتي مشتركه من بداية السنه الميلاديه....
طبعا هذا كان مثلا لكن الواقع المر ان تقييم اداء صندوق الرائد للاسبوع اللي طاف (للاسف مدحدر) -8.18 % من بداية السنه ...يعني اللي دخل براس مال من بداية السنه الميلاديه يكون طار من راس ماله -8.18 %... عسى الله يعوضنا خير...
7) البنك ياخذ اتعاب (عموله) حوالي 1.75 % سنويا من قيمة محفظتس...فيه بنوك ثانيه ياخذون اكثر زي مثلا الامانه في البريطاني...

اسئله واجوبه
س) شلون تعرفين سلمتس الله اداء الصندوق وسعر الوحده فيه؟
ج) فيه اكثر من طريقه...
-اما انتس تسوين اللي قالتلتس الاخت امل عمري انتس تتصلين على سامبافون 8001242000 (لازم يكون عندتس حساب)...وتضغطين رقم 5 وبيعطونتس كم سعر الوحده وكم عدد وحداتتس وكم قيمة محفظتتس كلها...فلو كان قيمتها 13000 ريال وانتي داخله بــ 10000 ريال بكذا تكونين انتي ربحتي 3000 ريال فوق راس مالتس...
- تكونين مشتركه بسامبا اون لاين عن طريق الانترنت وطريقة الاشتراك سهله تقدرين تسوينها بنفستس بزيارة موقع www.samba********com وتلقين لنك على اليمين "اشترك الان" اضغطي عليه واتبعي التعليمات...ولما تجين تحطين رقم سري لازم يكون 4 حروف وبعدين 4 ارقام... واذا ماعرفتي تشتركين اتصلي على سامبا فون او زوري اقرب فرع وهم يسوونها لتس قدامتس...المهم...نقول انتس اشتركتي...راح تلقين لنك على محفظتتس بصندوق الرائد...ادخلي عليه وهو يوضحلتس كل التفاصيل كم قيمة محفظتس حتى كم راس مالتس يوم تدخلين...وهذي بنظري احسن طريقه بس لازم لازم لازم يكون جهازتس محمي من الهكر والفيروسات علشان لاحد يلعب بدراهمتس وانا اختتس...
- البنك نفسه راح يرسلتس رساله على جوالتس بس هذي مايذكرون فيها غير قيمة الوحده واداء الصندوق بدون مايذكرون قيمة المحفظه...

س) ابي اسحب جزء من دراهمي اللي بصندوق الرائد...شلون؟
ج) اقل مبلغ تقدرين تسحبينه هو2000 ريال. وتقدرين تسحبين فلوستس كلها.. وفيه طريقتين للسحب:
- الاولى: تتصلين على سامبا فون وتطلبين المبلغ اللي تبينه .
-الثانيه: عن طريق سامبا اون لاين ...(هذي خدمه جديده ولابعد سويتها قبل)
-او انتس تزورين الفرع...بس وشوله التعب...

س) متى ينزل في حسابي المبلغ اللي طلبته من صندوق الرائد؟
ج)ركزي معي شوي الله يعافيتس...شوفي: اذا بغيتي مبلغ من محفظتس بالصندوق لازم تسوين الطلب، باحد الطريقتين اللي ذكرتهن فوق، ،،بس قبل الساعه 12 الظهر من يوم الثلاثاء ...ليش؟ علشان يعطونتس تقييم الاسبوع اللي انتي فيه...وبكذا راح تقيم محفظتس بتقييم يوم الخميس من الاسبوع اللي فيه الطلب ثم ينزل في حسابتس الجاري يوم السبت اللي بعد الجاي واكرر اللي بعد الجاي يعني يوم السبت من الاسبوع الثاني ...مشوار صح؟
لكن لو تاخرتي في طلبتس الى بعد الساعه 12 الظهر من يوم الثلاثاء راح يقيمون محفظتتس على تقييم الاسبوع الجاي وليس الاسبوع اللي انتي فيه,,, وراح ينزل المبلغ في حسابتس يوم السبت من الاسبوع الثالث....مشواااااااااار بقووووووه هذا اكبر عيوب صندوق الرائد... لو تشوفين الفرنسي ، التقييم عندهم يومي ...لوتسوين الطلب اليوم...من بكره والمبلغ في حسابتس...ياحلاتهم

اخيرا بقولكم نصيحه لله: بالنسبه للي مشتركات بالصناديق، اذا شفتي ان فيه نيه او مؤشر لانهيار بالسوق(وليس تصحيح) زي الوضع اللي احنا فيه هاليومين... فاسحبي نص دراهمتس، هذا في البدايه... وراقبي السوق واداء الصندوق اللي انتي فيه فإذا شفتي انه صار بالسالب وصار ياكل من الارباح او قرب ياكل من راس المال ،،،اسحبي الباقي كله...لكن اذا صار ارتداد حقيقي فارجعي بالنص الثاني من دراهمتس او ادخلي مره ثانيه اذا كانتس سحبتي دراهمتس كلها...علشان كذا مهم جدا تعرفين متى تدخلين ومتى تطلعين...وميزة الصناديق ان مافيها "تعليقه" زي اللي يشترون مباشرة بالاسهم ...بالعكس متى مابغيتي دراهمتس تاخذينها...

