السلام عليكم جميعا....
اكتب لكم الان من الرياض...حقيقة ولا خيال :)
كنت قبل كم اسبوع ولمدة خمس سنوات متواصلة ابكي وانوح ...رجعوني لبيتنا ولامي وابوي ...
كنا مجموعة في المنتدي ..الكثير منا رجع واختفى ...والاكثر اسماء جديدة...والحياة تستمر...
اذكر السنة اللي فاتت...في ليلة من الليالي الكئيبة كنت اسمع نشيد امي اللي كانت شام مرة حطته...
المهم قلبنا ذاك اليوم لمأساة ..قعدت ليلتها ابكي لين الفجر ..الشوق للاهل كان قاتل في الغربة..
اذكر الله يذكرها بالخير الاخت حمرة الورد وست الحسن والاخت مليت من الغربة..يمكن احنا كنا اكثر ناس تلطم :) ( اذا مانيب غلطانة)
جتني ايام قلت مستحيل باشوف اهلي...ولا الرياض ولا يأسمع الاذان...كان تمر على لحطات يأس حقيقي ..استغفر الله ..خصوصا اني قضيت الخمس سنوات من غير مااروح السعودية ولا مرة :(

ورجعت الحمد لله...وشفت اهلي ربي يخليهم ويعافيهم....
عندي الكثير من النصايح والتجارب ودي اكتبها لكم للفايده..بس المشكلة النت ماهي متوفرة لي بسهولة والشغل ماخذ وقتي...بس ان شاء الله احاول اكتب وارد على بعض مواضيعكم خصوصا اني صرت مخضرمة :)

بس اتمنى يا بنات كل وحده تقرأ موضوعي هذا تدعي لاختنا الغالية (فرش ملك) ان ربي يوفقها ويسعدها ويخلي لها اولادها ويصلحهم ويهديهم ...ويحقق لها كل ما تتمنى وييسر لها ويرزقها كل خير.
كانت نعم الاخت والله...وقفت جنبي في وقت احتجت لها فيه من غير من تنتظر مقابل...
سافرت امتحن وولدت وتركت اولادي عندها بالايام....ورعتهم وكانت لهم مثل الام وارحم ...ربي يجزاك عني كل خير ..بناتي كل يوم الان يسألوني متى نروح ( لفرش ملك) :) ؟

اتمنى يا بنات ان كل وحده منكم ولو كانت مشغولة في دراسة ولا غير انها ما تتردد في تقديم المساعده لغيرها...في الغربة انتي وحيدة والدنيا ساعات تضيق عليك..احيانا ما معاك تدفعي لاحد يقعد عند عيالك ولا ما ـ تأمني لهم ..الخ...عشان كذا اقول لكم...ارجوكم يا بنات...اذا لك جارة ..صديقة ولا معرفة ...انتي بادري بعرض خدماتك عليها لان هي ممكن تخجل تطلب...ضحي بشي من وقتك ..رح تساعدين اخت لك وفي نفس الوقت لك اجر عظيم.

انا المفروض يسوون معاي مقابلة في التلفزيون :) بعد خمس سنوات غيبة عن اليلد رجعت ولا انا عارفة شي...كل شي غير...رحت الاسواق ما شريت شي...الملابس غير الملابس...وسحنة العالم غيرالسحنة....كل شي غير...حتى التفكير غير...ماني بصدد مقارنة الان...بس كل شي مختلف...نصيحة للكل ...اذا يطلع لكن تروحو زيارة كل سنة ...روحو ولا نتقطعو عشان ما تجيكم الصدمة الحضارية العجيبة اللي جتني ...

على فكرة ..تراني كنت معتزلة الكتابة في المنتدي من فترة..في مرة تخانقت مع الاخت Saudi Girl الله يذكرها بالخير وقررت ابطل ..بس ما فيه فايده يدي تاكلني :)

استودعكم الله الان ...ولي عودة ولو طولت