تكملة:هالرجال مشاكله ما تخلص أبي اتطلق تهيء تهيء؟

تكملة الموضوع بإذن الله راح اطرح فيها بعض الحلول للمشاكل الزوجية اللي جربتها واللي سمعت عنها او قرأتها
للتخفيف من المشاكل:
أولاً:وهو مهم جدا
1-قراءة القران في البيت لان البيت الذي لايقرأ فيه القران بما معنى الحديث كالبيت الخرب
ترضين يكون بيتك خرابة ومعشعشة في الشياطين تمحق بركة الرزق والاكل وتزيد المشاكل وعاد الشيطان احب شيء له المتزوجين يظل وراهم وراهم لين يتطلقون فالشيطان كما ورد في الحديث بما معناه يكرم الشيطان الذي يفرق بين الزوجين عن بقية الشياطين
وعن تجربة شخصية- وسمعتها من كثير من المشايخ – اقرأي سورة البقرة كاملة-تاخذ منك ساعة وعشرين دقيقة متواصلة- كل يوم او 3ايام ثم انفثي في الماء اللي تشربونه والزيت والبيت وغرفة نومك وغرفة الاولاد وعلى الزوج وهو نائم ممكن ايضا تقرأين عليه الفاتحة 7 مرات والمعوذات واية الكرسي بغرض الشفا والهداية. وكذلك سبحان الله سورة البقرة تطرد الشياطين من البيت وتشفي من العين والسحر وحماية منها.

2-لازم نعرف انه احنا مسلمين تعرضنا للمشاكل ولله الحمد فيه تكفير لذنوبنا يعني لازم الواحد تحتسب صبرها على مشاكل الزوج يعني مو كل مشكلة تتذمرين منها وتشتكين لامك وابوك والجيران وخالاتك ومن يعز عليكم هذا اكبر غلط كذا بتكونين ضيعتي على نفسك الاجر يعني المشاكل حاصلة حاصلة ليش ما تستثمرينها وتخلينها اجر ولاتنسين انك لما تصبرين الله بيكون معاك ((إن الله مع الصابرين)) ولما تشتكين للناس ترى تنزلين من عينهم لانك خليتهم يعرفون اسرارك او بتصيرين محل شفقتهم وانا اقول هذا الكلام مو بمعنى انك ما تفضفضين لاحد فضفضي لكن لاحد تعرفين انك بتستفيدين واكيد الشخص ما يكون امك عشان ماتكره زوجك لان الام ما تنسى غلط الزوج في حق بنتها تكرهه والزوج يراضي زوجته وترضى اما الام تبقى مفتكرة الخطأ
والان في جمعيات في المملكة حل المشاكل الاسرية على التلفون تحلين مشاكلك المعقدة او حتى البسيطة مع اختصاصين علماء واطباء نفسيين وشيوخ وترى شيء متطور جدا وسرية تامة تتصلين عليهم ويفتحون لك ملف باسمك الاصلي او المستعار بكيفك ويتصلون عليك لو حبيتي ويحددون لك مواعيد ويتابعون حالتك الله يجزاهم خير الجزاء
4- انظري الى نفسك يمكن تكونين بعدت عن الله شوي فالله حب انك تتقربين له بالدعاء والالتجاء إليه أو الله حب يرفع منزلتك في الجنة فابتلاك بهذا الزوج صاحب المشاكل عشان كلما صبرتي ترتفع منزلتك في الجنة وتخيلي لما تصيرين في الجنة وأنت تشوفين اجر صبرك واش كثر الله راضي عليك بتفرحين وبتتمنين لو آن مشاكل زوجك كانت أكثر وأكثر عشان تصبرين ويزيد أجرك.
5- الرجل يحب أن تكون امرأته ذات دين وهو يرتاح لك أكثر إذا حس بأنك إنسانة صالحة تصلين على وقتها وتنصحينه بالصلاة وتأمرينه بالخير ببر أمه وأبوه ويحب يسمعك تدعين له وقولي له والله ياعمري تذكرتك وأنا في سجودي ودعيت لك ونسيت نفسي من كثر مادعيت لك ب(الشيء اللي يحب أو تفريج كربه هو فيها اوبالهداية والجنة) ويحب أيضا انك تواسينه في مصائبه بالدين أحفظي أحاديث تفريج الكربات والثواب والرحمة وذكريه بالله في الوقت اللي تحسين قلبه لين وقت المرض وقت المصيبة وقت يكون هو ضعيف بسبب من الأسباب النفسية العائلية أو ضغوط الحياة قربيه لله بالوعظ الحلو انت اول من بيرتاح إذا صار زوجك صالح.
