§®*§[·.*.·]™[ فـِتـــْوُنْ الإمــــَاَرَاتْ ]™[·.*.·]§®*§

§®*§[·.*.·]™ السلام عليكم ورحمة الله وبركاتة ™[·.*.·]§®*§




أتقدم بالشكر الجزيل للأخ - هزاع المنصوري

على تفضلة في شرح كيفيه كتابه دراسة الجدوى بالتفصيل
وبطريقة مشوقه وسلسة تتيح للجميع فهم غموض هذه الخطوه

وهي عبارة عن قصه تدور حول إمرأه خليجية تنوي ان تقيم مشروع مستقل بها "القصه من نسج الخيال"

ملاحظة:
تم الإستئذان من صاحب الموضوع لذلك يرجى الأمانه عند نقل الموضوع وذكر صاحب القصه


وإليكم القصة:


الحـلقــــــــة الأولـــــــــــــى







الاخت ام زايد - حرمه خلصت الجامعه واشتغلت براتب حلو وفرت منه حول
(30000) درهم وهي من بدت تشتغل مقرره انها تسوي لها مشروع صغيرون قد الحال يسليها
ويكون مصدر دخل لها وبصراحه هي دومه تحلم تكون سيدة أعمال ناجحة.
ايلست ام زايد تفكر شو تبي تسوي شو من المشاريع يكون مناسب ومب شرط ياخذ كل المبلغ بس الشرط انه ما يزيد عن الثلاثين الف .

يلست ام زايد ويا نفسها تفكر وادخلت النت وطاحت على موضوع كيف تختار فكرة مشروع تجاري ومن ضمن اللي قرته ما يلي :

اذا كنت تبي تسوي مشروع صغير لابد انك تجاوب على هالاسئله

• هل فعلا اريد عمل مشروع وافرغ نفسي له .؟
• شو هو المشروع اللي يناسب هواياتي وميولي .؟
• شو هو المشروع اللي عليه طلب وممكن اقدر اتواصل مع الناس اللي بتشتري مني .؟
• شو هو المشروع اللي يناسب ميزانيتي .؟
• شو هو المشروع اللي عندي خبره فيه .؟
• شو هو المشروع اللي اقدر اديره بسهوله .؟
• شو هو المشروع اللي اقدر احصل موظفين يفهمون انا شو ابي .؟
• شو هو المشروع اللي من السهوله اشوفه على ارض الواقع .؟
• شو هو اللي يناسب طموحي وممكن ينموا بطريقه مقنعه بالنسبه لي .؟



طبعا ام زايد طبعت هالاسئلة ويابت ورقه وقلم ويلست تجاوب ........

• هل اريد اسوي مشروع وافرغ نفسي له ؟

هي نعم انا ابي اسوي مشروع ولها الشي موفره هالمبلغ وما فيه مانع لو اخسره بس اسوي مشروع يرضي طموحي وبطريقه تضمن النجاح ان شاء الله ..


• شو هو المشروع اللي يناسب هواياتي وميولي ؟

ممممم بصراحه انا احب الرسم واحب اخطط وارسم نقوش وزخارف مكياج وووو احب اصمم ازياء وعندي ذوق باختيار الملابس ودمج الالوان لدرجة انه ربيعاتي ياخذوني اساس اختار لهم او اصمم لهم ...


• شو هو المشروع اللي عليه طلب وممكن اقدر اتواصل مع الناس اللي بتشتري مني ؟

وايد مشاريع من ضمنها صالون للحنا والمكياج وبعد محل لتصميم العبي وبعد محل لتصميم الملابس او الجلابيات لاني بصراحه من النوع اللي ما احب اتعامل مع الريايل كزباين والاهل في البيت ما يناسبهم هالشي بعد .


• شو هو المشروع اللي يناسب ميزانيتي ؟

الصالون : ممم يباله اكثر من موظفتين ويباله تجهيز ومحل ممممم يعني فوق ال 30000 يعني ما يناسب ...
محل لخياطه وتفصيل العبي : مم حلو وممكن يناسبني .
تصميم الجلابيات والملابس النسائية : بعد مشروع حلو وممكن يناسبني ...


