سوالف جدتي الماصله
بسم الله الرحمن الرحيم
السلام عليكم ورحمة الله وبركاته
وشلونكم وش اخباركم اكيد بخير مايصير لكم شي انتوا قطاوة بسبع أرواح طبعا مع حفظ حقوق الطبع لابو ريحه << من اولها مستشره..
من غير مقدمات ومن غير حكي فاضي موضوعي طويل ولا يحتمل التأجيل
يالله اضغطوا ستارت<< متأثره بالسوني الله لايعطي اخواني عافيه..
بينما أنا قاعد توني اتمشى بحوش بيتنا << تكفين ياالحديقه الحين تراها بلاطتين وتخب بعد..
واستنشق الهواء العليل من قعر تلك البيارات التي تمتلئ بها شوراعنا لاخلا ولا عدم<< أدمنت
الا ويرن جرس الباب رناتين متتالياتن واسفهه وانواااااع الرنرنه واسوي ثقيله واسفهه وقام الباب يخبط عاد الثالثه ثابته< اسكتي تكفين
واقوم الزق عند الباب وادعس طبلة اذني عند الخفس واقول ميييييييين؟!
مييييييييييييييين؟!
ماش محد يرد..!!
الظاهر انها (النم نم) اللي تاكل البزارين ولا ( أم عيون) وقامت خدودي تتصافق من الروعه وحسيت اني فيفي عبده متكرنه
وقلت: هيه انت ياللي عند الباب النمره غلط لاعاد تجي رح الباب اللي قدامنا مهوب انّنا غلطاااااااان غلطاااااااان
ومير انه يزود الطق ويطقني الرعب واتوكل على الخالق الذي لااله الا هو وامسك نعيلاتي بيديني عشان يمديني ادعس بهن وافتح الباب وانا مغمضه مادريت الا ذا اللي ماحطن خشتي بحصاة ويرنع برطمي بالارض مما ادى الى فصل الخدمة عن مخي مؤقتا..
وتجيني ذيك الغيبوبه اللي ماصحيت منها الا بعد مدتن مهيب طويله وماامداني افتح الا اشوف ضروسن مهيب غريبتن علي وذكرت ذاك الضرس المنكسر ايام الطفوله كان يلعبني ويشيلني عكه
وامزاكي<<<<<<<<<<<اللي مايعرفها لا يسألني
ماغيرها جدتي بس الأول تحول وانتصر الشر على الخير وصارت لاتواطني ولا اواطنها ..
ومن شافتني فتحت عيوني الا تصيح وتشق شيلتها ارتعت انا احسب اني مت وروحي صارت مختفيه ومايشوفوني
اثرها الشينه ام ضرس سقط سهوا زعلانه اني مامت. بدري عليها قاعدتن على قلبها..
قلت سوي خير ياكزكز وابدي بالصلح مابقى عليها الا كم يوم وتموت ولتس الورث..
قلت لها وشفيتس تصيحين يابعد الجدات كلهم الميتات والحيات والعقربات والسلحفات وش بس. يااميمة ابوي زعلانه..
قالت احسبتس متي . وفرحت مالت عليتس مستقعدتن لي كنتس رزان مفتكين منها في الام بي سي نطت لنا في قناة تو 2
قلت افا ياقراندتي<< جدتي بس متحضره
وشفيس علي اكيد جايه عشان نتصالح تصدقين اني مشتاقتلس ولسواليفتس ياجدتي العزيزه على حلقي
قالت: وجع مير وجع مير وجع يوجع مصرانتس ماجيت عشانس مالت عليتس ياوجه الناقه اقول انتزلعي انتي وخشتس اللي تسنها خنفسانه تحتضر..
