الملل بين الأزواج شنو الحل برايكم

أولا السلام عليكم خواتي وحبيباتي حبيت اليوم أكتب هالموضوع الجديد لأنه خطر في بالي من كم يوم وكنت أعاني منه بكثرة وللحين إلا إذا طبعا لقيت عندكم الحل إن شاء الله .
الموضوع هو بعد مرور سنين على الزواج شي طبيعي الزوجين يحسون بالملل وخصوصا إذا زوجها كان دايما يقعد بالبيت بعد الدوام وما يحب الدواوين ولا الطلعات اللي مالها داعي والزوجة بعد اللي تكون دايما بالبيت طبعا لأنه بالبيت قاعد فما يصير إنها تطلع ويمكن هو بعد ما يحبذ طلعتها وطبعا مع وجود الأطفال والمشاكل اللي تصير بين الأزواج ومن هالأمور . سؤالي هو .........
وقت الزوج والزوجة لما يطلعون مع بعض لأي مكان إنشاء الله بالسيارة بس تمشي , اشلون تخلين الطلعة حلوة وما فيها زعل أو نكد قصدي هو ..... أنا كل ما أطلع مع زوجي وعيالنا ويانا أو إذا كانوا بالمدارس لازم طول وقتنا أو معظمه نكون ساكتين شنه متعاقبين يعني ما في هالموضوع المهم اللي أقدر أفاتحه فيه ونتكلم وهو بعد من النوع اللي يقول إذا الكلام من فضة فالسكوت من ذهب .
يعني إذا يبي يتكلم بس شنو طابخة أو وين نروح وشنو ناقص بالبيت وبس . والله قاعدة أحس الطلعة معاه ما تسوى أبدا ولا أحس فيها مرح أو تغيير جو أحيانا أقول ياريت ما طلعت شان ظليت بالبيت أبرك . ويامه من مواضيع سخيفة نتهاوش عليها ونظل طول الوقت متزاعلين ولا يتكلم إلا بالشي اللي صار إلى أن نوصل للبيت وبعد يكمل ويعيد ويزيد .
والله ودي إذا طلعت وياه نقعد نتكلم بمواضيع مفيدة بس بشنو ومثل شنو .
حزات أشوف زوج وزوجة مع بعض ويتكلمون ويضحكون أستغرب أقول ياربي شنو يقولون من وين يييون هالحجي وليش إحنا ما عندنا هالشي ما أدري شنو رايكم بهالموضوع أرجو يستفادوا البنات اللي يعانون من نفس مشكلتي . وإن شاء الله ألاقي عندكم الحل قريبا . خصوصا إني متزاعلة معاه من ثلاثة أشهر ونفسي لما نتصالح هذا إذا تصالحنا وردينا لبعض يكون في تغيير . أرجو التفاعل