• شو هو المشروع اللي عندي خبره فيه ؟

مممم العبي ما عندي خبره وايد مجرد اقدر اصم العبي وبس
الجلابيات مممممم هي عندي خبره لاني دوم اسير عند المصمم واصمم بروحي وانا اللي ارسم واختار الالوان واعرف من وين اشتري القطع والخيوط والمواد الاساسيه


• شو هو المشروع اللي اقدر اديره بسهوله ؟

ممكن اديره بس عندي مشكله الوقت ممممم اوكي حصلت فكره انا ممكن اسوي المحل في البيت وارتب في البدايه مع خياط انا اعطيه كل شي ويجهز لي مقابل اسعار خاصه واشرط عليه انه ما يعطي حد تصاميمي وبختار اسم للمنتجات مالي وبرتب كل شي وعقب ببيع عن طريق البيت والطلبيات يعني على صغير وعقب بكبر ان شاء الله وممكن ابيع عن طريق النت يعني ما فيه داعي حد أي صوبنا يلين ما يبتدي الاسم وعقب ممكن اشوف محل رسمي للمشروع وبها الشي يكون قدرت ايب المواد وانا اللي بتابع التفصيل وانا اللي ببيع .
مممم شكلها هالفكره طيبه ..........؟


• شو هو المشروع اللي اقدر احصل حد يفهم انا شو ابي .؟

مممم هو الجلابيات والتصميم لاني انا اللي بصمم وخياط بابوه اللي صوبنا دوم اتعامل وياه ويفهم شغلي وممكن في المستقبل انقل كفالته علي لانه صاحب المحل ما يسال عنهم وهو متضايق وكم مره قالي انه يبي ينقل كفالته


• شو هو المشروع اللي من السهوله اشوفه على ارض الواقع ؟

هو هذا محل الجلابيات لانه سهل تجهيزه وفكره اني ابتدي في البيت والخياطه عند بابوه سهله


• شو هو اللي يناسب طموحي وممكن ينموا بطريقه مقنعه بالنسبه لي .؟

هو هذا لاني كل يوم اقدر اسوي تصاميم يديده وبقدر احتكر الاسم لانه مالي ولاني انا اللي بصمم يعني ماشي خوف علي .


مممممممم خلاص اعتقد انه محل تصميم الجلابيات هي الفكره اللي تناسبني


انزين الحين الفكره اخترناها شو باقي شو باقي يا ام زايد خلني اسال الخبير العود ولد عمي خميس مشاريع
..
..
ولنا عوده ..................... مع الحلقة القادمه ...؟



«»-¸,+°´°+,¸«»¸,+°´°+,¸«»¸,+°´°+, ¸«»¸,+°´°+,¸-«»

l¸.•'تَحِيّــــــــ FTOoON_U@E ــــــــاتِي¸.•'l
l¸.•'فتــــــــون الإمــــارات¸.•'l









الحـلقــــــــة الثانيـــــــة




ونكمل الحلقة السابقة واللي انتهت بالاتصال في ولد العم خميس مشاريع ............

ام زايد ...الو هلا خميس مشاريع وين انته .

خميس ... هلا بنت العم انا موجود في الشركة انتي شخبارج .

ام زايد .. الحمد لله ... شوف ولد عمي عندي ثلاثين الف درهم وابي اسوي مشروع

خميس .. زين بنت العم وايد زين بس شو هو المشروع .

ام زايد ... والله يا ولد عمي بسوي ممممممم بسوي محل لتفصيل وبيع الجلابيات والبدايه بتكون عن طريق النت والبيت والصديقات .

خميس ... وايد حلو يا بنت العم سويتي دراسه جدوى للمشروع .

ام زايد ... ممم خبرني يا ولد عمي شو هي هذي دراسة الجدوى .

خميس ... يا بنت العم هالدراسه انج تعملين دراسه للمشروع بشكل عام ووبعد من اداره وتسويق وماليه يعني شو هو المشروع ونبذه عنه وافكارج لكيفيه سير العمل بدايه بالمواد الاوليه وانتهاء بالمنتج وكيف بتقدري تديرين المشروع وكيف بتقدري تبيعي المنتج ولمنو وهل فيه فرصه وكيف بتقدري تكسبي الزباين وكم هالمشروع بيكلفج ومتى بتوصلين لنقطة التعادل يعني بيقدر يغطي مصاريفه .

ام زايد ... اها ولد العم اذكر انه عندي بعض النصايع قاريتنها حول دراسة الجدوى خلاص انا بقريها وبجهز هالسوالف واذا فيه شي بكلمك تسلم يا ولد العم .
خميس ... حاظرين يا ام زايد يلا بحفظ الله .
:
:
:
انزين خلني اسوي دراسة الجدوى
مممممممم وين حطيت هالورقة وين وين وين
هي نعم احيدني خاشتنهم في السده اللي بطاولة الكمبيوتر
خلني اشوفها مممممممممم
هذي هي حصلتها .........
شو مكتوب بها النصايح .......

تعتبر دراسة الجدوى الاقتصادية أهم الدراسات التي تضيء الطريق امام متخذي القرارات الاستثمارية بشان الموافقه او عدم الموافقة على انشاء المشروع .

