انا مشكلتي مو بالطبخة نفسها مشكلتي أن الطبخة مافيها نكهة.
يعني مثلا العيش أسوييه لا هو مالح و لا هو ماصخ يعني ملحه زين. + الحبة جيدة النضوج لكن مافي نكهة بالأكل ما أدري ليش
كمثال: عملت سمك زبيدي مطبق (مكبوس سمك) ....... العيش طعمة اصبح مثل طعم العيش المشخول
أما السمك و ما أدراك ما السمك ، هو ناضج و نظفته عدل بس من غير طعم ما أدري ليش.
مسحت على السمك بخلطة: ملح+ ثوم + عصير ليمون + بهارات ثم قليته ووضعته فوق العيش.
لكن كل الذي وضعته ما حسيت بطعمة اثناء الغداء ما أدري تحطون شي ثاني بالسمك و الا شلون ؟
حتى زوجي كل مرة يجاملني لكن هالمرة قال : هذا كأن عيش مشخول مع سمكة مقلية !
28-11-1423 هـ, 09:20 صباحاً
 
بسم الله الرحمن الرحيم
إلى أختي العزيزة كويتية صغيرة لكي مني ألف تحية بصراحة أنا عندي إقتراح إن العيش يكون عيش الوزان بس في طريقة وهذي طريقة الوالدة وإيه لحد الآن تتبعها إن يطبخ العيش بعدين تشخلينه أو تكبسينه طبعاً إذا كان مشخول ينشخل في المشخال وبعدين بالقدر تحطين شوية زيت وزعفران على نار هادئة لحد ما يصير حار بعدين تكتينه على العيش وبعدين تحطين العيش بالقدر وترشين عليه الزعفران وتشوفين شلون يصير أما بالنسبة للمكابيس فالموضوع مطول وإن شاء الله أسئل الوالدة لأنها تعرف تسوي مطبق الربيان لذيذ بثلاثة طبقات غريب وأنا تحت الخدمة إنت آمري ودللي أفا عليك إنا كويتيين بالخدمة لأي أحد ولا نبخل على أحد.
28-11-1423 هـ, 08:07 مساءً
 
اختي ريما انتي وينك من زمان
اولا شكرا على اهتمامك و ردك
ثم .............. آنا عيشي من نوع كتكو مادري الوزان احسن ؟
طريقتك في العيش المشخول ان بعد ما أطبخ العيش و أشخله أضع في القدر قليل من الزيت مع زعفران ثم أضع العيش فوقه ثم أضع فوق العيش مرة أخرى زعفران (مع دهن ؟) .......... هل ما فهمته صحيح ؟ ................ هذا للعيش المشخول فقط.
انزين شلون اعمل مطبق زبيدي لذيذ و ذو نكهة.
نفس الشي مكبوس دجاج ، آنا أطبخ الدجاجة (نوع ساديا) مع البهارات التالية : مسمار ، هيل ، دارسين ، ملح ،نصف ليمونة . هذا ما أضعه في ماء الدجاج و اتركها حتى تنضج ثم أشخل الماء و أطبخ فيه العيش. اما الدجاجة أقليها و أضعها فوق العيش و أصب عليه زعفران مخلوط مع ماء ورد. هل طريقتي صحيحة ؟ هل في شغلات صغيرة ناقصة و تضيف نكهة للطبخ ؟
أفيدوني أرجوكم.
30-11-1423 هـ, 09:45 صباحاً
 
