نلتقي لنرتقي اتمنى من الجميع قراءه الموضوع

السلام عليكم
هلا بنات شخباركم
بدخل في موضوعي مباشرة
في الفترة الاخيرة كل ما تكلمت ويا وحده من تاجرات المنتدي تعبر عن ضيقها من اللى يستوي في المنتدي
من تراشق بالكلمات
او اتهامات
والشي اللى ملاحظينه انه اول ما ينزل موضوع بدون ما تتحرى البنت من السالفه تبدا ترد وتنغز وتتهم وتكتشفين ان القلوب متروسه حقد
في رأيي يابنات
اذا نزل موضوع اتهام في المنتدي لا تردون
اول تحروا الحقيقه ولا اقصد ان صاحبه الموضوع جذابه
انا اقول تحرى الحقيقه يمكن يكون الطرفين اصحاب حق
وهل يعني التاجرات اللى ما يشتكن ما تستوي لهم موافق
بالعكس اشكثر دفعنا من جيوبنا
واشكثر سمعنا كلام يعور القلب
واشكثر تعرضنا لهجوم
لكن ما ننزل موضوع عالعام نتهم فلانه وعلانه
واذا صابج من حد ظلم
مالج الا الدعاء
والله ما يضرب بعصا
اتمنى نطهر قلوبنا
ونعرف شي واحد بس
ان الله هو اللى يرزق
مب كلامج الحلو ولا اتهاماتج ولا دفاعج ولا الغيبه والنميمه
لازم يا بنات توسعون قلوبكم وتكونين على يقين ان الله يبارك لج في تجارتج
والله يعطيج مثل ما يعطي غيرج بس لازم يكون عندج هاليقين
تذكرت ايام الجامعه كنت دوم اقولهم اذا فلانه خذت امتياز هل هذا يعني خلص الامتياز ممكن الشعبه كلها تاخذ امتياز اذا لهم حق
وهذا الكلام ينطبق على المنتدي اذا الله رزق ةحده خير فهل يعني بيقطع عن الباجيات وهل يعني الخير بينقطع لا طبعا
فاتمني ان نساند بعض وان نحاول نرتقي بمنتدانا ونحاول نتحمل ونصبر ويكون الرسول عليه الصلاة والسلام قدوتنا
وانا انصح نفسي قبل ان اوجه الكلام لكم
واشكركم على حسن الانصات