هلا حبيباتي

انا قصيميه والقهوه عندنا نوعين: قهوه الرجال وقهوه الحريم وحنا استحدثنا نوع جديد للصبايا

المهم قهوه الرجال>>>> حمستها تكون خفيفه مره ونطبخها عادي ونحطها في الدله (اهم شي خاصه الشيبان ياويلك تجيبينها له بزمزميه يعني براد) وبعطين تضيفي لها هيل بكميه كبيره يعني 3 ملاعق كبار حقت الاكل وتخلينها تقلب قلبتين على النار .

اما قهوه الحريم>>> وهذي للحريم الكبار في السن عكس قهوه الرجال حمستها تكون ثقيله مره او بالاصح سوداء وتطبخينها مع شوي زعفران وبس بعضهم يحطون شويه هيل معها <<< بصراحه ماادري وشلون يشربونها


جينا عالمهم وهو قهوه الصبايا الامورات الدلوعات خخخخخخخخخخ
اول شئ تكون حمسه القهوه وسط لاهي ثقيله ولا هي خفيفه مرة وتطبخينها عادي مده من 10 الى 15 دقيقه وبعد ماتركد تحطييينها بالزمزميه وتحطين معها السر اللي هو خلطه القهوه العجيبه

واللي هي عباره عن حليب نيدو + كوفي ميت او مبيض القهوه+زعفران+هيل+شويه مسمار اللي هو القرنفل بس ريحه يعني)انا اسوي هالخلطه بكميه كبيره واحفضها عندي وكل مره احط 3 _4 ملاعق بالزمزميه

وبتطلع لك القهوه امممممممممممممممم ماتروين منها

بس كلً وذوقة بالنسبه لي مااحب الاشياء القويه نكتها زي المسمار او الشمر او المحلب بس فيه ناس يفضلونها


وسلامتكم

تحيه من احلى قصيميه
01-05-1427 هـ, 02:30 صباحاً
 
والله ياحياتي ماني عارفه شكله .............لكن سمعت من وحده من الزميلات تمدح فيه بشكل كبير..............شاكرة لك ياجنان ردك
01-05-1427 هـ, 06:17 مساءً
 


الساعة الآن 03:38 .