الحمد لله الواحد الكريم
سبحان الله في تاريخ 18-8-2005 توفى ولدي اللي عمرة 11 شهر و11 يوم لأنه انولد بأمراض عديدة والسبب كان غير معروف وتأثرت بوفاته كثير لأنه بكري وما عندي غيره... لكن رحمة ربي واسعة فحملت بعد 4 شهور تقريبا.... ففتحت لي ملف في مستشفى الزهراء الخاص وملف في مستشفى القاسمي (حكومي)... طبعاً في الزهراء كانت مراجعاتي تمر بشكل طبيعي لكن القاسمي بغوا يسوولي فحص للجنين عشان يتأكدون من سلامته لكن ممكن كنت أجهض...
فرفضت وقلت رحمة ربي واسعة وما بجري هذا الفحص وبتوكل على ربي... ومرت 9 شهور من الحمل... وأول يوم في التاسع تعبت كثير وقمت أصب ماي.. سرت مستشفى القاسمي فقالوا لي وبدون فحص سونار البيبي زين وهذا الماي إلتهاب.... قلت عطوني إجازة ما أقدر أسوق لين الدوام أحس بآلام فضيعة... لكنهم رفضوا وقلوا حالتج ما تحتاج... انغضت من عدم مبالاتهم واليوم الثاني سرت لمستشفى خاص مع إختي... وشرحت حالتي... فأول ما سرت سوت لي فحص بالسونار وقالت لازم أسويلج فحص السونار الكبير فقلت خليني أسير والعصر برجع لج إنشالله... قالت ضروري ترجعين.... وسرت مع زوجي العصر عند دكتورتي في مستشفى الزهراء.... فحولتني على الأشعة... وأكدولها إن الماي بس شوي ناقص ما يأثر... لكن بحكم خبرتها قالت أنا أشوف الماي ما يكفي ولازم نولدج عملية بكرة.... رجعت البيت وأنا مستبشرة خير لكن أهلي أول ما سمعوا بالخبر إنهاروا.... وايوم الثاني الساعة 8 كلهم متجمعين حولي في المستشفى.... والسعة 2:30 اتصلت بالدكتورة قلت لها ضروري الحين تعجلين بعمليتي والا ببدأ أصيح من كثر ما أنا على أعصابي... فجت على طول ودخلتني العمليات... وأول ما خلصت العملية وأهلي كلهم عند الباب ينتظرون الخبر... والا المفاجأة إن لولد سليم ولله الحمد لكن الماي مخلص عنده فحطوه في لحضانه لمدة يومين وقام زوجي من فرحته يوزع فلوس على كل من يخطف عليه وهو فرحان وطلعت من العملية وأنا أأشرة بعلامة الإنتصار... وكأني حررت القدس... وكانت ولادتي في تاريخ 14 – 8- 2006 ورجعت البيت في 17-8-2006 مع مولود جديد... جاني حمد من الله... وسميته حمد... عشان يعوضني أنا وأبوه عن الولد اللي سار عنا في هذا اليوم....
فحمدا وشكرا للواحد المنان
فراشة بريئة @frash_bryy
محررة برونزية
يلزم عليك تسجيل الدخول أولًا لكتابة تعليق.
الصفحة الأخيرة
والحمدلله عالسلامه
غلبتينا
:)