قلت لها: انتي اللي وجع ومير وجع ومير وجع يوجع غدتس الدرقيه<< (شف العلم بس) مابعد مت وانا بنت ولدتس ومانيب ميته الحين لاتخافين انتي موقفه السرى الله يصلحتس موتي وخلي الناس بعدتس يشوفون اشغالهم الظاهر انتي من ايام ( الفراعنه) خلهم يحنطونتس بالجنادريه تراتس مصختيها عاد انتي وذا البراطم اللي تسنها دقن جورج قرداحي لاضحك...
ومن قلت ذا الحتسي وهي ماتشوف الا غباري اخاف ترجمن بشين ثاني ماتلوموني عجوز قريح ارهابيه ينخاف منها..
وادخل الغرفه واصك الباب علي واقعد بقرينه ادور هواش ومحارش لذا العجيز المستخفه..
ماادري الا داخلن علي ابوي << لاقلت اسمه اقعد اتحكحك..
ويرمقني بنظرات ليست كويسه أوي..
انا من الروعه انعدم الذوق عندي قلت له: هاه هاه خير وش تبي داخلن من غير احم ولا دستور عيب ياخي طق الباب افرض كنت البس؟؟!
قال: اقول لايكثر ياام لسانين وانثبري جعلتس الطاعون لأصكتس بذا الجهاز على خشتس مابقى الاهي بعد تصارخين على جدتس وتقولين لها مثل هذا الكلام الحقير التافه والذي ليس له أي هدف راقي ولا معنى سامي..يامال العاهه اللي ماتواسيتس يالسبيروجيرا..
واعصب انا على ذا الابو الشين وتصير دموعي ثمان ثمان واقول: يابوي هي الباديه<< باديه ولا تبسي
وانا ماسويت لها شي ياخي رح تفاهم معها كارهتني تسني قاتلتن لها واحدن من عيالها صح اني شيفه وشكلي يخلي الواحد يقول (كلي تبن) غصبن عن عضلات لسانه بس عاد موب تسذا تقعد تهزأني... تقولي كلي تبن ونثبري من غير ماتقول هالكلام اللي يضيق الخاطر ويجيب الغلقه في جبهتي وجميع شراييني وأوردتي.
والله انك تزليل حيا بعد ياايبه مرقحوك من شنبك قل آمين<< ((خربتها )) اصلا هي مهيب امي هي جدتي عشان كذا عادي اقول لها اللي ابي بس هي امك لازم تحترمها مهوب تصفقني انا مالت عليك امحق ابو..
خابرتني وانا اقول ذا الحتسي عند باب الغرفه مدري وش زحفني لأخرها واناظر خشتي بالمرايه القاها مفحطه كم كيلو عن مكانها المعتاد مابقى الا أحط شباصتين على جنب وبخة سبريه ولا مويه وسكر وتثبت للأبد مابقى الاهي تسريحه للخشش.
عاهات ذا العائله الله يعافيني ولايبلاني<< من نذالتها ماتدعي لأحد..
ومير ابوي حبسني بذا الغريفه وراح ينوم مع باقي افراد العائله باستثناء عجوز قريح..
ومغير احوم بذا الحجره الين جت الساعه وحده واختلي بقراتدتي المصونه واطلع لها بالصاله وانا كلي امل اني اتكافخ انا وكراعينها المتكرعنه.
والقاها بالصاله ممده اعضائها في كل حدب وصوب وفي كل ناحيه واتجاه وفي كل مكان وحته
وموسعة الصدر جعلة الفتق ومستحله الريموت وتغير بين الفينة والأخرى من قناة لقناة. مابقى الا شيشه لخشتها المصونه وشريط لأم كلثوم(هل رأى الحب سكارى مثلنا) و((سهرتنا الليله خلوها صباحي))
وتدخل جو محصلش ولا استوى..
حسيت اني حبيت ذا العجوز من اول نظره لشيلتها بس ماش(( تجري الرياحو بما لاتشتهي السفنو)) اول ماشافتني كشرت
وقالت: هش هش اعوذ بالله من الشيطان الرجيم عويذ الله من شرس هش انتزلعي يالعنز انتزلعي.