6- شي مهم للتخفيف من المشاكل والضغط النفسي مو بس في حياتك مع زوجك أيضا مع ضغوط الحياة المختلفة هو حديث النفس الكلام اللي أنت تقولينه بصدرك لازم ما يكون حديث سلبي ابدآ ابدآ لماذا؟ لأنه هو الذي يصنع السلوك فهناك مقولة نفسية: أنت تصبح ما تفكر به دائما . ماذا يعني؟ يعني ما تقولين في نفسك أصلا هو مايحترمني لو يحترمني ما سوى كذا وتشحنين نفسك بها الكلام السيء سلوكك وردة فعلك راح تنبني على هالاساس وبالفعل بعد فترة راح يصير الزوج كذلك و أنت بتهتز ثقتك بنفسك لأنك أصبحت غير محترمة وهكذا. يعني مثلا يتأخر الزوج عن البيت لا تجلسين تشحنين نفسك هذا فيه وفيه وأنا ضعيفة شخصية آه لو إني قوية زي صاحبتي فلانة وتحرقين في نفسك بتصيرين ضعيفة فعلا وبتنظرين لصديقتك على إنها أحسن منك بتصغر نفسك في عينك وهذا شيء مؤلم وبتكون ردة فعلك تجاه غلط زوجك انفعاليه وبينقلب الخطأ عليك أو ماراح تستفيدين من الكلام معاه لأنك بتكونين منفعلة أكثر من اللازم والانفعال مايجيب نتيجة ماراح تتفاهمون على شيء
لا تستجيبي ابدآ للأحاديث السلبية أبديليها بأحاديث ايجابيه أو اشغلي نفسك بأي شيء انترنت ملابس صاحباتك خلي كلامك مع نفسك أو مع الناس عن الأشياء الحلوة في الحياة والضحك والوناسة والله الناس بيحبونك واهم شي أنت بتحبين نفسك أهم شي لا للأحاديث السلبية لأنها تخرب نفسك وبتصيرين إنسانة حقودة حسودة أو بيجيك اكتئاب مع مرور الأيام.
7- ابتعدي أيضا عن الرسائل السلبية تجاه الزوج لان كل خمسين رسالة سلبية توجهينها للشخص فأنت قمت بزرع سلوك داخله يعني ما تقولين لزوجك أنت مالك دواء السهر لازم ما تصبر عنه- انت اناني- أنت ميئوس منك- أنا عارفة انك ما تحترمني – أنت ماتهتم فيني وهكذا كل جملة إذا انعادت على الإنسان خمسين مرة تصنع سلوك ابحثي عن الأشياء الايجابية وأبرزيها ابتعدي عن النقد المباشر فالرجل يحب المدح ويكره النقد خاااااصة من زوجته أرسلي رسائل ايجابية وتوقفي عن الرسائل السلبية.
