عزيزتي عندك التوست وياكثر المواضيع اللي تتكلم عنه ويا كثر الأنواع اللي تقدرين تسوينها فيه
من صواني بحيث تصفين شرائح التوست ثم تدهنينها بالجبن أو المايونيز أو بخلط الإثنين سوا ثم تحطين الحشوة اللي تبين من دجاج أو لحم أو تونة ثم تصفين طبقة ثانية من التوست وفوقها يا أما تدهنين بنفس المكونات اللي دهنتي فيها قبل أو ببشاميل.. أو تسوين منها ساندوتشات منوعة أو بيتزا وعندك بعد لفائف التوست وغيرها كثير من الأصناف إذا بحثت أكثر في المنتدى أو في أي مكان ثاني أكيد بتلقين...وما أنسى مواضيع البنات للإستعداد لهالشهر الفضيل الموجودة في هذا القسم أكيد بتفيدك.
الله يعينك وأتمنى ما أكون كثرت قرق....
27-07-1428 هـ, 04:09 صباحاً
 
فوق
27-07-1428 هـ, 04:13 صباحاً
 
أهلين أختي ...
شوفي يا أختي بعطيك أكثر من طريقه وان شاء الله أفيدك ...
هذي مقادير عجينه الفطاير :
3 ونصف كوب طحين
3 ملاعق كبيره حليب بودره +قليل ملح +ملعقه ونصف خميره +ملعقه صغيره باكنج بودر +ربع كوب زيت زيتون +ثلاث أرباع كوب ماء دافئ +علبه زبادي تعجن وتترك لتخمر ...
أنا أسوي الفطاير عادي أخبزها بالفرن ولما تنضج اضعها في صينيه واتركها بالفريزر الى أن تجمد وبعدين أحطها في علب وبين كل طبقه كيس نايلون ولما أجي أقدمها أضعها في صحن التقديم وأتركها بره لمده ساعتين (يعني لازم تطلعين الفطاير قبل وقت التقديم بساعتين وتصير كأنها طازجه )
كفته العدس :
واحد ونصف كوب عدس الأصفر +كوب كزبره مفرومه +كوب بصل مفروم +بهارات +ملح +ملعقه باكنج بودر
ينقع العدس اربع ساعات ويطحن مع الكزبره والبصل ويضاف له باقي المقادير اذا ما طحن معك حطي قليل من الماء وبعدين حطي طحين لأن راح تكون معك الخليط سائل وماراح تقدرين تشكلينها أقراص
أضيفي الطحين لما تلاحظين انك تقدرين تشكلينها وبعدين سويها أقراص دائريه وصفيها بالصينيه ولازم تفرشين الصينيه كيس نايلون وترشين طحين وحطيها بالفريزر لما تجمد ضعيها في علب بلاستيك وبين كل طبقه كيس نايلون ولما تجين تقدميها ماعليك ألا تقلينها
وياأختي حتى عش النحل سويه عادي وخليه في صينيته وغطيه بقصدير وخليه بالفريزر وعش النحل عجينته مثل الفطاير بالضبط واذا ماتبين تحطين صواني بالفريزر أن أسوي عش النحل في قوالب الكيك يعني أحط ورق في قوالب الكيك وأكور العجينه وأحطها بالقوالب واحطها بالفرن وافرزنها بنفس طريقه الفطاير (لازم تحطين ورق في قوالب الكيك علشان تقدرين تطلعينها بسهوله )
وأنا أسوي كل أنواع حلا العشاء وأفرزنه ولا يتغير وأخليه في نفس صوانيه بس اذا ماتبين تحطين صواني بالفريزر عادي بعد ماتسوينه قطعيه بحيث يكون قطع حلى العشاء مو حلى قهوه وصفيه في صينيه وحطيه بالفريزر ولما يجمد حطيه في علب وبين كل طبقه كيس نايلون
وانا أفرزن حلى الشتلات والقنفذوعنقود العنب وأي حلى وصدقيني مايتغير وأنا مجربته وأفرزن السمبوسه والكبه وبس وقت التقديم أقليها
وهذي طريقه كرات المكرونه أنا سويتها وطلعت مضبوطه
كيس مكرونه اسباكتي وتقطع بالنصف +بقدونس مفروم +3 بطاطس مسلوقه ومهروسه +نصف دجاجه مسلوقه ومقطعه +باشمل (2 كوب ماء +4 ملاعق حليب بودر +6 ملاعق طحين )
تسلق المكرونه وتخلط مع البقدونس والبطاطس ويضاف عليه الملح وتترك جانبا وبعدين تسوين حشوه الدجاج المعتاده (يحمس بصل مفروم ويضاف اليه الدجاج وجزر مبشور وبهارات وملح وكزبره مقطعه أو مفرومه ويضاف لها القليل جدا من الماء ويضاف على المكرونه و الباشمل وتكور وتغمس بالطحين ثم البيض ثم البقسماط وأصفها بصينيه واتركها تجمد بالفريزر ولما تجمد أضعها بنفس الطريقه ووقت التقديم تقلينها
شوفي ياأختي فرزني كل شي في هذا الشهر قبل مايجي رمضان وتتعبين في الطبخ عشان يصير عندك وقت للعباده وقراءه قران
والله أنا أفرزن كل شي ومايبقى لي غير الشوربه والوجبه الرئيسيه اما ثريد او مرقوق او جريش او رز وأعجن القيمات على العصر وأسويه بعد نصف ساعه علشان عيالي يحبونها وأحيانا أسوي صينيه لهم بس ما أسويها ألا الصبح وأغطيها أخليها وقبل التقديم أسخنها بالفرن, وبكذا يكون عندي وقت فاضي كثير علشان أقرأ قران ,وحتى المواعين قليله مره وماتاخذ منك وقت في الغسيل
وغير كذا اذا جاني ضيوف ويشوفون الأصناف اللي مسويتها يحسبون اني أطبخ من الفجر وما يدرون اني مرتاحه على الاخر
طولت عليك ....بس أتمنى اني أكون أفدتك بالكثير
لا تنسيـــــــــــــــــــــــــــــــــــــــــني من دعــــــــــــــــــــــــــــــــــــــــــــــــــــــاك
27-07-1428 هـ, 06:18 مساءً
 
.زيتونة يا قلبي انتي الله يوفقك ويستر عليك وما قصرتي

بنات تراي تحطمت ما عمري نزلت موضوع الا تطنشون ليش فيني شي
انا مزعلة احد منكم
29-07-1428 هـ, 02:13 صباحاً
 
السلام عليكم ورحمة الله وبركاته
الله يهديك اختي ويفم ضيقتج
ادخلي في الصفحة اللأولى الحين في كذا موضوع عن التفرزين في رمضان
وركن التجارب والحلول المنزلية مليان طرق وحلول
الله يسهل عليج امرك جميعا ان شاء الله تعالى اللهم آمين
29-07-1428 هـ, 09:58 صباحاً
 


الساعة الآن 09:49 .