رحت ارسل لها نظراتي اللي ماكنت ناويه فيها شر بس ماش>> (( تجري الرياحو بيما لا تشتهي السفن))
صايرتن تسني بعيرن حاقدن على واحدن داعسن امه
وقلت لها:: اجل انا عنز انتي وهالخشم اللي تسنه تكرونيه تسوي حمام مغربي
ناظرتني بنص عين وقالت: تتطنزين انتي وهالجبهه المفلطحه اللي تسنها خشة فلبيني يصلح كفر سيكله
قلت: اقول سوير روقينا انتي ووجهبتس اللي تسنه ضب طايحتن رموشه
قالت : اقول جيبي القهوه يام عراده وصبي لي بس ولايكثر انتي واصابع رجلتس اللي تسنها صفة الوان خشبيه
قلت: والله انتس ماتستاهلين يالقاضيه بس احترااما لأبوي اللي هو ولدتس ابصب لتس يامال الضعفه انتي وذا الريحه اللي تسنها ابط ناموسه جايها شد عضلي
قالت:: وععععععععع مالقيتي الا ابوتس.من زينه عاد
قلت : اجل وش تبيني اقول جون ترافولتا ايه ابوي عاد احترمي نفستس عاد ولاتغلطين كلش الا هو لأستنزل عليتس الحين وافرشتس فرشن مهوب صاحي واخلي امة محمد كلهم يشوفون صروالتس ذا اللي تسنه ستارة ولا ذا الدراعه اللي تسنها جلال صلاة.
وتحمق علي ذا المنتهيه وتزبد وتخضر وتصفر وتحمر وهديتها على طول خفت يطق فيها عرق تعرفون هاليومين الواحد لامات جنبك سموك ارهابي لو بالنظر ومسكوك باحد ذا الاماكن وانواع التدبيج والدباغه ومايطلعونك الا وانت تافل العافيه عاد وين تلقى قطع غيار اصليه..
وصبيت لها ماتريد من القهوه واخذت ترتشف منه جرعات حتى صار دماغها عال العال وبدا المحارش من جديد.
وقامت تطالعني تسنها دوده مضيعه بيتهم ..
قلت لها: خير ايتها العقوز وش فيتس ياحصان بليس تناظريني اكيد معجبه لا مااوقع اسمحيلي..
قالت : اتفووو علتس ( طبعا مع سائل اخضروالكميه غير محدوده) من زينتس ياشوشة بليس انتي ووجهتس اللي تسنه ضفدع ينغف
قلت لها: وش فيتس اجل انتي وذا البرطم المنشق جعلتس المشق.
قالت: قبل شوي جابوا وحدتن وش زينها (بالتفلزيوون) يقولون اسمها (تنكلوجيا) بس مانيب متأكده من عايلتها بس شكلهم حمولتن سنعه..
قلت: وش تنكلوجيا انتي يالدخله اسم بنت ذا ولاوجبه جديده من كودو تخفين بي مسويه تعرفين اكثر مني انتي وهالخشه اللي تسنها نعامه حايمتن سبدها
قالت : لا هذي هي صورتها شوفيها (بالتفلزيوون) ياعيبااه وش ذا اللبس هزولت والله هزولت
قلت : الله يفشلتس يام ابوي انتي وذا الشيله اللي تسنها ركبة هندي ضايعه اقامته ذي ملكة جمال لبنان وش فهمااااتس بالسوالف هذي
وبعدين من وين جبتي تنكلوجيا ذي؟
قالت: مدري دايم اسمعهم يقولونها( بالتفلزيوون) وقلت اكيد انه اسم ذا البنت المشهورة
<< قصدها تكنولوجيا يالله نمشيها لها ذا المره مانبي نفشلها<< انتي اللي ماتدرين وين ربي حاطتس فيه..
قلت لها : اقول ياام عيون متزاعلات ممكن اسألتس سؤال..