8- لا تكوني واحدة من هاتين السلبية والمدققة
فالسلبية لا يشعر الرجل بوجودها في حياته فهو بعد الزوج يكمل ما كان عليه أيام العزوبية ماشي على نفس الجدول إن خيرا فخير وان شرا فشر والأدهى والأمر لما تصير المرأة معتمدة على أهلها في المصروف ولا المشاوير يعني الرجال( أكل ومرعى وقلة صنعه) أو لما يصير الغلط من الزوج تجاهك تقولين أنا أبي اصبر واستحمل وتكتمين في نفسك قهرك على بالك هو يدري انه داري انه غلط وأنت صابرة وتتخيلين انه في يوم من الأيام بيقولك شكرا استحملتيني تحلمين الرجل غالبا يجرح شعور المرأة بكلام على باله عادي زيها زي أصحابه أو إخوانه الرجل لايبالي بالأمور اللي فيها مشاعر بينما المرأة تمووووت في الأشياء العاطفية
لاتحسبين انه راح يحبك لأنك مخففة عليه بالعكس الرجل راح يبحث عن واحدة أخرى عشان يقدر يعطيها وتحسسه بأنه موجود وله فائدة الرجل بعد الزواج يحب أن يكون هو المعطي وهذا الإحساس يزيد رجولته والرجل الذي تحرمه زوجته من آن يكون معطيا فهي تعمل على إطفائه وهذا مو كلامي هذا كلام علمي من خبراء نفسيين امريكيين والواقع شاهد على كلامهم ولا تقولين أنا مو محتاجته موظفه ولا أنا بنت فلان والله المرأة مهما كانت وجود الرجل في حياتها أمر فطري شوفوا حال اللي ما بعد تزوجوا- العوانس- تحس أنها ناقصة لو أنها بنت فلان وفلان

أما المدققة فهذه هي المسكينة الحقيقية فهي حارقة نفسها ومبقبقه عيونها تراقب زوجها في دخلته وخرجت وإذا خرجت معاه عينها على عينه نظر في هذيك ولايمكن هو يشوف اللي هناك قاعدة غيرة وشك وحساب وين كنت وين رحت واش قلت أش سويت ؟
والله في قصة أنا شاهدة عليها رجل كان يحب زوجته هو أحلى منها واصغر وهو يحبها ويصرح بذلك أمامها وخلفها لكن وكم مرة أنا سمعت منه مدحا لها لكن هي شديدة الغيرة مع إنها امرأة مثالية ذات دين وعلم وووو لكنها تغااار عليها تراقب حركاته وتصرح له بها الشيء تصدقون انه صار يكرهها أو يمكن يتجنبها صار دايم يسهر وإذا ماسهر عالنت وووو بعدما كان يضرب فيه المثل تدقيقها قلب حياتها نكد والانسانه هذه أنا اعرفها معها كولسترول وضغط وووو

على ايه حرقة الأعصاب الوحدة منا لوبتابع أخطاء زوجها ماتخلص وبتطلع لها أشياء وأشياء وبتسيء الظن فيه وبتكره حياتها معاه والغلط لو كان صغير بيصير في عينها كبير
في امرأة كبيرة إنسانة صالحة احسبها والله حسيبها ولا ازكي على الله أحدا كانت تقول الرجل مثل الطفل لوتابعتيه وحطيتي عقلك بعقله راح تتعبين لكن كبري عقلك عن عقله ترتاحين.
أكيد هالحين بتتسائلون يعني اش نسوي لا السلبية مرتاحة ولا المدققة مرتاحة اش الصح؟
الصح ياحبيباتي ياحلوين إنا ما نظلم ولا نرضى بالظلم على أنفسنا يعني حقوقك تطالبين فيها وتصبرين على طلبك لها مع مرور الأيام وتستخدمين شتى الطرق انك تأخذينها يعني مصروفك ومشاويرك المهمة والترفيه غير المبالغ فيه ملابسك الأشياء اللي ما تستغنين عنها وهي شرعا وعرفا من حقك لازم ما تتنازلين عنها أبدا أبدا وما تبالغين في طلباتك على الموسر قدره وعلى المقتر قدره ودامك تطالبين بحقك فالله معاك ويعينك وادعي دايم واطلبي من الله العون وصدقيني بهذه الطريقة أنت تساعدين زوجك على انه يصبح رجلا كامل الرجولة في عينه هو قبل أن تريه أنت كذلك وبيحبك لأنك أنت اللي محسسته بها الإحساس وانتبهي لوكنت من اللي أهلها يعطونها فلوس انك تقولين له ترى بيبخل ويعتمد ويحس بنقص في رجولته يعوضه بزيادة المشاكل واكبر دليل على كلامي إن اغلب المدرسات والموظفات مشاكلهم أكثر من غيرهم لان الزوج يحس أن زوجته مستغنية عنه فيثبت وجوده بالمشاكل لوكنت موظفة اتفقي مع زوجك على حل بأي طريقة بحيث انك ماتشعرينه إن راتبك سبب في الاستغناء عنه.
