وضعت لك شعار حبيبتى وننتظرك يا قمرررررررر

السلام عليكم ورحمة الله وبركاته:

شكرا لكل التعليقات والكلمات الرقيقة المشجعة للاخوات اللى شاركونى موضوعى وبجد اخجلتونى بكلامكم الجميل. أم علاء شكرا جزيلا على التقدير.

النهاردة جايبة لكم مجموعة من الوصفات السهلة والسريعة والنتيجة على ضمانتى

1- صينية الخضار باللحمة فى الفرن على الطريقة اليونانية:

المقادير:

2 حبة طماطم كبيرة
2 حبة بطاطس
2 بصلة
2/1 كيلو لحم من كتف الخروف مقطع مكعبات صغيرة ( فى هذة الوصفة باستخدم اللحم البقرى لانى بافضله أكثر من لحم الغنم)
1 جزرة
100 جرام جبنة فيتا مقطعة مكعبات
2/1 رغيف خبز فرنسى مقطع مكعبات
ملح - فلفل - اوريجانو - نعناع مجفف - 2 م ك عصير ليمون - 3 م ك زيت زيتون

الطريقة:
تقطع كل المكونات الى مكعبات متساوية الحجم
توضع كل المقادير فى صينية بايركس ويضاف لها الملح والفلفل والاريجانو والنعناع والليمون والزيت وتقلب جيدا.تغطى بالفويل وندخلها الفرن من 30: 45 دقيقة لو حسينا أنها نشفت نزودها شوية ماء بسيطة.

2- صينية البدنجان فى الفرن مع الجبنة البارميزان والموتزريلا:

المقادير:
2 كوب بقسماط مطحون
1 كوب جبنة بارميزان مطحون( مقسم على نصفين)
2 حبة بدنجان كبيرة مقسرة ومقطعة شرائح متوسطة
3 بيضات مضروبين ومضاف لهم 3 م ك ماء+ شوية ملح وفلفل أسود
1:2 كوب من صلصة البيتزا( العبوات الجاهزة) أنا استخدمت طريقة دردشة مطابخ فى تحضير الصلصة وبصراحة أحسن من الجاهزة.
1 كوب جبنة موتزريلا مبشورة

الطريقة:
- نخلط نصف كمية الجبنة البارميزان مع البقسماط. نغمس شرائح البدنجان فى البيض وبعد كدة نحطها فى خليط البقسماط.
- بعد ما نخلص الكمية ندهن صينية تيفال بشوية زيت صغيرة ونرص البدنجان فيها بس يكون على طبقة واحدة.
- ندخله فرن هادىء لمدة 20 دقيقة أو لغاية ما يصبح لونه دهبى.
- فى صينية تانية نحط مقدار الصلصة ثم طبقة بدنجان ثم طبقة صلصة مرة أخرى ثم رشة جبنة بارميزان وهكذا حتى تنتهى الكمية.
- نغطى الصينية بالفويل وندخلها الفرن لمدة 20 دقيقة.
- لما نخرج الصينية نوزع مقدار الجبنة الموتزريلا على الوجه ونرجعها الفرن لغاية ما تسيح الجبنة الموتزريلا. وتقدم ساخنة

3- صدور الدجاج مع الخضار السوتية وصوص البشاميل الخفيف:

4 صدور دجاج (كل صدر يقطع طوليا على أثنين)
كيس خضار فروزن امريكانا مشكل
مقدار من صلصة البشاميل الخفيف.
2 حبة طماطم كبيرة مقطعة مكعبات صغيرة
1 بصلة متوسطة مقطعة مكعبات صغيرة
1 م ك صلصة طماطم
ملح - فلفل - 2 فص مستكة - مكعب ماجى - 2 م ك زبدة

الطريقة:

- نتبل صدور الدجاج بالملح والفلفل. ونشوحها فى شوية زيت صغيرة، ونضيف للزيت 2 فص مستكة.
ونلرفع الدجاج من الطاسة لما يكون استوى نصف سوا.

- فى نفس الوقت نحط الخضار على النار مع شوية ماء صغيرة ومكعب ماجى ولما يستوى نضيف الزبدة ونقلب لغاية ما تدوب.

- فى طاسة على النار نسخن 2 م ك زيت ونحط التوم والبصل ولما البصل يبقى شفاف نزود الطماطم والملح والفلفل. والصلصة ولما تغلى نوطى علها ونضيف لها صدور الدجاج تستوى فى الصلصة.

- نرص صدور الدجاج فى طبق بايركس، وبالنسبة للخضار نقلبة فى المتبقى من الصلصة وبعد كدة نحط علية 2 معلقة صوص بشاميل ونقلب كويس.

- نحط الخضار فوق الدجاج ، وبعد كدة نصب البشاميل عليه وندخله الفرن 20 دقيقة

- لما تخرج الصينية من الفرن نحط على الوجه شوية جبنة موتزريلا مبشورة وندخلها الفرن تانى علشان تسيح.

4- شرائح اللحم بالفلفل:

المقادير:
2/1 كيلو لحم بقرى مقطع شائح طولية رفيعة
2 بصلة صغيرة مقطعة جوانح رفيعة
1 فص ثوم مهروس
مشروم مقطع شرائح
1 حبة فلفل أخضر + 1 حبة فلفل أحمر+ 1 حبة فلفل اصفر مقطعين شرائح رفيعة بالطول
1 مكعب ماجى
1م ك نشا
1 م ك صويا صوص
1 م ك زيت سمسم
4/1 م ص بودرة الخمس بهارات ( الخمس توابل)
4/1 كوب ماء

الطريقة:

- نخلط الماء والماجى والنشاء والصويا صوص ومعلقة زيت السمسم الخمسة مع بعض ونتركهم على جنب.

- نحط الزيت فى طاسة على النار ولما يسخن كويس نضبف التوم و 4/1 م ص من البهارات الخمس
بعد كدة نزود 2/1 كمية اللحمة ونقلب باستمرار لغاية ما يتغير اللون ( تأخذ حوالى 3 دقائق)، نرفعها من على النار ونحط الكمية المتبقية من اللحمة ولما يتغير اللون نضيف البصل زائد نصف اللحمة اللى وضعناها قبل كدة فى الطاسة بعد حوالى 2 قيقة نضيف الفلفل والمشروم ونقلب لمدة 3 قايق أخرى.

- نضيف خليط النشا والماجى والصويا صوص اللى حضرناه قبل كدة، ولما يغلى ويصبح له ثخانه نطفى
عليه ونقدمه مع رز ابيض أو نودلز مسلوقة.

مضطرة أقطع لغاية هنا وانشاء الله أكمل الباقى فى وقت تانى