الزوج...ماهو دوره في حياة أطفاله؟؟؟

السلام عليكم
كل وحده في حياتها رجل
سواء جد أو أب أو أخ أو زوج
وش دورهم في حياة أطفالهم؟؟؟
يعني جدك وش دوره في حياة أبوك وأخوانه؟؟
وأبوك وش دوره في حياتك أنتي وخوانك؟؟؟
وأخوك كذالك
وحتى زوجك
أيش دورهم في حياة أطفالهم؟؟؟
"
"
أنا مثلا جدي الله يطول بعمره
كان بس مصدر الرزق لأبوي
وأمه كل شيء بحياته
هي اللي تعلمه الصغيره والكبيره
حتى المصرف كانت تشتغل بالتجاره
وتصرف عليه
"
"
أبوي الله يخليه
غير الصرف
وحنا صغار ممكن يأكلنا
ويشيلنا عن أمي
كان يأكلنا ويلبسنا وحتى يروشنا
كان يدرسني بنفسه
كان يعلمني الخط والرسم من صغري
كان ممكن يوديني أنا وخواني الملاهي لحاله وماهو شرط وجود أمي
كان يوديني المستشفى إذا مرضت بدون أمي
كان يهتم في أدويتي ويتأكد أني أخذتها في وقتها
لما كبرت شوي في المتوسط تقريبا
هو يروح معي السوق
يهتم انه يوصلني لين مدرستي
يهتم اني ماروح عند صديقاتي الا وأمي معي

زوجي الله يحفظه
مايحب يشيل الصغار
ولا أنه يأكلهم
ولا يلبسهم
ولا عمره دخل يروشهم
خصوصا يوم يكون نايم
مايبي صوت صغار
"
بس مثلا يحب يلعبهم وينطط مع عياللنا في البيت
أكثر مني صراحه
يعلم بنتي أشياء من أمور الدين
مع ان عمرها 3 سنوات
يعني مثلا
يمد يده ويسلم عليها يوم يدخل البيت
يحاول يشتري لها العاب ذكاء ويلعب معاها
مستحيل يوديها مستشفى أو مكان بدوني
يعني هذا اللي يحضرني
"
"
أمس وحده تكلمني عن ناس من جماعتنا
تقول من صغري
ماعمري سمعت ان أبوهم حطهم في سياره وراح معاهم مشوار
سبحان الله
الناس أجناس
ويختلفون
"
"
ووحده ثانيه عندها ولدين
تقول يوم نطلع
زوجي عليه الكبير
وأنا علي الصغير
وقت الأكل كذالك
زوجها حتى لما يسوق
لازم ولده على حضنه
"
"
بنات ياريت تشاركونا
عشان أستفيد ونستفيد
واللي ماعلمت زوجها على شيء
يمديها تعلمه
وجزاكم الله خير