هذا من ناحية الماديات أما من ناحية المشاعر والسلوك فيجب انك ما ترضين بالغلط اللي يحصل أمامك كبير أو صغير وكل فعل له ردة فعل مساوية له في المقدار معاكسة له في الاتجاه يعني مثلا غلط صغير مثل انه يسب ابنك سب سيء نوعا ما ياحمار ماتردين عليه وتقولين له أنت الحمار مو ولدي كذا خطا يعني قولي له حديث ماكان الرسول صلى الله عليه وسلم فاحشاً ولا متفحشاً
المسلم اخو المسلم لا يشتمه ولا يحقره
الكلمة الطيبة صدقة
وليدك مالك غيره بكرة ماينفعك إلا هو..........
يعني دقيه دقه كذا وهو بيفهم انك قاصدته.
واهم شيء تكونين أنت قدوة حسنه يعني ماتكونين تنهينه عن شيء أنت تسوينه
مثلا رفع صوته عليك وانتم تتناقشون في موضوع ما إذا كان هو اللي يبغى يتفاهم فولي له ماراح أرد عليك مادام تكلمني بها الصوت وانسحبي بعد كم مرة صدقيني راح يتغير ويصير يتفاهم معاك بصوت هادي وهذا الشي يساعده على انه يكون متفهم أكثر.
وكذلك عندما يشتمك قولي له أنا مااسمح لك بهذا الشي تكلم معي بالاحترام وطنشيه ولاتردين الين يتكلم باحترام ولازم تكونين قاصدة هالشيء يعني تتكلمين وأنت واثقة من نفسك مرة على مرة بيتغير.
يعني ردة فعلك بالنصيحة والإيحاء وتعابير الوجه ولازم تكونين محترمه في ردة فعلك ما تسيئين له كذلك بالمقاطعة في الكلام والضحك ولازم في هذه الأثناء-المقاطعة- تكونين على سنجة عشرة عشان يتمنى رضاك وكل وحده اعرف بزوجها بس أهم شيء لاتهينيه في رجولته لاتجرحينه بكلمة يتذكرها لك وما ينساها.
وهذه الأشياء سهلة تطبيقها في بداية الحياة الزوجية لكن لما يتعود الزوج أن الزوجة تسكت له على الخطأ بيتعود يخطئ عليها.
طيب لو كان زوجك شكاك هنا أقولك الشك حالة مرضية زي البخل بس له درجات يعني إذا كان الشك تلميحات هنا حاولي أن تتجنبي الأشياء اللي يشك فيها يعني جوالك خليه مفتوح أو علميه الرقم السري وحسسيه بالأمان ولا تروحين أي مكان إلا بعد ما يكون عنده خبر أو خذي أذن مفتوح مثلا لمشاويرك اللي مع أمك أبوك أخوك أختك وهكذا واقلها أرسلي له رسالة اعطيه خبر والشك عن خبرة بيروح مع الأيام بس أنت لازم تحسسينه بالأمان الرجال في هذا الزمان صار عنده شك من كثر مايشوفون ويسمعون زمن الفتن لكن لما يطمأن لك مع الأيام بيرتاح أنت لما تروحين مكان حكيه لاتخلين شيء فيه الغاز خليك منفتحة معاه خليه يحس بالأمان وانه فاهمك وإذا طلب منك تحلفين له احلفي لاتعاندينه راعيه على قد حالته
الشك غالبا ما يكون نتاج غيرة زائدة سببها حب زائد أو اختلاف بين بيئة الرجل والمرأة
أما إذا كان الشك تصريح فهذه حالة تستوجب تدخل طرف ثالث لأنها ممكن تكون ناتجة عن إدمان أو عن حالة نفسية مضطربة ولازم يكون الطرف الثالث من أهل الزوجة شخص واعي ومتفهم كذلك أمه وأبوه إذا كانوا متفاهمين لازم يدرون.

9- عند النوم
يعني طريقة نوم الزوجين تحدد كيف علاقتهم ببعض في أول الزواج لازم تعودين نفسك انك دايم مع زوجك في الفراش إذا دخل ينام تكونين جنبه لابسه قميصك الحرير أو الاندر وير الناعمة وريحتك حلوة عطر ناعم مايكون صارخ لييييه؟ عشان تلصقين فيه وتنامون وانتم حاضنين بعض إذا قدرتي تعودينه على هالنومه وتتعودين أنت عليها فأنت وفرتي على نفسك مشوار كبير في حل المشاكل فطوال ما أنتم نامين بهذه الطريقة تكونون في الحقيقة تشحنون بعضكم بالطاقة الايجابية إلا وهي الحب الشيء اللي بيخليه خاضع لك وأنت خاضعة له ويذوب الترسبات اللي حصلت خلال هذا اليوم وهذه الطريقة تجبركم على شيء جميل إلا وهو إنكم لن تناموا إلا وانتم متصالحين.