إلى حبيبتي العزيزة " كويتية صغيرة " الطريقة إللي فهمتيها صح وعيش الوزان أفضل من أي عيش أما بالنسبة حق طريقة مكبوس الدجاج فهو خطئ ولكي مني الطريقة الصحيحه وترى أنا مثلك عليمية بس تعلمت من الكتب وعندي لك خوش كتاب وهو كتاب فاطمة يونس يباع في مكتبة العجيري بحولي ولك مني طريقة مكبوس الدجاج :
المقادير :
دجاجه أي دجاج وزن 800 ملعقة كبيرة ملح - 8 أكواب ماء -5 حبات هيل ملعقة صغيرة لومي أسود مطحون - هيل ناعم - 3 أعواد دارسين زعفران - ماء ورد .
الحشو : -
بصله كبيرة - ربع كوب نخي مجروش - ملعقة كبيرة سمن - ربع كوب مشمش حسب الذوق وبهار مخلوط وأهم شئ البهار طبعاً أنا أشتريه من مطحنة سمراء عدن بشرق .
الطريقة : -
- تغسل الدجاج بعد تنظيفها بالملح والبهارات والخل التفاح قليل والطحين علشان تروح الزفره وبعد ماخلصين من كل هذا تغسلينه عدل من الداخل والخارج .
- نضع في القدر ماء ونضع فيه الدجاجه ونضع مع الدجاج بصل مقطع هيل الدارسين وتغلي حوالي 10 دقائق وبعدها نشخلها ونرد نحط ماي نظيف ونحط فيه الدجاجه بس من غير بصل ونحط فيه جميع البهارات وقليل من الزعفران .
- بعد السلق طبعاً إنتي عارفة نكبس العيش نفس ماعلمتك .
-نعمل الحشو : - ينقع الكشمش في ماء حار ويسلق النخي ويصفى من الماء ولي يزيد حطيه في علبه وحطيه بالفريزر حتى يكون جاهز للمره الثانيه .
-نفرم البصل ونضعه في مقلاة على نار هادئه ويقلب من حين إلى آخر مع رشه بقليل من الماء حتى يصير لونه بني ثم يضاف النخي والكشمش والبهار ويقلب جيداً .
- نقلي الدجاج بوضع قليل من الزعفران والماء الورد ونقليه بالزيت حتى تحمر من الجهتين وبعدها ناخذ نصف الحشو ونحط داخل الدجاج ونضع الدجاجه على العيش وباقي الحشو فوق العيش يم يم يم لذين مع الدقوس والطرشي وألف عافية وأنا حاضرة وبالخدمة لأي طبخه .
30-11-1423 هـ, 03:24 مساءً
 
عزيزتي 00 كويتيه صغيره 00 عورتي قلبي ياعيوني 00 شوفي أنا وحده من الناس ماأحب دخول المطبخ وايد وأدخله برمضان بس وبجمعات الاهل عندي 00 ورغم هذا عندي هواية تجميع كتب الطبخ والوصفات ,, مادري ليش) ورحت مره وانا فاضيه مكتبة عامه (اللى ممكن تستعيرين الكتب منها) ولقيت كتاب مو عندي لأخت بحرينيه (ماني ذاكره اسمها بس مو اللي موجود لهم كتب بالسوق مثل عايشه بهلول ومريم محمد عبدالله ) 00 المهم صورت منه جزء كبير ونقلت منه جزء الى أن طرا في بالي أجرب منه ,,, أووووووووووووه طلع عجيب مضبوط بالملي والطعم تحفه ,, والكل مدح أطباقه ,, وانشالله بمر هالمكتبه على يوم وأنبش عليه وأصوره كامل وأوصي يجيبولي اياه من البحرين اذا كان للمؤلفه أجزاء ثانيه 0000 طولت عليج ياعمري ,, بس قصدي انج تتشجعين وماتيأسين أبدا وبحط لج طبق منه أتمنى تجربينه بهدوء أعصاب وعلى الراحه ومن غير خوف من الفشل وحتى ان ماضبط معاج من أول مره جربيه مره ثانيه وثالثه لما ايدج تاخذ عليه ومتى ماضبط معاج عطيني خبر برساله خاصه وأنا أكتب لج طبق ثاني وهكذااااااا 00 وبالتوفيق انشالله

********* مجبوس السمك المحشي*********
***********************

المقادير :
*******
سمكه هامور أوسبيطى متوسطة الحجم حوالي كيلو(واذا بتزيدين المقدار مثلي زيدي على أساسه المقادير الباقيه,, وأنا أقطعه لقطع وماأحشيه لكن استغل الحشو للعيش على الوجه ولخلطه مع العيش أثناء طبخه مثل ماراح تشوفين 0000 أما اذا استخدمت زبيدي أوشعم أحشيه )

3-4 أكواب عيش منقى ومغسول ومنقوع بماي بارد مع قليل من الملح ونصفيه عند استعماله للطبخ00

2-3 بصلات كبيره مفرومه يعني مخرطه بالسكين ناعم (وأنا أخليهم 3 أحلى للطعم)

1-2 ملعقه صغيره ليمون أسود مطحون + 1-2 ليمون أسود صحيح مثقب

ثلث كوب لوبه مسلوقه (أممم لذيذه بشكل , بتذوقينها بعدين)

باقة كزبره خضراء مفرومه (واهي الألذ لكن لو مو موجود استبدليها ب 2 م ص كزبره ناشفه محمصه ومطحونه)

3 فصوص كبيره ثوم مدقوق مع قليل ملح وشوية بهارات مشكله

ملعقه ونص صغيره(يعني ملعقة السكر) بهارات مشكله( وممكن زيادتها شوي حسب الرغبه)

نص ملعقه صغيره زنجبيل طازج مدقوق(مفروم)

حبة فليفله خضرا مفرومه(مخرطه بالسكين صغار)

