السلام عليكم ورحمة الله وبركاته
احب اشكــر كل اخواتي الي وقفن معي بمحنتي سواء بالعام او بالرسائل الخاصه والصراحه نصائحكم ساعدتني في حل امور وايد كانت مو راضيه تتحرك ومثل الحجر بطريقي
.
.
بالنسبة لهذاك اليوم الي علمتكم فيه اني بطلب الطلاق صليت استخاره ورحت لزوجي وقلت له يافلان
الي خلق الحياه خلق لها موت قال وبعدين مثل الي يبي يسكر الموضوع ...قلت انا ابي الطلاق فتح عيونه مستغرب من طلبي قال شو تبين قلت ابيك تطلقني قال اوكيه متى تبين اطلقك قلت الحين قال خير ان شاء الله وطلع للحوش ورحت انا ارضع ولدي بغرفتي وجا لعندي وقال انا ودي افهم انا اتعب نفسي لمن ؟ اشتغل وارتب اموري لمن!!! قلت لنفسك ولعيالك وقال وانتي مالك شئ عندي يعني قلت لو لي شئ ماكان على كل موقف اما تهاوشني ولا تضربني ولا تعايرني ولا تخليني وتطلع ماصارت حياه اهذي الين متى انا بتحمل اسلوبك هذا ؟ لو كنت تبي زواج روح تزوج بس مو على حساب مشاعري تراني فاتحه لك المجال ...بس خليني اعيش لعيالي الله يخليك يكفيني الي فيني من تعب ابوي ونفسيتي بروحها تعبانه :icon33: ...سكت وطلع مره ثانيه للحوش ورجع لي قال بسالك سؤال واحد وابيك تجاوبين بصراحه انتي تبين غيري في راسك رجال غيري في هذيك الساعه والله ماعرفت شو اسوي اكمل بكاء ولا اضحك ولا شو شعوري حتى اني سكتت من الصدمه سؤال غريب ...قلت انت تمزح ولا تسال صدق قال ماادري عنك قال يابو فلان انا عندي صديقات الدراسه لليوم ماتزوجن واعرف بنات من العشرين والين وصلن الاربعين محد تزوجهم يعني من هذا الي بيقوم بياخذ وحده مطلقه وعندها سبع عيال اكبرهم 12 واصغرهم شهر !!! الي بيتزوج يبي وحده تتفرغ له مو وحده مو محصله وقت تنام فيه من كثرة مشاغلها عند عيالها ...قال عيل ليش تبين الطلاق قلت لاني مليت منك واسلوبك كرهتك من كثر ماتحتقرني وتعاملني بجفاء ...مسكني من يدي وفتح درج مكتبه وقال اقري هالاوراق وبتعرفين ليش انا متضايق طالعت مستغربه وقلت شو ماكانت الاسباب هذا مايخليك تمد يدك وتسبني قال انتي مو حاسه اني مهموم ومتضايق قلت انت طول عمرك متضايق ومهموم ومشغول قال انا كذا طبعي عاجبك ولا لا قلت لا مو عاجبني ولا اني مجبره اتحملك ورميت الاوراق وطلعت لغرفتي ...
جا عندي ووقف وقال شفتي واحد يمشي بصحــراء وماعنده الا لتر ماء يكبه ويمشي قلت لا قال انتي عندي مثل هالماء مستحيل اتركك الا الموت يفرقنا ...عجبك كلامي عجبك ماعجبك عساه ماعجبك وراح ينام بالغرفه الثانيه...الصراحه اسغربت من رده وسالت نفسي معقوله هذا المخلوق يحبني لهذي الدرجه ...المهم صحينا الصبح ولاول مره القاه صاحي قبلي اتاريه مانام طول ليلي من التفكير راحوا العيال للدوام وهو اخر طلع وقبل لايطلع قال ان شاء الله هديتي قلت الي فيه الخير الله يجيبه والحمد لله بنات تبون الصدق انا متضايقه لانه رفض يطلقني ومستغربه تمسكه فيني ووالله ماادري شو الحل بس اكرره اللهم لك الحمد والشكر على هذي الحال وعلى كل الاحوال عموما انا لليوم مااعطيته وجه بذاك الزود بس قايمه بواجبي واحس انه هو يدور الفرص علشان نتكلم مو مثل قبل مطنش والله يعين ويرحم
العنقوده @alaankodh
عضوة جديدة
يلزم عليك تسجيل الدخول أولًا لكتابة تعليق.
اختيالعزيزه الصبر مفتاح الفرج اصبري ووالله قصتك نقطه في بئر ممن شاهدت من اجل اولادك لا يهم الله يهديه للخير ويعطيك الصبر والعافيع ولا تطلبي الطلاق كوني مع اولادك شوفي نجاحهم وسوف تحل بأذن الله ...اللهم اهدي ازواج المسلمات للخير.......وفقك الله......
boooby
•
الله يفرج همك ويصلح لك زوجك ويصلحك له
وانشاء الله زوجك بينصلح حاله لا تتمسكين بطلبك للطلاق حرام عندك سبعه من الأطفال والله مالهم غير بيت ابوهم الله لايحوجهم لغيره
ولوكان زوجك بايعك كان طلقك لكن واضح انه يحبك
حاولي تعدلين من حاله لكن لا تهدمين بيتك
وانشاء الله زوجك بينصلح حاله لا تتمسكين بطلبك للطلاق حرام عندك سبعه من الأطفال والله مالهم غير بيت ابوهم الله لايحوجهم لغيره
ولوكان زوجك بايعك كان طلقك لكن واضح انه يحبك
حاولي تعدلين من حاله لكن لا تهدمين بيتك
الحمد لله على كل حال يمكن تنقلب الموازين ويكون احسن من اول
ايقني حبيبتي ان ربي اذا بيسويلج شي اكيد راح يكون فيه خير وصلاح لج
ايقني حبيبتي ان ربي اذا بيسويلج شي اكيد راح يكون فيه خير وصلاح لج
الصفحة الأخيرة
ويهديك لزوجك ويهديه لك والزواج ترا فيه وفيه والصبر مفتاح الفرج
وزوجك مبين يحبك بس هذا اسلوبه وشخصيته
اختي فكي معه صفحه جديده واغفري له زلته وصدقيني هو قدرك وعرف قيمتك ولا ماكان اعتذر لك ولا تكرري طلبك هذا مره ثانيه ابدا وتذكري كثرة الدق يفك اللحام لاتزودي اسلوب الطناش كثير والله يعينك