لازم ماتنامين إلا وأنت راضية على زوجك وهو راضي عليك إذا كنت غلطانة روحي اعتذري له وبوسي فيه لين يرضى وقولي له الحديث إن العبد اللي ينام وفيه غل على مسلم
وإذا كان بيصرفك وقال لك خلاص رضيت قولي له طب هات بوسه عشان اعرف انك رضيت واصبري وإذا اخذتيها قولي الله يازينها مافيه وحده ثانيه again
بهذه الطريقة تحسسين زوجك انه إنسان محبوب وقريب بالنسبة لك وبالتالي هو راح يدللك ويحترمك اقلها راح يخفف مشاكله معاك.
وإذا كان هو الغلطان والقطيعة استمرت كم يوم لازم مايطول الزعل بينكم أكثر من 3 أيام وذكريه بحديث ((لا يحل لرجل أن يهجر أخاه فوق ثلاث ليال يلتقيان فيعرض هذا ويعرض هذا وخيرهما الذي يبدأ بالسلام)) وقولي له أنا أبي أكون أحسن منك وأقولك إني سامحتك وهذه يدي أمدها لك .............
لازم الهجر بينكم مايطول حتى لو كان هو الغلطان لان كثرة الهجر تعودكم تستغنون عن بعض وتقسي قلوبكم على بعض فيدخل الشيطان بينكم ويكبرها الحديث السلبي في نفسك ونفسه بيزود وبتكرهون بعض وتصير الحياة مالها طعم لازم تضغطين على نفسك وتكونين جادة في حل مشاكلك الزوجية متوكلة على الله وادعي دايم وفي كل يوم إن الله بعينك على إدارة أمور بيتك على أكمل وجه والله سميع الدعاء
والمرأة الله جعل جهادها في بيتها وكلمة جهاد تدل على التعب والمجاهدة يعني لازم تصبر وتحتسب وتكون قدوة حسنه لأبنائها وزوجها خليه يشوفك وأنت تصلين وأنت تدعين وأنت تقرئين القران وأنت تتصدقين عشان تكونين قدوة له وعشان يثق فيك ويحترمك .
ملاحظات على الماشي:
1-تجنبي مدح حياتك الزوجية امام احد غير أمك.
2-تجنبي مدح أي امرأة واذكر بعض مواصفاتها أمام زوجك
3-افرحي لما تشوفيه مبسوط ولما يكون متنكد خففي عليه
4- دايم خلي على بالك انه هو الرجال واحترميه وحسسيه بان الكلمة الأولى والاخيرة له تصريحا وتعريضا
5-في أي مرة يجي يراضيك لاتطولينها مرة وتسوين نفسك زعلانه ارضي يعني قبل مايطفش بشوي وإذا طفش وندمتي روحي له وقولي ماحبيت افرح الشيطان علينا وسلمي على رأسه
6-إذا كنت في مجلس عندك اهلك أهله اظهري اهتمامك فيه صبي له قهوة قربي له الحلا امدحيه مدحه حلوة اجلسي جنبه وهكذا .
7-لاتجعلي الزوج محور اهتماماتك في الحياة وهو مشغول عنك حاولي أن تشغلي نفسك بما يفيد الاطلاع والقراءة لاتحبسي نفسك للشيطان والوساوس والهموم وتقعين فريسة للأمراض
9- اعلمي أن الدنيا ممر وان الآخرة هي المقر يعني السعادة في الدنيا لحظية زائلة والآخرة خير وأبقى
10- اعلمي انك لست وحدك التي تعانين من المشاكل وانظري إلى غيرك من هم اقل منك وأسوأ ولاتقاني نفس بمن هم أحسن منك أكيد كل إنسان بيكون فيه نكد بحياته يعني إذا مو في الحياة الزوجية في صحته أو نفسيته أو فقد الأهل والأحباب يعني مين اللي ما يسلم من نكد الحياة فالأنبياء هم أكثر أهل الأرض ابتلاء حتى إن هناك حديث بما معناه إن مرض الأنبياء ليس مثل
بقية الناس بل هو اشد .
