السلام عليكم ورحمة الله وبركاته
اخواتي العزيزات انا اخر دوره لي 12شهر شعبان والان انا في التاسع نفسي اعرف مين معايا ولسه ماولدت تراني طفشت واخلاقي زفت ولاني الحمل الثاني جدا خايفه ومتوتره مع اني الحمد لله ادعي الله ولازمه للادعيه والاستغفار
افكر في الولاده يابخت البكريات تراهم في غفله المشكله في المجربه مع اني لي ثلاث سنوات ونصف على الولاده الاولى ومع ذلك خايفه ادعولي والي معايا ابغى احاسيسكم

للرفع
اختي عادي لا تفكرين بالولادة ان ظليتي تفكرين..بتتعبين اكثر..والولادة جاية جاية ان شاءالله..بوقتها..انا الحين باقي لي كم يوم واخلص التاسع مع انها مو اول ولادة لي ومع ذلك اخذت التاسع كله..


بس نصيحةلا تحاتين بتتعبين اكثر انا بحملي هذا ما افكر حيل بالولادة ولاني مستعجلة عليها ..الحمدلله احس نفسيا مرتااااحة..والله يسهل علي وعليك وعلى كل الحوامل امين



الحمــدلله كما ينبغي لجلال وجهـــك وعظيــم سلطانــك
هلا بصمه وغريبه.......... شحالكن؟ ****لله بخير.... الله يسهل علينا وعليكم وعلى كل حامل يارب
بصراحه مش انتي اللي طفشتي يا بصمه انا اللي ودي اشق ثيابي من الارف والنفسيه الزفت
عاد بالخصوص هالشهر احس به سنه ومتضايقه من عيالي ولا احب اسمع اصواتهم والغربه والارف زايديني زياده, اتريا امي توصل يوم السبت الياي على الاقل احصل انسان اشكي له وارمس وياها وافضفض ومن 3 ايام فيني تقلصات على الفاضي اغلب عيالي ولدتهم في اول اسبوع في التاسع اما هذا شكله عايبتنه السالفه يبغي يصيف داخل...شو نسوي ندعي والله يسهل علينا جميع..... انا مجهزه الشنطه من اول الثامن خخخخخخخخخ وكل يوم ادخل غرفة اليهال اشوفها وارفسها واطلع خخخخخخخخخخخخخخخخخخخخ حالتي كسيفه حتى عيالي التوأم اولاد اعمارهم 4 تقريبا يدخلون يرفسونها يسوون مثلي من كم يوم ريلي يقولي العيال ينولدون صاحيين الحمد لله محد يخبل فيهم غيرج يوم يكبرون..... ( خل اخبرج بسوالف اليهال في البيت ترى محد عندي اضحك وياه غيرهم .. بنتي فطوم صغيره عمرها سنتين ونص تجابل بطني وترمس ويالبيبي اونها... تقوله انت ما عندك بيت ما عندك اهل خخخخخخخخخخخخخ يالس على قلبها.. مسكينه من كثر ما تسمع الشكاوي من عندي مستويه مثل العياييز من كم يوم كنت اصيح في غرفة اليهال من االالم والضيج وكانت هي نايمه وقامت اطالعني في ويهي كسرت خاطري... عقب انا غفلة شوي تخيلوا يوم قمت شو حصلت؟؟!! حاطه كاكاو على بطني وذايب اونه تعطي البيبي علشان ما يصيح خخخخخخخخخخخخخخخخخخخ.. طولت عليكم من الملل اللي انا فيه يالله فديتكم باي

خيتي بصمــة ابهامـــي..

يقول راعي المقوله لاتشكين لي ابكي لك .. انتي اخر دورة لك في 12 شعبان طيب وش رايك اني اخر دورة لي في 4 شعبان يعني قبلك بااسبوع وزياده وعلى فكره باقي لي 6 ايام واخلص التاسع
ومثلك هذا ثاني حمل لي وراح اقولك كل شي سويته عشان تهون عليك مصيبتك ..

من دخل التااسع وانا ياطويلة العمر امشي وامشي واوصل البيت خلاص مااقدر اجلس من ألم الحوض والمغص في بطني وظهري .. قلت يابنت لازم تاكلين وتشربين اشياء تساعد على فتح الرحم :

1 / شربت قرفه ثقيييله مرررررررررره مع مراميه قالو تفتح الرحم بسرعه بس نتيجتها فعاله اثناء الطلق الحقيقي واناابي الرحم ينفتح بالغصب

2/ قالو الحلتيت خطره ومن قوتها تشمها الحامل اثناء الطلق شمّ تفتح الرحم .. واللي تشربها والا تاكلها في الشهور الاولى تسقط الطفل ؟؟؟
من التهور والملل اللي فيني رحت كلمت عطار وقالي خذي قطعه مقدار حبة العدس اعبطها مع تمره واكلها رحت سويتها الله لايوريك مكروه بغيت امووت من الآلآم الطلق الحقيقي للولادة بس ماانفتح الرحم ليومك ...

3/ اقرأ عليه سورة الزلزله يوميا

4/ نصحوني بمغلي التمرات والماء مع فلفل اسود تصفى وتشرب وشربته مافيه فايده
5/ قال لي العطار عليك بالتبخر بالكمون وقشر بصل حار 4 مرات يوميا خيست البيت على الفاضي ماانفتح ..

صرت ماعاد اقدر انام من الآلآم الطلق رحت كشفت خشت علي قالت لي عنق الرحم عندك طررري بالمره وتوقعي ولاده بـأي لحظة لوكثرتي مشي صدقيني بينفتح ..

انا مشكلتي في المشي حدي ربع ساعه مااقدر اكمل احس انه بينزل مني ... وهي تبيني امشي بالساعات ..

انا ماحكيت لك مأسآتي الا عشان اهون عليك مصيبتك والله يفرجها علي وعليك وعلى كل حامل عاجل غير آجل..




الساعة الآن 06:41 .