حملة اسعي ياعبدي& فيدي واستفيدي
السلام عليكم ورحمة الله
الموضوع حبيباتي مبين من عنوانه
وهو فتح باب الرزق لنا او السعي في طلب الرزق
اللي خلاني اكتب هالموضوع اني اشوف الحين الحريم ماشاء الله تبارك الرحمن كل وحده تجيد عمل او طبخه على طول تحوله الى تجاره( ما أكل أحد طعامًا قط خيرًا من أن يأكل من عمل يده، وإن نبيَّ اللَّه داود عليه السلام كان يأكل من عمل يده ). وهكذا الأنبياء والصالحون، فمنهم من كان يرعى الغنم، ومنهم من كان نجارًا؛ كزكريا عليه السلام، ومنهم من عمل بالنجارة زمنًا مثل نوح عليه السلام، ومنهم من عمل بالتجارة فكان يبيع ويشتري في الأسواق، وكبار الصحابة رضي اللَّه عنهم كان الواحد منهم يعمل بيده
وهذا هو الافضل
لا تقولن ما اقدر او استحي اوووو ...لااا انتي انوي واطلبي من الله العون ان يوسع لج في رزقج
خاصه اذا كنتي ربة بيت او ماعندج فرصه للعمل
صدقيني والله لاني احبكم في الله اقول لكم هالكلام ...اشوف موظفات ماشاء الله لاقوة الا بالله كل وحده متخصصه في شي وتبيعه يا اما في مكان عملها او عن طريق صديقاتها وما تقول انا موظفه او عندي راتب
حبيبتي العمل وطلب الرزق عباده وربي يرزق من يشاء بس المهم اخلصي النيه واشتغلي باْمانه وذمه
شوفي بعض الاخوات عندنا في هذا الصرح المبارك....كل وحده تعلن عن بضاعتها...انتي بس شدي الهمه
بقول لج على اشياء ممكن انت تجيدين فيها او تتقنيها بس ما فكرتي تحولينها الى مشروع.......حلوه مشروع
بعطيج بعض الافكار وانتي ساعديني باللي عندج....
.. بفضل من الله اني اجيد عمل هالاصناف اللي بذكرها لج الحين وانتي شوفي قدرتج والشي اللي تقدرين تقومين بعمله
1...البهارات المخلوطه والبعض يسميها بزار وكنت في مواسم وخاصه قبل رمضان اسوي كميه واوزعه كهديه على امي واخواتي وحريم اخواني وصديقاتي
2...الاجبان... اقصد تسويين تشكيله من الاجبان وتعبينها في غراش حلوه ومرتبه
3... الحنا...سواء كانت لليد او الشعر اسوي كميه واوزعه على حبيباتي اللي يحبون الحنا خاصه وقت العيدين والمناسبات
4...بهارات الحسو اللي حق النفاس اسويها حق صديقاتي اللي على وجه ولاده
5...الشيره او القطر اللي نستعمله للحلويات اسويه حق رمضان الله يبلغنا واياكم صيامه وقيامه
6...الخلطات اللي حق الفرش والغرف وهنا البنات ماشاء الله عليهم عندهم خلطات تجنن انتي بس استفيدي
الحين جبت لج الخفيف ولو حبيبتي الشغل الجامد روحي حق المعجنات والطبخات بس هذي تبي لها معاون لانها متعبه
هذي هي الافكار والشغلات اللي ممكن انج تستفيدين منها وربي يفتح لج الرزق منها
والله ماكتبت هاالكلام الا لاني احبكم في الله ادعوه العلي العظيم ان يرزقني وايكم الجنه بلا حساب..
واي طلب او استفسار عن حاجه انتو امروني ومن عيوووووووووني
أمة*الرحمن @amalrhmn_2
محررة
يلزم عليك تسجيل الدخول أولًا لكتابة تعليق.
خليك أول من تشارك برأيها 💁🏻♀️