# قصه # .. اغراض البيبي

مع برودة الجو بالليل في اول الربيع الا انه سامر كان يستمتع بالجلوس على البلكون مشان يشرب فنجان قهوة المساء . كان جالس بيستنى القهوة . اجت لينا حاملة صينية القهوة وقعدت . وكان ظاهر انه في بتمها حكي .

سامر : - في فمك ماء !!!
- ابش يعني ؟
- لا هاي لغة فصحى . يعني في بتمك حكي .
- من وين جايبها هاي ؟ في فمك ماء !!!!
- مش عارف . يا استاز العربي تاع الاعدادي . يا ابو اياد تاع الدكان اللي جنب بيت اهلي .
- طيب . طيب . في فمك قهوة .....هي هي . وفي فمي كلام كتير .
- طب اسمعي . اجليه بس خمس دقايق بس اشرب القهوة .
- ليش يعني .
- لانه حبيبتي لو الموضو منيح او على الاقل عادي كان جيتي خبط لزق حكنيه . بس بما انك تطوعت تجيبيلي القهوة لهون . وقعدت بالبرد .معناه الموضوع محرز . فخليني امارس اخر هواياتي واشرب فنجان القهوة قبل ما تتحفيني بالموضوع تبعك .
- يا حرامك من الله . دايما ظالمني .
- اه . بعرف . ظالم انا . وانت الملاك البرئ .
- بتتخوت . انا لسه ...........
- حبيبتي . بعرض النور خليني اشرب فنجان القهوة على رواق .

سكتت شوي وهو استرخى على الكرسي ....عدة دقائق ..

- ها حبيبتي . أأمري .
- ما يأمر عليك ظالم يا رب .
- اللي بعده .....
- شو اللي بعده . ما في اشي مهم بس بدي اياك تحسب حسابك الشهر هاد مشان بدنا نجيب شوي اغراض للبيبي !!!
- شوية اغراض ؟ زي ايش يعني ؟
- تجهيزات البيبي .
- تا يجي الصبي بنصلي على النبي .
- اللهم صلي على سيدنا محمد . ما بصير تحكي هيك . دايما لازم نصلي على النبي
- بركاتك ستي الحجة . اللهم صلي على سيدنا محمد .
شو عاد تجهيزات البيبي . كلها ( كوفلية ) وشوية غيارات . لازم نكبر الموضوع وتصير تجهيزات البيبي .
- كوفلية وشوية غارات ؟ بتحكي عن جد انت ؟ غيارات داخلية وعدة وحرامات وسرير وعرباية وكرسي سيارة وكريمات وعدة حمام .......و
- وي رايحة ؟ استني شوي
- لسة ما خلصت . وبانيو صغير ......و .......
- على مهلك علي . وحدة وحدة . بس مشان افهم
- افهم حبيبي . ليش بدك تفهم ؟
- عديهم وحدة وحدة .
- غيارات .
- حلو . وهاي شو بتشمل ؟



- هاي يا سيدي العزيز بتشمل :
الكوفليات والبياضات اللي هي الملابس الداخلية البيضا ، تبانات . وطقوم خارجية .
- طيب و هدول كام حقهم ؟
- ما بعرف بالضبط احكي خمسين دينار .
- خمسين شو ؟ ليش ؟
- قلتلك ما بعرف بس نشوف الاسعار والنوعيات .
- ايش النوعيات ؟ هاي برضه فيها ماركات عالمية ؟
- اذا هاي ما فيها ماركات عالمية . مين اللي اله ؟
- طيب غيره .
- سرير للبيبي . ومهد . وكرسي سيارة .
- كرسي سيارة بدري عليه . بس يصير يقعد . والسرير على عيني وراسي . بس شو هاد المهد ؟
- اوكي كرسي السيارة اجله شوي . المهد هاد اللي زي الكرسي وزي السرير للاطفال اللي ضغار كتير مشان نحملهم فيه لما نطلع . اقلك بفرجيك اياه بالمحل .
- عرفته . زي اللي اشترناه لايمن صاحبي بس اجاه ولد .
- ايوه . يا عيني عليك . هي كمان قول سبعين تمانين دينار .
- ولا اشي .
- بانيو صغير مشان حمام البيبي . وعدة الحمام شامبو وزيت حمام وبودره وكولونيا وكريم ...و
- حبيبتي هاي بيبي . مش عروس . هاي كلها مواد كيماوية شو تخبصي قاعدة ؟
- هذا الكلام انتو الرجال ما بتفهموا فيه . انت خليلك ميتين دينار وما عليك بالباقي .
- ميتين دينار ؟ ولا اشي . انت ناسية انو في عنا مستشفى وولادة وضيافة ومش عارف شو . من وين بدي اجيب انا؟ - صحيح بدي كمان اعمل شوكلاته تاعة البيبي وبدي قرفة واغراض الكراوية . انا بجيبها بس نروح على السيفوي . – طب سؤال . ولا اسألك عن ذنوبك يعني . شو محوشة من راتبك ؟
- شو شو محوشة ؟ مش اعطيتك الشهر الفات 500 دينار مشان تكمل ايجار البيت ؟؟؟؟؟؟؟؟
- يعني ما معك اشي ؟
- لا معي كمان يمكن 100 دينار بس يا دوب يكفوا .......
- حاضر اول الشهر بس ينزل الراتب بنروح نعمل شوبينغ لحضرتها .....
- صحيح احنا ايش اخر اشي اتفقنا على الاسم ؟
- قلنا حلا
- حلا ؟ مش ناوي تغير ؟ مش تالا احلى او .....
- يا حبيبتي انت المهم سلامتك . وهي سميها وضحة . فلحة . اي اشي . اسم البنت الك شو ما بدك سميها بس ما يكون اسم مايص وخلص .
- ماشي بس لا تدفش .........