م ص ( ملعقه صغيره) كركم +رشة هيل ناعم

2 عود دارسين +3 حبات فلفل أسود عدل + 3 حبات هيل عدل مفتوح جزئيا +2 عود مسمار عدل

نص م ص زعفران منقوع في نص كوب ماي ورد

ملح وفلفل حسب الرغبه

دهن للقلي

نص م ص عصير ليمون
******************************************************
المقادير تحسينها وايد بس هي ضروريه كلها ,,, جهزيها على طاولة المطبخ كلها الاول جدامج عشان يظل عندج بس تحطين هذا على ذاك وخلصت السالفه 00 لان نص المشكله تنتهي بتجهيز المقادير مثل ماهي مطلوبه جدامج 0000 نبتدي نطبخ الحين
******************************************************************************************************

الطريقه:
*******
1-تيبين السمك ويكون ذاب ثلجه اذا مطلعته من الفريزر أو انه طازه , المهم تفتحين ماي المغسله البارد مو الحار عشان لاينهري00 والسمك محطوط بماعون أو جدر عشان ينزل الماي عليه وانتي تنظفينه وتبدين تنظفينه من داخل وبره ويكون أساسا ابو العيال شاريه ومنظفه ومصفطه بسوق السمك , وتخلين عندج فرشة أسنان نظيفه خاصه للسمك وتنظفين فيها داخل السمكه اللي ماتوصله أصابعج والماي مفتوح وانتي ايدج تنظف لما تحسين ان لحم السمك ماعاد فيه دم أو مصارين يعني صار زي الفل , تغسلينه غسله أخيره وتهزينه شوي بايدج عشان ينزل باجي الماي وتحطينه في ماعون واسع تكونين مزهبته يمج على المغسله وتنتقلين للقطعه الثانيه وهكذا لين تخلصينهم ,,وبعدين تسكرين الماى وتجيبين الملح الخشن وتكتين بايدج من الكيس وترشين على السمكات كلهم أو القطع كلهم وتدعكين كل وحده من داخل وبره عدل وتخلينه تقريبا 10-15 دقيقه( وامعانا فى النظافه والتخلص من الزفره أنا بعد ماأدعك بالملح أعصر ليمونه على القطع بعد وأخليهم مع بعض يخلصوني من الزفره) 000 بعدها أشطف القطع عدل بالماي البارد وأرد أحطهم بالماعون بعد ماأغسله بعد ماأنفضهم شوي من مايهم الزايد ,,, وأييب الطحين وأرش على القطع من داخل وبره وفي الدواعيس وأخليه ينظف من أي ريحه أو زفاره باقيه لمدة 10-15 دقيقه(مايخالف أنا شوي وسواسيه من ناحية الزفره بالايدام 00 تحمليني) بعدها أشطف سمكاتي عددددل وأحطهم بماعون واسع وغويط شوي وأخليهم مقلوبين ومبطلين شوي عشان ينزل الماي الزايد 00000000000 فى هذه الاثناء أجهز الثوم (غير المذكور بالمقادير) كميه مناسبه لكمية السمك وأقشره وأدقه مع شوية ملح وكركم وبهارات مشكله وعصير ليمونه أو ثنتين حسب كمية السمك وأدعك السمك من الخارج والداخل والخياشيم والراس وأغطيه وأخليه على جنب 000

2-ابتدي أجهز الحشو 000 آخذ ثلاث أرباع كمية البصل المذكور بالمقادير وأحطه بجدر متوسط على نار متوسطه وأقلبه وكل مايلصق أرشه بشوية ماي(أكون حاطته من الفلتر بكوب يمي عشان لاأتدوده) ونظل نقلب ونرش لين يلين البصلويميل لونه للبني 00000 هني أضيف 3-4 ملاعق كبار(مالت الأكل)دهن وأقلب وأضيف بعد البهارات المشكله (على فكره أنا أستخدم نو موجود بالجمعيات في علب مدوره صغيره غطاها بلاستيك أبيض وسعرها 420 فلس وماركتها RAJAH مكتوبه بالبنفسجي الغامج وتحتها شبه مستطيل لونه بني مايل للبرتقالي ومكتوب فيه Natural Coloured Tandoori Masala توابل تاندوري ماسالا بلون طبيعي ,, وعلى العلبه صورة بهارات ولونها العام مايل للبني البيج وحجمها بطول كف اليد الا شوي يعني مو طويله وايد 00 وسألي اللي يشتغلون بالجمعيه بيساعدونج وبتدلينها وبتشترينها انشالله 00 وان ضبطتي الطبخه وبعدها كم طبخه بعلمج وصفة بهارات عالميه ريحتها توصل أول الفريج ) 000 نكمل 0000 وأضيف بعد الثوم الموجود بالمقادير واللومي الاسود المطحون والفليفله الخضرا المفرومه وأقلب كل ماأضيف شي وبعدين أضيف الكزبره الخضرا المفرومه واللوبه المسلوقه وقليل من الكركم والهيل المطحون وأقلب المزيج بهدوء وبضمير يعني جيدا من 3-5 دقايق 00