11-لاتقللي من قيمة زوجك أمام اهلك اجعليه دائما محل احترام وتقدير .
12- اعلمي أن الإنسان العصبي دائماً يخبئ داخله شخص أخر في قمة الحنان والعطف وأنت وشطارتك تعرفين كيف تستخرجين هالعاطفة والحنان.
13- موكل مشكلة والثانية تلمين عفشك وتقولين بروح بيت أهلي صدقيني اللي تروح بدون سبب مقنع بترجع بدون سبب أو أقلها ببصير هالشيء عادي عند الرجل لما يتعود عليه ولما بتصير مشكلة هو بيقولك يلا روحي بيت اهلك فتخيلي لما تكونين أنت الغلطانة وهو يقولك روحي بيت أهلك صدقيني إحساس صعب جدا جدا حتى اهلك يمكن يلومونك.
14- المشاكل وصلت حدها وراسك بينفجر مو قادرة تصبرين اطلبي من زوجك في وقت مناسب انك تروحين لأهلك وعلى حسب نفسية زوجك اخترعي العذر. يعني عشان تجددين وتغيرين الجو وترجعين أكثر شوقا وبطاقة اكبر.مو تكون الغيبة شهر ولا أسبوع يعني يومين 3 أيام .
15-لاتنسين الحركات الرومانسية والليالي الحمراء والزرقاء والدلع والأفكار الحلوة يعني كوني لزوجك زوجة وعشيقة وصديقة والكلام الحلو لازم منه وزوجك بيتعلم منك مع الأيام ويصير الشيء متبادل بينكم.والمنتدى مليان بالأفكار اللي تناسبك وممكن تطبقينها.
16- إذا الم بك خطب عظيم –خيانة زوجية أو مشكلة حسيتي إنها بتطير عقلك لو فكرت فيها- مباشرة توضئي وصلي وادعي وابكي واطلبي وثقي بأنك ستشتكي لمن سينصفك ويهون عليك ويسترك فهو اعدل واحكم من كل من ستلجئين إليهم وهذا هدي الحبيب صلى الله عليه وسلم حيث أنه كان إذا حزبه أمر فزع إلى الصلاة.

هذا اللي حبيت إني أضيفه لموضوعي عن المشاكل المتراكمة في الحياة الزوجية أهم شيء انك تصبرين وتستعينين بالله وتتوكلين عليه والله يكون في عوننا ويصلح أزواجنا ويجعلهم قرة عين لنا ويجعلنا قرة عين لهم.
هذه بعض الحلول وأتمنى إن كل وحدة تتفهم نفسية زوجها وطبقها بالطريقة اللي تعرف إنها تتناسب مع شخصيتها وشخصية زوجها.

متى وكيف تطلبين الطلاق؟
الطلاق شرعه الله حل لان الحياة أحيانا يكون فيها خطر على احد الزوجين على نفسه مثل أن يكون الزوج مدمن أو شكاك بطريقة مرضية غير متقبله كذلك الضرب المبرح كذلك قد يكون فيه خطر على العرض مثلا زوج يطرد زوجته اخرالليل بالشارع أو الزوجة لاتأخذ حقها الشرعي في الفراش نظراٍٍ لان الزوج كبير في السن أو مريض أو مهمل زوجته ولا ينظر إليها
وكل امرأة تختلف عندها الأولويات عن الأخريات فالطلاق شرعه الله لرفع الضرر عن احد الطرفين بحيث يكون الطلاق هو أحلى المرين و عندما يستحيل تحمل الحياة
ونصيحتي لمن تعتزم الطلاق الاستخارة وموازنة السلبيات على الايجابيات وان تأخذ بمشورة إنسان تثق فيه وفي أمانته وصدقه لا يكون أمها أو أبيها بحيث تأخذ القرار وهي تعلم إنها لن تظلم نفسها ولم تظلم زوجها أو أولادها.

اعتذر للإطالة وأتمنى إني أكون فدتكم
والحمد لله رب العالمين إن أحسنت فبفضل ربي وان قصرت فمن نفسي والشيطان.