قالت: قولي يامال المازوع والفازوع والبرطم المقطوع..
قلت لها.. انتي شاعره؟؟!..
ماامداني اخلص اخر حرف الا بسم الله علي شغلت الماطور على اعلى صرعه.
قالت: اييييييييييييييييييييييييييييه اكيد وش فهمتس انتي يالدلخه بالشعر اصلا كلكم ياشباب البيبسي والهامبونقر هاليومين ماتعروفون وش الشعر صدز ..
لاكتب له الواحد كلمتين قال انا شاعر وقام يتفخ دمجته بالخرق..
حدكم بس ذا الحتسي الماصل اللي ماله سنع..
قلت : كلن وله زمانه ياميمه ابوي عاد انتي بعد وش فهمتس بسوالفنا مسويه تواكبين الأحداث وانتي من جنبها انتي وخشتتس اللي تسنها زمزميه مكسوره عروتها..
قالت: انا قصدي انتي ووجهتس اللي تسنه بزر طاح ماصاح انكم لو تسألون واحدن انت تعرف تكتب صككم بكلمتين قال انا شاعر وتفلسف وقال( اين انت ايها الساكن في اعماقي بحثت عنك ولم اجدك وينك الله ياخذك ادق عليك ماترد ساعة ولا مقفل جوالك ساعتن اخرى هل هذا جزائي لماذا تتركني مالت عليك اصلا من زينك انقلع ولااريد رؤيتك ولااريد حتى تذكر حروفك هل نسيتني بسرعتن هكذا احسن ضف وجهك وليخسأ الخاسئون)
اقول عاد جدتي لاتمصخينها ماصار ذا شعر حتى بالنثر ماينبلع اسكتي تكفين ولاتكثرين ..
تنهدت برهتن من الزمن ثم قالت: ايييييييييه يازمن لو تعلمون ماكنا بالماضي وماصرنا لتكرهون ماصرنا وتريدون الرجوع للماضي< ياشين اللي بيتفلفس ولا عرف..
الله يرحم زمان اول انا والشايب نتراسل باشعار غزل بين كل وقت والثاني..
قلت: اخس كان بينكم حب وبينكم واسطه تنقل..
قالت : ايه الله يخلي لنا هالتطور كنا نتراسل بالايميلات واحاتسيه من وقتن للثاني ياحليله رحمة الله عليه
قلت: اقول يالعجوز المنتفه تلعبين علي وش ايميلاته الله لايفشلنا تراني ماعرفت ان فيه نت بالدنيا الا من قريب وخابرتس هذيك الايام في بداية الاحتضار وشلون اول اجل..انتي ووجهتس اللي تسنه دجاجه داعسها ددتسن.
قالت: افااااااا تسذبين جدتس انتي وخشتس اللي تسنها صارور رايح يجيب لأهله خبز.
ونشبت بيننا حربن ضروس مره اخرى< ضروس ولاخشوم.
انا الاخلاق ارتفعت ووصلت مع وحده من نخروراتي المصونات لخشمي وطلعت تتشمس
قلت لعجوز قريح: اقول انتي يام خشة تسنها وجه نمله بتعطس تراتس مصختيها عاد لااشوفتس مقبلتن علينا في بيتنا مرتن ثانيه ابسوي صلح معتس مانفع ترى مهوب حبن فيتس في ذا الورث اللي ماهقيت الا انه ديرمه وشيلتين من العصر الحجري ودراعه صفرا بها ذا الورود الحمرا تسنها اهلن بالعيد اللي من سنة جدي ماغيرتيها
احمدي ربتس اصلا اننا مقعدينتس بصالتنا ومحجره على الريموت تحجرت مفاصلتس واحمدي ربتس اني رضيت اني اعطيتس مرتزدي ومخدتي وكنبلي تنامين عليهم طبعا بعد ماتفلت عليهن تفالن مهوب صاحي عشان تهجين من الخياس بس ماش كان خياستس اقوى وغطى على الدعوه كلها بس اني مقاومه ومتماسكه وقاعدتن بالبرد تتصاقع خدودي مع اصابع رجولي من البرد وكله منتس لو اني من ابوي كان حطيتس بكيسه سودا ورميتس عند المسجد بس ماش ابوي الله يهديه يحب يحتفظ بالتراث وعارفن ان محد ماخذتس انتي وذا الريحه اللي تسنها بردقانه ماحطت مزيل عرق
قالت: اقول عاد لايكثر انتي وشعرتس اللي تسنه مكرونه قودي محترقه
قلت : مسويه تعرفين تذبين انتي ووجهتس اللي تسنه شاهي مكبوب نصه
قالت: اقول شكلي ابضف عفشي وانتزلع بيتي انا وش جابني عندتس الله ياخذتس وياخذ اهلتس يابنت مرت ولدي كش عليتس انتي وريحتس اللي تسنها ريحة ذبانه فاقده الذاكره..
