بنت كيوت

بنت كيوت @bnt_kyot

محررة ذهبية

تعالوشوفو قصة ولادتي بابني سلماني

الحمل والإنجاب

هلا بنات.... شخباركم؟؟؟
انه الحمد لله تمام...

من غير لف ولا دوران....هذي قصة ولادتي...


الله يسلمكم... المستشفى زهقوني من التخطيط.... وانه كنت اروح عشان افتك ويقولون لي ولادة... بس ما صار اللي ابيه...
:22:
المهم في اليوم هذا كنت رايحة بيت اهلي... وقعدت الصبح الساعه 10 الا ثلث...وفيني الم خفيف.... وارسلت مسج لزوجي وقلت له ان الالم مو راضي يخف... المهم قمت من النوم ما قدرت انام... من الالم... قمت وسبحت بنتي وفطرتها... وقمت اسوي الغذا...مجبوس ربيان<<<< متفرغه...

عاد اسويه وانا اتعصر من الالم... مو قادره... المهم سويته واكلت.... ويا سلام لذيذ... بس والله الالم فضيييييييع... بس واصلت وامي سوت لي ماي وزعفران وسوت لي مساج بظهري... وبنتي شافتها وقامت مسكينه... تسوي لي هي بعد :) ... وبعدين زااااااااااد بجنون لدرجة اني قمت اصارخ... <<< بصراحه ما توقعت اني اصارخ... :hahaha: ... لان في بنتي رحت المستشفى من البداية وكنت بعدي نص سم...... المهم الالم يزيد وانه اصرخ مو قادرة حتى اتحرك.. من مكاني... وبعدين اكلت تمر وحسيت اني خلااااص... ودخلت الحمام اسبح... وتبخرت بالنسكافيه وبخووور عود... وهذا كله والالم ذابحني... وامي تقول لا لا تروحين بعد صبري شوي... وزوجي اتصل الساعه 3 بعد ما طلع من الوظيفه يسال عني امي قالت له لا تجي بعدها باقي وقت الساعه 4 حسيت اني بموت من الالم... ورحت الحمام... وانتو بكرامه... وما اسمع الا ذاك الصوت ما اعرف اوصفه بصراحه وشميت ريحة البخور.... اثاريه كيس الماي للطفل... وبعدين خفت وبسرعه قلت لامي ... واتصلت لزوجي عشان يجي...وجهزت لي الفوطة عشان احطها تحتي لان الماي غرقني وانتو بكرامه... وقمت اهربد شوي وادعي شوي واصرخ وامسك نفسي شوي لكن ما اقدر اقاوم... خلاص...واهاوش زوجي ليش جيت من هذا الطريق هذا الطريق زحمه... وهو يقول لي هذا اقرب ... وامي تقوله ما عليك منها لا تكلمها ولما قمت اصارخ ... خاف وقام يسرع... ولما وصلنا كان المغرب ودخلوني غرفة الولادة والله شكلي يضحك... قمت افصخ العبايه واقطها في مكان والشيله في مكان....والدكتوره تطالعني مستغربه مني... ولما كشفو... قالت لي الممرضه بييييييييييييه انت خلاص ولاده عصري ادفعي... والله يا بنات ما اكذب عليكم نسيت شلون يعصرون...خخخخ والله اقول للممرضه ما اعرف.... نسيت شلون اولد.. عطوني ابره... مو قادره ... واتهاوش معاها مسكينه وامسكها من ثيابها... واصارخ عليها ...ولما يروح الالم يسالوني تاريخ كم تزوجتي متى اخر دورة... كم ولد عندك...
وكلهم يصارخون عصري ...عصري ...عصري... دفعي يله ....يله... الراس بين .... وانه اقول ياالله...وامي برا تنتظر مع زوجي وكانت صايمه مسكينه...وامي سمعت صوتي اصرخ... وبعدين سمعت صوت سلماني ... ودخلت من غير ما تحس ركض داخل غرفة الولاده... وتسال الممرضه شنو جابت شنو جابت والممرضه تقول لها شلون دخلتي روحي برع روحي برع.... :hahaha: وشافت ولدي ماسكينه الممرضات ويقطعون الحبل السري وعرفت انه ولد... واتصلت على زوجي ... <<< كان بالمستشفى معاها بس كان يصلي
ولكن بعد الولاده تعبت يا بنات ... دقات القلب... صارت سريعه وجاني ضيق تنفس وعفسه :09: وخبصه...وخفت لا يصير فيني شي... قبل لا اشوف بنتي كانت واحشتني مووووت...:eek: وما قدرت انام اصلا... انتظر متى يجي الصبح عشان اشوفها... وزوجي مسكين كل شوي يجي ... لي يبي يشوف البيبي... وعمتي ام زوجي وحمواتي بعد اسمع صوتهم برع يبون يشوون البيبي وكانت الساعه 12 بالليل... والممرضه تقول لهم ما يصير لازم يرضع... اول وبعدين قلت للمرضه وديه خلهم يشوفونه... شوي ورديه... وما رضت الا بالغصب... بس الحمد لله كل شي تمام والحمد لله
108
8K

يلزم عليك تسجيل الدخول أولًا لكتابة تعليق.

تسجيل دخول

>> ســـــالي <<
>> ســـــالي <<
الحمد لله على سلامتك
ومبروك عليك البيبي ويتربى بعزك يارب
والله انك ما شالله بطلة شلون قدرتي تتحملين الالم
علميني تكفين ما ودي اروح للمستشفى من اول نغزة الم
رسيل24
رسيل24
الف مبروك ويتربون بعزك انتي وابوهم مااء الله عليك جد قويه اللي جلستي كل هالوقت
طائر الأشواق
طائر الأشواق
الحمد لله على سلامتك
ومبروك عليك البيبي ويتربى بعزك يارب
ابرة العنكبوت
ألف الحمدلله على سلامتك ويتربى في عزكم ان شاءالله..
بنت كيوت
بنت كيوت
تسلمون يا بنات... وما قصرتو