سلام..

اخباركم؟؟

خواتي انا قلت محد بينقذني غيركم.... خواتي مسافرين ومافي غير بنات حواء...

شوفوا... بكره صديقاتي بيون زياره عندي بعد المغرب.... وهذي اول زياره من تزوجت وسكنت بيتي الجديد... فتدرون لازم شي مرتب.....

انا قلت بقدم سلطة فواكه.... وبسوي عصيده لانه وحده منهم طالبه عصيده...

المهم اريد طريقة عصييييير حلوه واتكون مثل الطبقات...

اريد اطباق ضيافه.... يعني شو اقدم...؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

بلييييييييز ساعدوني راسي مفتر من كثر ما افكر...........
10-03-1428 هـ, 04:58 مساءً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
سوي لهم عصير .. موشرط طبقات ..احس الساده أحلى واجدد
او
http://forum.hawaaworld.com/showthread.php?t=784191
وسوي حلى قهوة مع القهوة والتمر ..حلى واحد كفاية . .
وسوي نوع او نوعين معجنات .... وشاهي طبعا
مع العصيدة ..

وبس .. والمنتدى مليااان بالوصفات الحلوووة والجديدة
وبالتوفيق .. وان شاء الله تطلع سفرتك ..أحـــلى سفرة
10-03-1428 هـ, 05:12 مساءً
 
مشكوووره دموع...

المشكله انهم كلهم بنات يعني مو كييفة قهوه....

والا اذا على حلويات القهوة عندي منهم اشكثر....

بس بنات يحبون الاكلات...
10-03-1428 هـ, 06:51 مساءً
 
ماعليه انا خيبه في الحلويات بس اسمحي لي اقترح عليج
اشيا مالحه:

ممكن تقدمين لهن بعد ورق عنب بالزيت (خاطري فيه)

ممكن تشترين دجاجه مشويه جاهزه وعقب ما تشلين عنها
الجلد والعظام فتتيها وهاتي خبز سلايس واهنيه بزبده وسوي
سندويشات دجاج مثلثه وصغيره...بيطلع شكلها مرتب وايد
ولو زاد عندج من قطع الدجاج ممكن تسوين سلطة دجاج سيزر
او سلطة معكرونه ويا الدجاج

ولو عندج عيش ابيض مطبوخ ضيفي له بقدونس مفروم وبصل
مفروم وملح وفلفل اسود وبيضه واعجني عدل....بعدين احمسي
بصله مفرومه في الزيت وضيفي لحم مفروم وبهار مثل الفلفل الاسود
والكمون والقرفه والملح.........بعدين شكلي عجينه العيش على شكل
الكبه أو كور عاديه واحشيها باللحم (وعشان ما يلصق العيش بإيدينج
الناعمه، بلليها بالزيت) حطي الكبه في الثلاجه حوالي ربع ساعه
وحمريها (ممكن تحمرينها قبل التقديم بفترة بسيطه)

أهم شي تكونين مفضيه عمرج حق استقبال صديقاتج قبل اوصولهن
بفترة مناسبه عشان تكونين جاهزه لاستقبالهن وانتي 100%

وألف مبروك على الزواج والبيت اليديد والله يديم عليج السعادة
ويحميج من كل شر
10-03-1428 هـ, 07:09 مساءً
 
مشكوره انفينتي....

ذكرتيني سلطة المكرونه.....الله يذكرج بالشهاده....
وحلوه فكرة العيش.... احسن من السمبوسه...بجرب..
10-03-1428 هـ, 07:18 مساءً
 


الساعة الآن 03:56 .