وتاخذ عفشها وتلقط نعولها وتلملم ديرماتها المتنطله وترفع الدراعه اللي من عصر الفراعنه وتلبس عباتها حقت القديمين الي مالها كموم وتكش علي الا وابوي قبالها قال خير يمه وش فيتس طالعه الا تطقني النفاضه وهالمره ماصرت فيفي عبده الا صرت تسني افريقيه تسوي طقوس شعوذه ,,وقالت عجوزتنا المصونه: ابدن مااقعد عند ذا المخيسه ووجهها اللي تسنه خرقه مكتوبن عليها( الله يقرفك)
وتلم عفشها وتطلع ويجيني ابوي ويعطيني ذيك النعال على خشتي صرت تسني فنيله علاقي مشقوقه من النص ..ومعلقه على المروحه..
الفوائد من ماذكر اعلاه من حتسي:
1- (ان كل نفس ذائقة الموت) << مالها دخل بس ابحطها كيفي موضوعي..
2- ان السبيروجيرا نوع من الطحالب للمعلوميه فقط عشان ماتحسبونه معسل وتركضون عليه اعرفكم على الريحه
3-العكه وامزاكي العاب حقت بزران قديمه كانوا يشيلونا على كتوفهم ويسمونها عكه اما الامزاكي صعب شرحها يعني مايبيله تفلسف
4- تراه مجرد موضوع ولا جدتي مااقولها تسذا صدز تسان تسوي مني شوربة كوارع
5- ترى الدعوه فيها جزء ثاني بس متعيجزه اكتبه واكمل ومافيني حيل واصابعي تزاعلن من بعض وكل وحده سوت اضراب عن خشة الثانيه..
6 واخيرا- ترى موب قصدي من حتسيي عن الشعر شي لااحد يحقد علي عاد..
حكمة كزيكز..(( لاقعدت جنب واحد ومسك قلبه وبدى يحتضر حط رجلك الله لايهينك ترى موب رايحن فيها الا انت))
يالله اللي يبي جزءن ثاني يرفع اصبع رجله الصغير ويقول ((عاشت كزكز حرتن ابيه))
لا مهناش جزءن ثاني مكلفه عليكم مهوب زي (عبسي مقيتش امبارح ليه ) ماشاءالله عليه نفسه طويل .
< اما ذي بطه بلدي
انشاءالله عقبكوم ماذكر اعلاه من سوالف وذا مااعقبكوم دلوني على المحذوفه تكفون وواحد فيكم يباشر علي بليموزين..
اصلا ماكنت ناويه اكتب موضوع ولا شي الدعوه ومافيها اني ابسأل عبسي ونامق وعبادي وش معنى ((اتش اح)) وبقدرة قادر طلعت هالهذره
almsken @almsken
عضو
يلزم عليك تسجيل الدخول أولًا لكتابة تعليق.
الصفحة الأخيرة
اقووووووووول يازينتس انتي وجدتس