3- أرش شوية ماي ورد من الزجاجه مو اللي بالمقادير على حشوتي وأغطي الجدر وأخليه على نار هاديه لمدة 5 دقايق ثم أرفعه 000 الحين أروح للسمكات اللطيفات مالوتي خذوا حاصلهم من التتبيله اذا هو زبيدي أو شعم أوحتى سبيطي وهامور صغيرونات ممكن أحشيهم على عدالهم حسب مزاجج ,, تكون السمكات مشقوقين من وقت التنظيف من بطنهم باتجاه الذيل ,, أحشي سمكاتي العزيزات بجزء من الحشو وأخيط بطن السمكه الى آخر الشق(مساااااكين) وأترك باجي الحشو عل جنب 00

4- أجيب جدري اللي بطبخ فيه العيش وأحط فيه 3-4 م ك دهن وأحميه ثم أحمر سمكاتي أو سمكتي حسب اللي أنا مجهزته تحمير خفيف (لاتنسين خفيف يعني ياخذ لون بس ,تنهنه يعني) على جميع الجهات على أـ تقلبي السمكه بتأني واذا كانت السمكه كبيره ممكن قطعها لنصفين 00 ثم نرفع السمك على جنب 00

5- نقلب ربع كوب البصل( اللي خشيناه في خطوه 2) في الدهنالمتبقي من قلي السمك في نفس الجدر وأضيفله قليل ليمون أسود مطحون (مو في المقادير) وأرش بالماي كل مالصق بقاع الجدر لين يلين البصل أقوم أضيف قليل بهارات مشكله (مو بالمقادير) وحبة طماطم مفرومه(مو بالمقادير) وقليل كركم (مو بالمقادير) وأضيف ملعقة دهن ان لزم الامر وأقلب المزيج جيدا بضمير يعني وممكن أضيف شوية لوبه مسلوقه(عجيييبه عملي حسابج تزيدين 2-3 م ك لوبيا لما تسلقسن اللوبيا مالت الحشو وخليهم على جنب وزيديهم الحين)

6- يضاف ماء مغلي(مغلي ها مو تنسين) يملأ الجدر للثلث وتضيفين أعواد الدارسين والمسمار والفلفل الاسود والهيل العدل والليمون الاسود الصحيح بعد مااغسله وأثقبه والملح وأترك المزيج بعد أن أقلبه ليغلي شوي

7- أييب السمك وأسقطه بالماي شوي شوي وأخليها تغلي شوي بضع دقايق يعني وأرفعه بمجرد ماتنضج 000

8- أضيف الارز للماي في الجدر واخليه يغلي لما يمتص العيش معظم الماي بعد 3 دقايق تقريبا أزيل الزايد من الماي اذا كان زاد شي منه أو أضيف ماي بعد هال 3 دقايق لو نقص كلش بعدهم يعني نشف ,, فكوني حريصه هني (لاتنسين تصفين العيش عدل قبل ماتضيفينه) ثم أغطي جدري وأوطي النار وأخلي الجدر على نار هاديه لمدة 15 دقيقه 000

9- باستعما ملاس أو شوكه كبيره أحرك الرز بتأني وأجيب السمك وأحطه على العيش على جنب بالجدر وأدفن باجي الحشو بالارز 00 وأرش ماي الورد المنقع فيه الزعفران على الوجه وأغطي الجدر باحكام وأحط تحته الحديده وعلى نار هاديه كلش أخليه يتسكر على راحته لمدة 30 - 45 دقيقه

10- لما تبين تنجبين (تسكبين) فتحي غطا الجدر(رفعي السمك والحشو بغطا الجدر على جنب أو بماعون جانبي) وبالملاس ضربي الأرز بهدوء وقلبيه على الراحه عشان تفتحين الحبات عن بعض واستمري لكم مره وبعدين اسكبي الأرز بماعون واسع(القنجه) وغطيه بالحشو والسمك 00 وقدميه مع الدقوس ( ولو انه من حلات طعمه بيطنشون الدقوس) وسلطه خضرا

وعليج بألف عافيه ياكويتيه ياصغيره وانشالله بعدين بتصيرين طباخه درجه أولى وبتتحفينا بوصفاتج 00قولي آآمين 00 واعذريني على التطويل حاولت قد مااقدر أشرح بالتفاصيل عشان أضمن انج تضبطينها انشالله))

وعزيزاتي بنات المنتدى لاتطوووووفكم 00 مجبوووس سمك روعه 00000عليكم بالعافيه
30-11-1423 هـ, 07:28 مساءً
 


الساعة الآن 07:29 .