اتمنى اكون جاوبتس مع اني احس اني صدعتس بكثرة كلامي
واتمنى تعم الفايده للجميع...

وان شاء الله ان شاء الله ان شاء الله يرجع سوقنا خضر زي ماكان...

هذا والحمد لله والصلاة والسلام على حبيبي محمد بن عبدالله...
25-02-1427 هـ, 12:06 صباحاً
 
مشكورين ويعطيككم الف عااافيه ع التوضيح

ومشكوره غالية الغالي ياقلبي لأنك وضحتي لي كل شيء وتسلمين وماقصرتي بس عندي سؤااااااااااااااااااال

الناس قاموا يسحبون فلوسهم من الرائد يبغون يبقون على راأس المال وش رايكم أسحب ولا لا؟؟؟؟؟؟؟؟؟؟؟؟

ومشكورين ع المعلومات جعل ربي يجعلها في ميزان حسناتكم
25-02-1427 هـ, 03:31 صباحاً
 
مشكورة اختي غالية الغالي
وكلامك كله مفهوم وشرح ولا احلى

بس هذي النقطة ما فهمتها وكيف تتم
اخيرا بقولكم نصيحه لله: بالنسبه للي مشتركات بالصناديق، اذا شفتي ان فيه نيه او مؤشر لانهيار بالسوق(وليس تصحيح) زي الوضع اللي احنا فيه هاليومين... فاسحبي نص دراهمتس، هذا في البدايه... وراقبي السوق واداء الصندوق اللي انتي فيه فإذا شفتي انه صار بالسالب وصار ياكل من الارباح او قرب ياكل من راس المال ،،،اسحبي الباقي كله...لكن اذا صار ارتداد حقيقي فارجعي بالنص الثاني من دراهمتس او ادخلي مره ثانيه اذا كانتس سحبتي دراهمتس كلها...علشان كذا مهم جدا تعرفين متى تدخلين ومتى تطلعين...وميزة الصناديق ان مافيها "تعليقه" زي اللي يشترون مباشرة بالاسهم ...بالعكس متى مابغيتي دراهمتس تاخذينها...

يعني اصير اسحب وارجع فلوسي يرضون سامبا هذي الحركة ؟
25-02-1427 هـ, 03:37 صباحاً
 
اقتباس مشاركة  (زينه نجد)
مشكورين ويعطيككم الف عااافيه ع التوضيح

ومشكوره غالية الغالي ياقلبي لأنك وضحتي لي كل شيء وتسلمين وماقصرتي بس عندي سؤااااااااااااااااااال

الناس قاموا يسحبون فلوسهم من الرائد يبغون يبقون على راأس المال وش رايكم أسحب ولا لا؟؟؟؟؟؟؟؟؟؟؟؟

ومشكورين ع المعلومات جعل ربي يجعلها في ميزان حسناتكم
الحقيقه انا اتجنب اني اعطي توصيات لان بصراحه ماعندي ذيتس الخبره...ولكن ياليت تقرين نصيحتي اللي بنهاية ردي لتس... متى اشتركتي بالصندوق؟ قبل الانهيار ولا هاليومين؟ ياليت توضحين... وانا حاضره باللي اقدر عليه...
بالنسبه لاختي ملكة النجوم اقولها: اي نعم تقدرين تسحبين دراهمتس كلها وتدخلين مره ثانيه والبنك ماعنده اي مشكله من هالناحيه...لكن الشطاره انتس تعرفين متى تدخلين ومتى تطلعين...

تحياتي لكم جميعا...ولاتحرموني من صالح دعاءكم...
25-02-1427 هـ, 10:39 صباحاً
 
أي سحب مالي أو لنسميه بتسميته الصحيحة ( أي استرداد كامل أو جزئي ) للأموال يأثر على الصندوق الاستثماري .

يعني لو شخص واحد قام باسترداد كامل لأمواله و قدرها 5000 ريال .. هذه ما راح تأثر في الصندوق بتاتا ً

لكن لو قام 20 ألف عميل بسحب أموالهم من الصندوق ، و متوسط رصيد كل واحد منهم هو 100 ألف ريال .. إذن مجموع ما سحب من الصندوق هو مبلغ 2 مليار ريال سعودي .. و هذا مبلغ بالتأكيد سيؤثر كثيرا على الصندوق و أدائه ..

لذلك نلاحظ أن الصناديق الكبيرة و التي تسارع الكثير ممن كانوا فيها لسحب أموالهم تضررت كثيرا بعكس الصناديق الجديدة و التي لم تشهد عمليات استرداد كبيرة

و كل صندوق يمكننا معرفة رصيدنا فيه من خلال معرفة سعر الوحدة الذي اشتركنا به و عدد الوحدات التي نملكها في الصندوق

فالرصيد = عدد الوحدات الخاصة بنا × سعر الوحدة ( لليوم )
25-02-1427 هـ, 11:46 صباحاً
 


الساعة الآن 07:19 .