السلام عليكم ورحمه الله وبركاته

يالتاجرات كيف بيكون عدكم مندوبات و كم تعطون للمندوبه نسبه ؟

وكيف توصلين لها الغراض اذا هي كانت بدوله وانتي بدوله
و اذا توصلين لها الغراض اكيد رح تحتاج الغراض الى شحن عن طريق البريد فهل تضيفين هالشيء على البضاعه >>> فلوس الشحن

و الوحده اذا شرت من مندوبتج و تعطي الفلوس لهالمندوبه كيف تاخذين الفلوس من المندوبه هل تحولج الفلوس عن طريق التحويل البنكي؟؟ وله كيف؟

اذا ممكن ابغي هالتفاصيل لان بصراحه انا تاجره بس ماعندي مندوبات واريد اخذ التفاصيل منكم
عشان يصير عندي مندوبات وابدأ الطلب على مندوبات

والسمووووووحه
وانا اضم صوتي للاخت اشجار وصراحه ودي اعرف لانه انا عندي مندوبات بس اعطيهم الاغراض تقريبا مثل ما اشتريها بزيادة شي بسيط جدا عسب يربحون هم

بس هم ياخذون بالدرزن لكن ودي اعرف اللي تجمع طلبيات محدده ما توصل 12 حبه كيف تحسبون لها الاسعار

وشكرا اختي اشجار لطرحج هالموضوع المهم لانه كان في خاطري اسأل عنه وزين يوم نزلتيه
دخون اماراتي
هلا اختي اشجار،،

التاجرة تعطي الزبونه سعر السلعه + سعر الشحن للجملة سواء بالبريد او شركة الشحن
(لازم تعرفين سعر الشحن بالضبط علشان ماينقص عليج المبلغ)

والمندوبة تشوف السعر وتقسمه على عدد الطلبيات وتشوف كم بتربح على كل سلعه
لما تحدد المبلغ تعطي هالمبلغ للزبونات وتبدأ تجمع الطلبات منهم والفلوس

لما تجمعهم تحول المبلغ للتاجرة عن طريق:

البنك : اتصلي البنك اللي تتعاملين معه قولي له مع اي بنك يتعامل في السعوديه، في الامارات، في وفي،، وسجلي عندك الاسماء.. واعطي المندوبة اسم البنك اللي في بلدها اللي تبينها تحول لك المبلغ منه علشان تضمنين المبلغ يوصلك كامل من دون نقصان.. لانه لو كان من بنك مايتعامل معاه البنك اللي انتي تتعاملين معاه،، في هالحاله بيتحول المبلغ لبنك وسيط ببلدك وبيخصم عمولته من المبلغ بعدين بتوصلك الحوالة ناقصه على حسابك... التحويلات البنكيه استخدمها مع بنات السعوديه فقط.

الحوالة السريعه او التلكس: موجودة بمحلات الصرافة،، تروحين الصرافة القريبه منك تقولين لهم مع اي صرافة يتعاملون بالخليج، بيعطونج الاسماء بعد واحفظيها عندك،، ان كانت المندوبة من الكويت مثلا عطيها اسم الصرافة اللي يتعاملون مع الصرافة القريبه منك.. علشان يوصلك المبلغ كامل وبدون نقصان.. ياخذون على المندوبة عمولة تحويل يمكن بين 20 الى 30 ريال/درهم..

الويسترن يونيون: حوالة على مستوى العالم توصل المبلغ خلال 5 دقايق من بلد المندوبة للتاجرة، بس ياخذون عموله مرتفعه شوي، تقريبا على الـ 200 ريال مره اخذوا علي 50 ريال.. ومرة حولت 700 اخذوا علي 75 ريال ،، على حسب سعر الدولار..

الانستنت كاش: توصل المبلغ بنفس الوقت نفس الويسترن يونيون وميزتها عمولتها رخيصه بين الـ 20 الى 30 ريال حتى لو بترسلين مبلغ 6000 ريال. بس المشكله انها متوفره ببلدان قليله بس ( البحرين، الكويت، قطر، الامارات، السعوديه، عمان، الاردن، امريكا، كندا، بريطانيا، الهند، سيرلانكا، هونغ كونغ، باكستان، بنجلادش، سنغافوره، الفلبين وكينيا.. يعني تنفع لحوالات الخدم بعد

لما يوصل التاجرة المبلغ ترسل الطلبية للمندوبة وبعدين تبدا المندوبة التوزيع
وطبعا المبلغ اللي زيدته المندوبة على البنات هو ربحها...

والله يوفقكم

سبحان الله وبحمده
اللهم اغننا بحلالك عن حرامك وبفضلك عمن سواك
وبطاعتك عن معصيتك وبرضاك عن سخطك
وبالثبات عند سؤالك
لا اله الا انت
سبحانك اني كنت من الظالمين



تسلمين اختي جناين


الساعة الآن 05:44 .