Analysis Services
عزيزاتي الغاليات: ريما و جورية الكويت
أثاري آنا بعالم ثاني و آنا مادري عن نفسي ، كل اللي قلتوا عليه آنا ما أسويه يمكن علشان جذيه أكلي يلوع الكبد
ريما .......... الله يعطي العافية لأصابع إيدك ...... شكرا كثيرا على اهتمامك بجرب طريقتك بالدجاج و اعطيك خبر
جورية الكويت ......... بعد عمري أدري تعبت إيدك من الكتابة مايخالف تعبتكم معاي .
المشكلة ان آنا ألحين ودي أسوى سمك و كل ما قلت حق زوجي اشتر لنا سمك يقول : ( ليش ! ماله داعي خساير أكثر ، لا تسويين سمك مرة ثانية ، مابي سمك ) أمبيييييييه ياويلي الريال فقد الأمل فيني !!!!!!!!! عموما آنا بطبع الطبخة و أخشها يمكن الله يهديه.
على فكرة شوقتيني بالكتاب اللي من المكتبة العامة شنو اسمه الله يخليك يمكن ينقذني مما أنا فيه.
عندكم طبخات بعد ، الله يخليكم لا تبخلون علي
لا تنسوني ..... و مشكورين مرة ثانية
02-12-1423 هـ, 08:44 صباحاً
 
بسم الله الرحمن الرحيم
إلى أختي العزيزة " كويتية صغيرة " هها هها ضحكتيني على زوجك إنه مو راضي يشتري سمك ميخالف سوي مكبوس الدجاج وجربيه وإنشاء الله يطلع مضبوط بس إشتري كتاب الأخت فاطمة يونس وتضبطك وآمري تبين مرق الشبزي تراه لذيذ وباي باي .
02-12-1423 هـ, 10:52 مساءً
 
أختي الكويتية ... كسرت خااااااااااطري

ترى انا اعتقد انك ما تدربت على يد الوالدة ... ترى السالفة سالفة بهارات و كميتها وحتى نوعيتها ,,
يعني اشتري من السوق و طحنيه في البيت .. لا تشترين الجاهز .. لأنه فاقد النكهة .. احسن شي تزورين الوالدة الله يطول بعمرها و تدخلين معاها المطبخ ::

عموما انا كتبت طريقة ( مجبوس أمي بالربيان ) ( غوزي شبه المطاعم ) ياريت تسوين لهم بحث لأن خاصية البحث اليوم مو شغالة عندي
و عموما اللي جرب طريقة المجبوس و الغوزي مدحوها جدا
03-12-1423 هـ, 12:34 صباحاً
 
03-12-1423 هـ, 12:39 صباحاً
 
اختي ريما ............ انزين شنو عنوان الكتاب مال فاطمة يونس (أول مرة أسمع فيها ) و طبخاته مضمونة ؟
اختي ياسمينة ......... أولا مشكورة على ردك و اهتمامك و سأطبع طبخاتك
و على طاري الوالدة ترى صح كلامك آنا طول حياتي عند أهلي مدلعة شوي (آخر العنقود) و عمري مادخلت المطبخ، قبل زواجي كنت أهتم بالعلم أكثر من شغل البيت و الحمدلله متفوقة جدا في دراستي و مكرمني الأمير و حصلت على جوائز عديدة في أكثر من مجال و لي نشاطات فنية و أكاديمية . يعني الخلاصة المطبخ و شغل البيت آخر شيء في حياتي أفكر فيه. حتى زوجي انبهر فيني قبل الزواج .بس الظاهر انصدم بعد الزواج ههههههه. (عليك واحد). طبعا بعد الزواج حياتي تغيرت 180 درجة . ليس كل شيء على كيفي كما في السابق. و انسي ان فيه دلع طبعاً و لا طلب يستجاب لي و فوق هذا كله ، فاشلة في الطبخ و أخذي تعليقات من زوجي و آنا دايما أقلب الموضوع ضحك علشان مايزعل إذا طبخة فشلت و بنفس الوقت أغطي على سواد ويهي بالضحك و المزاح.
بقولكم شي بس لا تضحكون. أول أيام الزواج طلب مني اعمل فطور صباحا و قال آنا أبي بيض مسلوق و جبن مالح و كورن فليكس مع حليب. اختكم شسوت ! رحت سخنت الماء في قدر لسلق البيض. و انتظرته لما يغلي غليان 100 درجة ثم بسرعة طلعت البيض من الثلاجة (بارد جدا) ووضعته في الماء المغلي (غباء) . شنو تتوقعون صار ، تكسر البيض و هو داخل الماء و اختلط الصفار مع البياض و أصبحت للبيضة قرون و أيادي و أرجل مادري مادري شلون شكلها يعني يفشل حيل. و بكل ثقة بعد و ضعتها في صحن و قدمتها له (فوق شينه قواية عينه) . انصدم : " شنو هذا " تدرون شنو قلت له : " البيض هذا اللي انت شاريه ترى نوعيته موزينه علشان جذيه ما يصلح للسلق و صار شكله جذيه "
طولت عليكم آسفة
03-12-1423 هـ, 09:19 صباحاً
 


الساعة الآن 12:54 .

تنبيه: كل ما يطرح من مشاركات في موقع عالم حواء يمثل رأي كاتبه فقط ولا يمثل رأي إدارة الموقع.
© 1998-2017 Hawaa Forum, Co.‏