الاطفال يحبو الذره المسلوقه
26-05-1427 هـ, 11:16 مساءً
 
والله دخلتلك جرى اهو بصى يا ام زياد اولا بالنسبة للعصير:
بالنسبة للاطفال انا بفضل انك تشترى كرتون عصير زى جهينة مثلا اللى فية 24 علبة صغيرة بالشاليمون ويكون منوع وتضعى لكل واحد علبة اولا انظف واحلى واضمن من البيبسى وافيد وهما كمان بيحبوه اكتر وليكى انتى كنظافة العلبة اللى حتتشرب تترمى على طول وبالنسبة للامهات اعملى عصير فرش وخلية فى الثلاجة فى زجاجات وابقى صبى فى الكاسات او الاكواب على طول ..
ثانيآ بالنسبة للتورتة :
انا بأفضل بما انها حفلة اطفال انك تعملى واحدة بس اوردر من برة وتكون على هيئة شكل مثل pooh او ملعب كرة قدم او باربى او حسب المناسبة نقى الشكل المناسب من الكتالوج اولا حيتبسطوا جدا لان الاخراج بتاعها بيبقى بالوان مبهرة واحيانا المحل بيضع عليها لعب بلاستيك صغيرة صحية وثانيا تريحى نفسك من موضوع التورتة ياترى حتنفش ؟؟؟ياترى اعمل كام واحدة ؟؟؟ هى واحدة بعدد الافراد ولعلمك حتبقى اضمن واوفر ماتعملى تورتيتين صغيرين وانا ممكن على الخاص اقولك السعر وكدة العيال حتظئطط اكتر
ثالثا بوفية الاولاد:خفيف
يعنى سندوتشات (بوتى بان) محشية لحمة باردة بمسحة زبدة وممكن لانشون وممكن تسلقى الفراخ وتفرميها وتخلطيها بمعلقة كاتشاب ومعلقة مستردة وزرة ملح وفلفل وتحشى بيها بيحبوها وبتبقى جميلة جدا وممكن بورجر وممكن كفتة مع شيبس وطبعا البيتسا بس لما تضعيها على السفرة تكونى مقطعاها مثلثات رفيعة او مربعات مش كبيرة علشان مايتفضلش منهم وتترمى لكن لو متقطعه صغير يبقى اللى عايز ياخد تانى او تعمليها وحدات مدورة صغيرة

ملحوظة السندوتشات مشتركة مع الكبار)
ممكن جيلى بالكريمة والموز وممكن كاساتا ايس كريم وممكن كيكة المفاجآت

بوفية الكبار:
السندوتشات مع الصغار وعرق لحمة باردة مقطع ترنشات ومحشى ورق عنب وارز بخلطة وممكن بان كيك منوع يعنى باللحمة المفرومة و بالخضار وبالفراخ وممكن فتة زبادى معاهم وممكن فراخ محشية وممكن كبيبة شامى وممكن كوسة بالزبادى او سبانخ بالبشاميل

بصى يا ام زياد البوفية دة بيبقى من البوفيهات اللى مش كبيرة بمعنى ان بوفية حفلة الاطفال او المناسبة الخاصة بنسمية بوفية متوسط الانواع لكن بوفية العشاء دة بيكون اكبر منه واسمه متعدد الاكلات الدسمة

ماشى ؟؟؟؟؟؟ بس برضة منتظرة رأيك وادى احنا ناخد وندى مع بعض لحد ما توصلى لاحلى حاجة ان شاءالله
27-05-1427 هـ, 05:56 مساءً
 
حبيبة قلبى دون
جزاك الله كل خير يا قمر على مساعدتك واقتراحاتك الجميله

بالنسبه للتورته انا فعلآ كنت هاجيبها جاهزة لأنى مش خبرة فيها وكمان الوقت وزى ما قلتى بتكون احلى واوفر

اما الباقى فعندى مشكله بسيطه وهى ان الحفله هتكون فى شقه مصيف يعنى مش عندى عشان البهدله وكده
فهاضطر انى انقل الاكل من عندى لهناك وطبعآ الايسكريمات والجيلى ممكن تسيح وتتبهدل فى النقل
فعشان كده عايزة وصفات سهله النقل....

كنت عايزة اسألك انا لوعملت البيتزا من بالليل وتانى يوم سخنتها ممكن يبقى طعمها مش حلو
وبرده كنت عايزة اعمل دوناتس ينفع من بالليل ؟؟؟


ومنتظرة اقتراحاتك الثمينه يا حبى

وجزاك اله كل الخير
30-05-1427 هـ, 04:15 صباحاً
 
اقتباس مشاركة  (lovely angel)
حبيبة قلبى دون
جزاك الله كل خير يا قمر على مساعدتك واقتراحاتك الجميله

كنت عايزة اسألك انا لوعملت البيتزا من بالليل وتانى يوم سخنتها ممكن يبقى طعمها مش حلو


اة يا ام زياد متعمليش البيتسا من بليل حقولك تعمليها ازاى ؟ اعملى العجينة عادى وافرديها فى الصبنية وعلى وشها الصلصة عادى ودخليها الفرن نص سواء وتانى يوم الصبح حطى عليها سواء الجبنة لو مارجريتا او الانواع اللى عايزة تحطيها وتحطى الجبنة عادى على الوش وكملى سواها يا ام زياد حتبقى كأنك لسة عملاها الصبح


وبرده كنت عايزة اعمل دوناتس ينفع من بالليل ؟؟؟


لو حتعملية من بليل يبقى تخلصية وتقلية لكن متحطيش الشيكولاتة السايحة الا الصبح حيبقى احلى لكن متعمليش العجينة من بليل وتسبيها للصبح لان عجينة الدونات طالما خمرت يبقى لازم تتسوى


ومنتظرة اقتراحاتك الثمينه يا حبى

وجزاك اله كل الخير
بالنسبة للحلو يبقى التورتة وممكن تارت بالفواكه وممكن اكلير وممكن سويسرول بروفيترول دى كلها ممكن تتنقل ومتسحش وممكن تورتة البسكوت بالشيكولاتة وتكونى مبيتاها من بليل فى الفريزر
وانا معاكى برضه يا ام زياد لحد الحفلة ان شاءالله
30-05-1427 هـ, 02:54 مساءً
 
دندون حبيبى
بصى كده وقوليلى حلو وللا ايه

اول حاجه التورته هاروح النهارده ان شاء الله اتفق عليها

2- سندوتشات سوسيس مقطع مع بصل وفلفل وبهارات على النار ومايونيز
وسندوتشات شاورمه

3- بيتزا

4-دوناتس

5- كب كيك "بس مش عارفه ازاى ازوقها بفكر احط فيها شوكولاته مقطعه صغير بس خايفه تنزل فى القعر

6-بفكر اعمل السويسرول الحادق اللى فى الرابط ده
ايه رايك؟

7- ممكن اعمل كوكيز بالشوكولاته للاطفال

ايه رأيك اعمل فطاير صغيرة زى الساليزون بس مش عارفه اشكلها ازاى
انا بقول ممكن اعمل كرواسون صغير اوى وباتيه صغير
فياريت لو عندك افكار للفطاير الصغيره او الساليزونات ازاى بتتشكل

ايه رأيك كده حلو وللا ناقص وللا ايه

وجزاك الله كل خير يا حبى
بجد مش عارفه اشكرك ازاى
01-06-1427 هـ, 01:25 مساءً
 


الساعة الآن 06:06 .