قصه ولاده بنتي ( ليان )

مراحب بنات اشلونكم شخباركم انه بشرتكم من جم اسبوع اني ولدت وعدتكم اني بكتب قصه ولادتي لي صار عندي وكت واكاني مثل ما وعدتكم بكتب لكم القصه


انه كان ما عطيني موعد ولاده يوم السبت تاريخ 21 /4/2007 مر ذي اليوم لا طلق ولا الم كنت خلاص تمللت حدي تعبانه وزهقانه وكنت امشي امشي ولا في فايده بس الالام خفيفه في الظهر شوي والم مثل الدوره

في يوم الاثنين كان عندي موعد عند الدكتوره العصر وكان ما فيني الم ولا شي دشيت عليها قالت لي ما ولدتي قلت لها لا سوت لي تلفزيون وكان كل شي اوكي قالت لي ابي افحصج من داخل قلت انزين

اهيه دخلت ايدها وانه ادني ورى من الالم ما قدرت استحمل قالت لي ما يصير قلت لها ايالم ما قدر المهم اهي حطت ايدها مت ايالم

وا هيه تفحص وسعت الرحم شوي الا تقول لي 1 ونص قلت زين استانست

قلت ما باقي شي خلاص دشيت الجد وبولد المهم قالت لي اذا ما ولدتي خلال يومين تعالي عشان يوم الخميس عشان حق طلق صناعي

طلعنا من العياده من ذي الصوب وبدى فيني الالم من ذي الصوب ايروح وايي بس على خفيف قلت حق زوجي ودني ابي اروح امشي وداني بس مشيت شوي ما قدرت قلت له ابي اروح البيت ما استحمل

المهم نمت ثاني يوم من الصبح قمت بدلت ولدي عشان ايروح الروضه وخذاه زوجي وداه توني منبطحه الساعه 8 الصبح ابي اكمل نومتي الا نازل علي دم خفت ما عرفت شاسوي اتصلت في زوجي وقلت له تعال بسرعه كان ما فيني الم الا بسيط نفس امس ما تغير فما هقيت اولد رحت المستشفى ولا خذيت معاي شي دخلوني غرفه الولاده وما هقيت اني بولد قلت حق زوجي انطرني بطلع بشوف ليش الدم يمكن بيجيكوني وبيخلوني اطلع وانه وعليه مادري ان اللي ايدش غرفه الولاده ما تطلع:p

دخلوني الساعه 9 الصبح وجيكت الممرضه تحت الا الدم ينزل وينزل سووا تخطيط الا التخطيط كلش مو زين اسمعهم يتكلمون يقولون قيصري والبيبي التخطيط ماله مو زين صراحه كنت وايد خايفه كل ساعه وحده ادش تقول لي فيج شي لما كنتي حامل اقول لهم لا الا ايقولون لي ان المشيمه منفصله والبيبي تعبان وكانت الدكتوره كلش زينه وطمنتني وقالت لي بنحاول ان نولدج طبيعي بس لازم دكتورتج تيي تموا اتصالات في دكتورتي لي يات وطمنتني وقالت لهم ان يفتحوا الماي ويعطوني طلق صناعي عن طريق الوريد عشان يحمى الطلق قالت لهم مني لي شوي اذا التخطيط مو زين نسوي لها قيصري وطمنتني وقالت لي برجع لج عشان اطمن عليج بس سمعتها تقول للممرضات برزوها للقيصريه يمكن في اي وكت ندخلها قيصري وخبروا زوجها لا يروح مكان عشان ايوقع حق قيصري اذا احتاجت كان مسكين زوجي خايف ويدش علي وشوي ويصيح الصراحه كنت خايفه بس كان عندي ادعيه خذيتها من المنتدى واقرى واقرى ان اولد بالسلامه :)

المهم بدى الالم ايزيد وانه اتالم واقرى اتالم واقرى وشوي شوي ايزيد الا شوي يات الدكتوره وشافت التخطيط الا تقول لي خلاص بتولدين طبيعي ما يحتاج قيصري استانست هذي من الادعيه اللي خذتها الحمدالله :)

الساعه 12 ونص الظهر الالم حده اقول للممرضه جم صرت احين الا تقول لي 2 ونص :06:

ها شنو 2 ونص على هالالم 2 ونص:06: الا داش زوجي وانه اصيح جني ياهل من الالم وزوجي ما يعرف شيسوي تميت اصارخ للممرضه ابي ابره ابي ابره يات لي قالت لي اي ابره قلت لها ابي ابره الظهر نادي لي الدكتوره ابي ابره ما استحمل وانه قاعده اصيح وزوجي يمي طلع زوجي ما استحمل

تميت شوي الا الدكتور يه تم ايهديني ويطمني وان ما بتالم عقب ما يحط لي الابره وكان الم الطلق ما استحمله المهم بدى ايحط لي الابره وقالي لا اتحرك لما ايحطها بس لما ايي لي الالم اقول له اصبر ما اقدر ويوقف ويرد يرجع ايكمل شغله والله الصراحه عنايه من كل صوب الحمدالله لما حطالي الابره ارتاحيت من الالم اللي كنت احس فيه من بطني وظهري راح بس كنت احس بالم خفيييييف تحت:) ونمت وارتاحيت من الساعه 1 ونص لي الساعه اربع العصر

لما صارت الساعه 4 ونص العصر كنت احس بالم تحت اني ابي ادفع ناديت الممرضه اقول لها تعالي بوش بوش جيكت الا 8 سم قالت لي لا لا صبري قلت لها ماقدر برزت الاغراض ونادت الدكتوره والممرضه الثانيه لما صار وكته ماقدرت ما فيني طاقه كنت ادفع بس ما فيني قوه وتقول لي يلا يلا اقول لها ماقدر وتقول اشوف راس البيبي بعد قوه وادفع وادفع

وولدت بنتي ليان يوم الثلاثاء تاريخ 24/4/2007 الساعه خمس وعشر دقايق المغرب :icon28: وسمعت صوتها تميت اقول للممرضه ابي اشوفها ابي اشوفها لما جابتها بحضني نسيت التعب كله :)

ثاني يوم يات لي دكتورتي تطمن علي تقول لي فلتي من القيصريه اقول لها الحمدالله تقول لي كنتي خلاص قررنا ان نسوي لج قيصري بس الحمدالله صار كل شي زين وانه اقول في نفسي الحمدالله من الادعيه والقران اللي كنت اقراه لما كنت في غرفه الولاده سبحانه الحمدالله والشكر يا رب على كل شي


واتمنى انشالله من كل الحوامل ان ايولدون بالسلامه يا رب