ونزل الراتب . ويا ليته ما نزل وبدأت رحلة الشوبينغ ابتداءً بمذر كير الى تشيكو مرورا بجونسون . تعرفو خلالها على معظم الماركات العلمية في صناعة مستلزمات الاطفال . وبصراحة الدهشة والاستغراب كان ظاهر على ابو سمرة لانه اكتشف عالم جديد من التكنولوجيا !!!!!!!!!! اشياء عجيبة هاي اللي صانعينها السريرميت شكل ولون وغرفة البيبي بيكون الواحد نفسه يجيبها زي ما هي من كتر حلاوتها . بس الاسعار بتخلي الواحد يحس حاله مش عايش بهاي الدنيا . يعني غرفة البيبي اذا اخذنا بنصيحة مذر كير او تشيكو بتكلف اكتر من غرفة نومه اللي معتبر حاله دافع فيها دم قلبه . وطبعا ابدا ما بينسو اشي . الستاير لازم عليها احد ابطال والت ديزني او تويتي او توم وجيري . السجاد ....قطعة يا دوب مترين بمترين بحق سجادة اربعة باربعة . بس يا عمي هاي عليها ميكي ماوس .
بعدين دايما البياع بيسأل : على خير جايكم ولد ولا بنت ؟ وسامر كان رح يهب فيه . ما اهلك انت ؟ طلع مشان يحددوا لون الاشياء البنت لازم زهري . والولد ازرق سماوي !!!!! اه من هيك المحلات تاعت الاطفال كلها بس ازرق وزهري ويعني شوية لبيض وبيج ....... والله الواحد بيعيش وبيتعلم .......


من غلاء الاسعار حتى هي ما اقتنعت واخذوا نصيحة بعض المجربين انه ينزلوا على شارع بسمان وسط البلد مشان اواعي وتجهيزات البيبي لانها هناك ارخص بكتير يعني مش تشيكو ومذر كير بس صناعة سورية او تركية نخب اول وحلوة . بعدين يا اخي الصغار ما شاء الله عليهم بيكبروا بسرعة والملابس ما رح يستخدموها كتير .
ولما وصلوا هناك ما كانت ارخص بكتير يعني وصار عندهم قناعة انه مستلزمات الاطفال اغلى من الكبار .

وتم شراء الدفعة الاولى من الاغراض وتم دفع الميتين دينار ولسة شغلات كتير ما انشرت وتم تأجيلها اعتمادا على النقوط اللي رح يجي . مع انه نقوطات البنت مش زي نقوطات الولد !!!! هيك حكوله !!!!

اما الشوكلاته وما ادراك ما الشوكلاته فكانت قصة تانية . الست لينا بدها تعمل حبات الشوكلاته بطريقة مزينه ومرتبه بحيث بتنحط مجسم عرباية او سرير مع شبرة على الحبة . قال مشان تظل للذكرى .. ولازم نوع الشوكلاطه يكون من النوع الراقي . يعني زنبركجي او باتشي . الكيلو يتراوح ما بين عشرة الى خمسة عشر دينار . وبعد التزيين وقف عليه الكيلو بثلاثين دينار .........ويمكن " نحتاج كمان كيلو حبيبي " ........" والله المجانين ولاد ناس يا حبيبتي "....

بعد ما جهزوا عدة القرفة والكراوية اجت المفتية العامة والمستشارة الاقتصادية والفنية حماته . وافتت انه الدنيا رح تكون نار بشهر سبعة والقرفة والكراوية بيعطوا حرارة ......" ليش ما تقدموا بوظة ؟ "

- انا بقترح نوزع مكيفات بدل الشوكلاته . انتو شو رايكم ؟ هاد سامر بيحاول يخفف دمه بعد الدفع اللي دفعه وبيسمع الكل انه
خلاص
كفاية
قبعت