( ام زايد ) ممممممم اها يعني بناء على نتائج دراسة الجدوى هذي انا بقدر اتخذ قراري هل ينفع اسوي مشروع للجلابيات ولا لا ممممممم يعني اللي افهمة من هالدراسه كانه المشروع موجود وانا انا قاعده اديره ....... اوكي وايد حلو ....

تكمل ام زايد القراءه ( وتقسم دراسة الجدوى بشكل عام الى :

1 - الدراسة التسويقيه المبدئيه ... ( ممممممم ليش مبدئية اها لانها بس لقياس ومعرفة مدى حاجة الناس والسوق او المجتمع لوجود مشروعي ممممممم يعني هل فيه مجال ادش السوق من هالجانب ولا لا .. ) .

2 – الدراسة الفنية ( شو هذي بعد ممممممم اها ايوااااااا هذي يعني تخص الخدمة اللي بقدمها ولا المنتج اللي بسويه واللي هو الجلابيات يعني من بداية ما اشتري المواد وانتهاء بالجلابيه عقب ما تجهز مممم يعني الاجهزه لو كنت محتاجه والمكاين والقطع وغيرها ممممم انا بفتك من وايد اشيا لانه المكاين حاليا عند بابوه الخياط انا ما علي الا اشتري القطع وارسم الجلابيه والباقي على بابوه مممم حلو ....)

3- الدراسه التسويقية المتقدمه (مممم ليش فصلها عن المبدئيه مممممممم اها لانه المبدئيه بس لقياس حاجة الناس اما الحين وعقب ما عرف الفنيه الخاصه بالمنتج او الخدمه يعني لابد احطي خطه كيف انا بسوق للمنتج لانه ممكن اكتشف شي يشكل حاجز مممم يعني ممكن اكتشف اني بعد ما اقكر اسوق عبر الانترنت تواجهني مشاكل فلابد من الحين احطي اغلب الخطط واشوف الحلول لها المشاكل وبعد كيف بقدر اتميز وكيف اقدر انافس في المستقبل ممممممممممم وايد حلو .....)

4- الدراسه الإداريه والتنظيميه ( شو هذي بعد ..............ممممم هي هذي الامور الاداريه والتنظيميه في المحل ولا توزيع الاعمال يعني انا على البيع والشراء والتسويق وبابووووه عليه التصنيع او الخياطه ممممممم ما شاء الله عليه بديت افهم )

5- الدراسه المالية ( ممممم هذي اسهل شي ههههه المشكله انا ما عرف بالحسابات ممممم اها هذي يعني دراسة التكاليف لتجهيز المحل وكل الامور اللي تحتاج فلوس زين انا حاليا ما علي تكاليف وايده اللي عندي تكاليف شراء المواد من قطع وخيوط واكسسوارات اغلبها مش راسماليه يعني ما عندي مكاين ولا ايجار ولا غيره ماعليه بعدين بنعرف زياده عن الماليه ) .


ولا بد ان تحتوي الدراسه على بعض النقاط والتي توضح الاطار العام وكل ما يحتويه المشروع
العامه لابد اوضح بعض النقاط مثل :

• فكرة المشروع .
• سبب الاختيار .
• نبذه عن المشروع .


التصنيعيه :

• يعني المواد الاوليه من وين وشو احتاج .
• المنتج كيف من يبتدي يلين يخلص ويكون جاهز .
• شو احتاج من الات ومعدات .
• من وين بوفر هالامور كلها واي شي يخص الانتاج .


الاداريه :

• يعني كيف بدير المشروع .
• شو هي اقسام المشروع .
• شو عدد الوظايف ومسمياتها والعمل المطلوب من كل موظف .
• كيف سير العمل من استلام الانتاج لحد البيع .


التسويقية :

• ما هي الخطط اللي بتسويها أساس الناس تشتري المنتج .
• ما هي الخطط لزياده المبيعات .
• ما هي الخطط لكسب المستهلكين .
• ما هي الخطط للنمو والتطوير بهذا الجانب .
• كيف تستطيع ان تتميز عن المنافسين .


المالية :

• ما هي التكاليف المدفوعة لشراء المعدات .
• ما هي التكاليف لشراء المواد الخام .
• ما هي التكاليف لشراء أدوات تقديم الخدمات .
• جميع التكاليف المدفوعة سواء الرأسمالية أو غيرها .



طبعا ام زايد بعد قامت وطبعت النقاط هذي اساس تجاوب عليها ولنا عوده في الحلقة القادمة ..........؟








يسلمووو مره حلو طرح الاسئله
رااااااااااااائ عة جدا يعطيك العافية على هالطرح الممتاز
في انتظار الحلقه بفاااارغ الصبر ويعطيج ألف عافيه


الساعة الآن 10:12 .